香港一百蚊紙

出自維基百科,自由嘅百科全書
跳去: 定向搵嘢

一百蚊紙(100元紙幣)係現時香港流通貨幣之一,面值100港元,目前分別由香港3間發鈔銀行發行。由於最大發鈔銀行──香港上海滙豐銀行長期以來嘅100蚊紙都係以紅色為主調,所以香港民間俗稱「紅衫魚」。以鈔票冧巴計,100蚊紙嘅發行量僅次於20蚊紙。

歷史[編輯]

100蚊紙早喺19世紀中已由當時3間發鈔銀行──香港上海匯理銀行(即後來嘅滙豐銀行)、印度新金山中國匯理銀行(即後來嘅渣打銀行)同埋印度倫頓中國三處匯理銀行(即後來嘅有利銀行)發行。直到二次大戰以前,3間發鈔銀行嘅100蚊紙設計分別出現咗幾次變化,尺寸、顏色、風格一直都有唔同。

戰後,3間發鈔銀行繼續出戰前樣式嘅100蚊紙。直到1959年,滙豐銀行同埋有利銀行改咗100蚊紙嘅設計,兩間銀行嘅鈔票除咗大幅縮細之外,亦採用同樣尺寸同埋色。不過實際上,滙豐銀行嘅鈔票圖案設計改動唔大。1961年,渣打銀行亦重新設計鈔票,尺寸同其他銀行一樣,但繼續係綠色。

1970年,渣打銀行大幅更改鈔票設計,終於改以紅色為主調。滙豐銀行同埋有利銀行亦相繼喺1972年同埋1974年改鈔票設計。不過,有利銀行嘅新鈔票只係喺1974年出過一次,之後就再冇出銀紙。而渣打銀行喺1979年又再重新設計一系列鈔票,以中國傳統瑞獸為題材,當中100蚊紙用咗「麒麟」。

1985年起,兩間發鈔銀行重新設計100蚊紙,尺寸再度「縮水」,變成家下嘅大細。1989年,滙豐銀行改以淺紅色同埋桃色印刷100蚊紙,原因可能係原有設計嘅色太深,同樣現象亦出現喺20蚊同埋1000蚊紙身上。而滙豐銀行亦曾經喺1979年改以淺紅色印刷100蚊紙,取代原有嘅深紅色。

1993年,兩間發鈔銀行因應香港主權移交臨近,改咗原本帶有英國色彩嘅鈔票設計。不過,渣打銀行嘅鈔票變動唔大,沿用以往嘅「麒麟」圖案。到咗1994年,中國銀行香港分行(即後來嘅中銀香港)亦加入發行100蚊紙。

2003年,3間發鈔銀行嘅100蚊紙設計一齊改,加入相近嘅防偽特徵。

咁啱得咁巧,現時最新版人民幣100蚊紙同埋新台幣100蚊紙,都是以紅色為主調。

其他名詞[編輯]

  • 大聖書:指1927年10月至1959年2月出嘅滙豐銀行100蚊紙,因鈔票上有個使者攞住經書,尺寸較大
  • 小聖書:指1959年8月至1972年3月出嘅滙豐銀行100蚊紙,因鈔票上有個使者攞住經書,尺寸較細
  • 紅屋:指1970年1月至1977年1月出嘅渣打銀行100蚊紙,因為以紅色印刷,鈔票上嘅舊渣打銀行大廈成間屋仔噉樣


編輯 香港貨幣
流通銀紙 $10 | $20 | $50 | $100 | $150 | $500 | $1000
流通銀仔 10¢ | 20¢ | 50¢ | $1 | $2 | $5 | $10
已停用銀紙 | | 10¢ | $1 | $5 | $25 | $200 | $300
已停用銀仔 1m | |