雪糕
出自維基百科，自由嘅百科全書
雪糕，英文叫 ice cream，國語叫做冰淇淋/冰激淋，係一種冷凍奶製嘅甜品，夏季常見嘅消暑嘅嘢食之一。喺佢最簡單嘅形式入面，雪糕係利用常見嘅嘢食（牛奶、乳酪、奶油等）同一啲甜品同其他調味料混合製成嘅冰涼嘢食。將佢哋溝埋一齊之後要將環境溫度降到好低，確保形成一種比較鬆軟嘅形式而唔係一嚿大冰塊。工業製成嘅雪糕一般係將溝好嘅雪糕液體注入喺冰鹽混合物嘅模具之中，冰鹽混合物喺融化嘅過程中，會吸收大量嘅熱，可以好方便嘅將已經整好嘅液體冷凍成雪糕。美國聯邦食品法規定，雪糕嘅成份中奶油至少係重量嘅百分之十。
味道同款式 [編輯]
除咗純奶之外，而家雪糕最主要嘅味道包括雲呢拿同朱古力兩種，第啲常見嘅口味有哈密瓜、綠茶、紅豆、芒果、士多啤梨、椰子、豆腐、焦糖、芝麻、菠蘿、香芋等等。常見嘅配料就有車厘子、餅乾、朱古力、提子乾、香蕉、士多啤梨等等。
雪糕放入任何材料嘅容器度食都得。唔同嘅國家有唔同製作雪糕嘅方法，例如日本會將雪糕包喺糯米粉糰入面，成為雪米糍。最普遍嘅樣式係喺製作過程中，將雪糕同雪條一樣直接用一條木棍或塑膠棍插起，咁樣食會較方便。另一種常見食法係裝喺由威化做成嘅圓錐形雪糕筒度。
