香港時間
(由香港標準時間跳轉過嚟)
香港標準時間，或者叫香港時間（Hong Kong Time，HKT），係香港用嘅時間，由香港天文台授時系統負責管理。香港標準時間係比協調世界時快8個鐘，即係位於東八區UTC+8。
殖民地時代早期，香港時間係靠天文台嘅天文觀測報時。香港喺1904年用格林尼治標準時間，1972年先至採用協調世界時。當國際協調時間係凌晨0:00時，香港係上晝8點。
歷史[編輯]
香港天文台授時系統係負責香港時間嘅授時服務。1885年1月1號13:00，香港天文台喺尖沙咀警署降咗一個時間球作為報時訊號，開始咗香港時間嘅標準。當時香港時間係用當地標準時間（LMT）- UTC+7:36:41。1905年元旦，香港時間正式確定為格林尼治標準時間快8個鐘（GMT+8）。1972年1月1號，香港時間改以協調世界時作為法定時間標準。而家，香港天文台以銫原子鐘報時系統作為香港時間嘅標準，誤差僅為每日1微秒之內。
香港夏令時間[編輯]
香港喺1941年4月1號至9月30號開始實行夏令時間，即係夏季期間嘅日子比正常時間快一個鐘。1941年12月，日軍佔領香港。喺香港日治時期，香港名義上全年採用夏令時間，實際上係令到香港時間同日本標準時間（UTC+9）一致。香港重光後，由1946年至1980年，香港時間恢復只喺夏季期間採用夏令時間，一般係4月中至10月中。1980年，香港天文台認為香港緯度比較低，唔使用夏令時間，所以取消咗夏令時間。
時間校對[編輯]
收聽由香港電台發佈嘅六秒信號，亦可以上天文台授時服務網頁。