香港廿蚊紙

出自維基百科,自由嘅百科全書
跳去: 定向搵嘢

廿蚊紙(20元紙幣)係現時香港流通銀紙,面值20港元,目前分別由香港3間發鈔銀行出。以鈔票冧巴計,廿蚊紙係出得最多嘅銀紙

[編輯]

廿蚊紙嘅歷史唔算好耐,1985年渣打銀行先至出香港第一款廿蚊紙,並以紫藍色為主調,1年後香港上海滙豐銀行亦開始推出紫藍色嘅廿蚊紙。到咗1990年滙豐銀行嘅廿蚊紙設計變咗少少,又改以桃色印刷。

1993年,兩間發鈔銀行因應香港主權移交臨近,改咗原本帶有英國色彩嘅銀紙設計。不過,渣打銀行嘅銀紙色水冇變,而滙豐銀行嘅就改為灰紫色。到咗1994年中國銀行香港分行(即後來嘅中銀香港)亦開始出淺藍色嘅廿蚊紙。

2004年,3間發鈔銀行嘅廿蚊紙設計一齊改,顏色亦統一為藍色。

廿蚊紙啱啱出嗰時,作用只係輔助十蚊紙,所以出得好少(以鈔票冧巴計,遠遠少過十蚊紙),但自從滙豐銀行同埋渣打銀行分別喺1993年同埋1996年唔再出十蚊紙之後,就開始大量發行廿蚊紙。另一方面,發鈔銀行唔再出十蚊紙之後,原有嘅十蚊紙俾市民收埋晒,流通量大幅下降,廿蚊紙好快就成為最廣泛流通嘅銀紙。另外,由於50蚊紙出得比較少,所以當市民用100蚊紙買50蚊以下嘅嘢,就成日找到最少兩張廿蚊紙,而唔係1張50蚊紙。

渣打銀行最新版嘅廿蚊紙,唔再採用沿用咗17年嘅「海龜」圖案(改喺50蚊紙度用),改用舊版十蚊紙嘅「鯉魚」圖案。


編輯 香港貨幣
流通銀紙 $10 | $20 | $50 | $100 | $150 | $500 | $1000
流通銀仔 10¢ | 20¢ | 50¢ | $1 | $2 | $5 | $10
已停用銀紙 | | 10¢ | $1 | $5 | $25 | $200 | $300
已停用銀仔 1m | |