電話簿

典型白頁

公眾電話下面有電話簿

電話簿，簿一種，羅列電話號碼。通常出自電話公司，列出用戶註冊名、簡單地址、電話號碼，印來畀人查，故此又叫公眾電話簿。通常有白頁同黃頁兩種。另外亦會印出寫打電話方法，長途電話字頭，緊急電話號碼，又或大眾常用機關電話地址咁。用戶唔想列出來，大多數要畀錢解決。又或者當想擺得當眼啲，詳細啲，又會化成畀錢賣廣告。電話簿會派畀用戶，亦會放喺公眾電話亭。

近似亦有公司電話簿同個人電話簿。前者多數出自大公司，列晒公司各部門電話，方便搵啱人傾。而後者就多數個人收錄電話號碼，通常只記至重要，如家人，如親戚，如朋友，如同事等等，又或聽到電話號碼，即場摘低，方便日後搵得返。

地址簿好早就有，然而加上電話號碼，當然要發明電話之後。至早不過咭紙一張就夠記，一八七八年二月廿一號出版，埠中名單只有五十個。當時有電話都矜貴。然而用戶越來越多，越來越普及，家家戶戶都有，本就變到好厚，紙就用得好薄。

現今手提電子產品發達，少咗人用紙本，大多改用電子電話簿，或網上電話簿。入落手提電話，甚至可以直接打出。而手提電話號碼，亦無錄入公眾電話簿。

文化

電話簿年年都換。舊咗就無用，佢夠厚墊煲底都啱。

香港電影典型情節，用電話簿墊住錘仔打人唔會有傷痕。

電話簿亦可用來做玩，隨便搵個號碼打畀人傾偈，或整蠱人亦有。生意經紀亦用來搵客。