香港的士

出自維基百科,自由嘅百科全書
跳去: 定向搵嘢
的士招客燈箱
的士車身廣告(1)

香港的士即係香港的士。乘客上車後指明目的地,司機直接揸過去,係方便快捷嘅公共交通工具。車費按車程及等候時間而定,而存放行李、電話召喚(電召)的士同埋用收費道路等就要畀附加費。香港各區設有唔少的士站畀乘客等的士,而部分停車禁區亦設有一啲的士專用嘅上落客位置。

[編輯]

早喺二十世紀二十年代,香港島已經有的士行,並於一九二六年引入九龍。嗰時的士得三四個位,收費方式分為按時間同埋距離議價以及按咪錶收費兩種。一九四一年日治時期前,的士通常喺各渡輪碼頭及各大酒店門口等,如果要喺其他地方搭的士,就要先電召的士公司。

運輸署記錄,一九四七年登記領牌嘅的士,有三百廿九架,一年後升至三百卌四架,到一九五七年,倍增至六百九十三架,一九五九年,兩年間,颷升至八百一十五架。一九六零年破千至一千零廿六架,自此年年加增。一九六五年,破二千,爲二千五百卅六。一九六七年破三千,爲三千六百卌九。一九七三年破四千,爲四千七百五十四。一九七七年破六千,六千二百零三。一九八一年達一萬一千零六十一。一九八四年,一萬五千九百八十四。

二十世紀九十年代,政府收緊發牌,增長放緩。一九九八年起,維持一萬八千一日卅八架[1]

種類[編輯]

香港的士分三類,市區的士、新界的士同埋大嶼山的士,分地域而行。的士分類,一因市區嘅的士乘客較多,分類可免郊區無的士載客。二因郊區交通不便,居民依賴的士服務,需要車費平啲嘅的士服務,專走郊區地方。二零零六年三月,香港合計的士一萬八千一百卅八架,分開計,市區一萬五千零五十,新界二千八百卅八,大嶼山五十。[2]按日服務人次,分別爲一百一十萬、二十萬七千九百同一千四百。

市區的士[編輯]

香港市區的士

市區的士,俗稱紅的紅艇紅雞,因為車身髹咗紅色。市區的士可接載乘客來往香港島九龍新界所有有道路連接嘅地方(包括深圳灣口岸落馬洲支線管制站,但唔包括其他邊境禁區)、大嶼山東涌機場島、北大嶼山及迪士尼樂園,夜晚23:00至朝早7:00亦可以去馬灣[3]。市區的士冇得去大嶼山其他地區(例如:東涌道、南大嶼山、愉景灣等)同埋冇陸路連接嘅離島。市區的士收費係三種的士之中最高。

新界的士[編輯]

香港新界的士

新界的士,俗稱綠的草蜢,因為車身髹咗綠色1976年9月23號起正式發牌。[4][5][6][7]收費較市區的士為低。新界的士只可以喺新界以下地區營運:

  1. 屯門區
  2. 元朗區
  3. 大埔區
  4. 北區
  5. 荃灣區青山公路汀九段汀九別墅以西、深井段、青龍頭段沿線;荃錦公路川龍以北同埋港鐵荃灣站
  6. 葵青區嘅港鐵青衣站
  7. 西貢區北潭涌香港科技大學同埋港鐵坑口站
  8. 沙田區嘅大部份地方(石門小瀝源圓洲角沙田圍曾大屋同埋紅梅谷除外)
  9. 離島區機場客運大樓、地面運輸中心同埋港鐵東涌站
  10. 深水埗區澤安邨

大嶼山的士[編輯]

香港大嶼山的士

大嶼山的士,俗稱藍的藍燈籠藍精靈嶼的,因為車身髹咗藍色。大嶼山的士只可以喺大嶼山範圍營運(包括赤鱲角機場同埋迪士尼樂園,但唔包括愉景灣),收費係三種的士之中最低。由於大嶼山重有唔少偏遠地方冇行車道路連接(包括:分流芝麻灣半島二澳狗嶺涌大白煎魚灣同埋沙螺灣等地),因此的士需求較少,現時只得50架。

收費[編輯]

市區的士收費表,九龍塘站外影
愛丁堡廣場碼頭(第三代天星碼頭)嘅的士車費表

香港的士收費係參考本地物價指數同埋國民生產總值,由政府制定並作定期檢討。隨住時代發展,各樣物價均向上提高,起錶價(頭2公里)從1975年3月的HK$2增至2008年1月的HK$12-$15,而跳錶價(以後每200米或每分鐘等候時間)由1975年3月嘅HK$0.2逐步加到現時嘅HK$1.2-$1.4。市區的士對上一次加價係由1998年6月1日起實施,起錶價HK$15,跳錶價HK$1.4;再上一次加價就係1997年4月13號,起錶價HK$14.5,跳錶價$1.3。新界的士對上一次加價就係由2003年7月12號起實施,起錶價HK$12.5,跳錶價$1.2。而由2008年2月28號起,市區及新界的士都加價,起錶價增加HK$1(即分別為HK$16及HK$13.5),而其他收費(跳錶、電召、收費隧道等)冇變;由2008年11月30日起,市區及大嶼山的士調整收費,市區的士實施「短途加、長途減」以杜絕折扣的士(包括八折的士),起錶價分別增加HK$2同埋$1(即分別為HK$18及HK$13);至於新界的士就由2009年1月16號起生效,起錶價增加HK$1(即HK$14.5),跳錶價按長短調整至HK$1-$1.3;而三種的士嘅其他收費(電召、收費隧道等)冇變。2011年7月10號起,市區、新界及大嶼山的士一齊加價,起錶價劃一加HK$2。

目前香港的士收費表

種類 市區的士 新界的士 大嶼山的士
基本收費
頭2公里或其任何部分收費(起錶) HK$22 HK$18.5 HK$17
以後每200米車程或其部分^

每分鐘等候時間或其部分

(跳錶)
咪錶收費HK$53.5以下 HK$1.6 HK$1.3 HK$1.3
咪錶收費HK$53.5-$70.5之間 HK$1
咪錶收費HK$70.5-$130之間 HK$1
咪錶收費HK$130或以上 HK$1.2
其他收費
每件行李
(唔包括擺喺車廂內嘅輕便行李)
HK$5 HK$4 HK$5
每隻鳥獸
每程電召預約服務
傷殘人士賴以行動嘅輪椅及拐杖 免費
用收費隧道同埋收費道路嘅附加費
紅磡海底隧道 司機畀嘅隧道費
+HK$10*(回程費)
唔適用 唔適用
東區海底隧道 司機畀嘅隧道費
+HK$15*(回程費)
西區海底隧道 司機畀嘅隧道費
+HK$15*(回程費)
青嶼幹線 HK$30
其他收費隧道同埋收費道路# 司機畀嘅隧道費同埋道路使用費
  • 乘客須依法按錶畀的士車費。
  • 運載行李及鳥獸收費:
    • 一般嚟講,司機可以就下列行李收行李附加費:
  1. 每件擺喺車尾行李廂內嘅行李;或
  2. 每件擺喺車廂內而長x闊x高總和超過140厘米嘅行李。
  3. 殘疾乘客嘅輪椅及拐杖唔收費。

交通地位[編輯]

的士係香港主要路面交通工具之一。據2005年統計數字顯示,的士佔總公共交通嘅9.1%排第4,排喺鐵路(36%)、專營巴士(35%)以及公共小巴(15.7%)之後,每日約有102.6萬人次使用。[8]服務範圍遍及香港島九龍新界各區,幾乎除咗一啲離島外所有路面均去得到。故此,的士同時具備彌補其他公共交通工具好似巴士、鐵路等未能覆蓋嘅地區,以及日間交通工具未能涉及嘅服務時間。香港的士密度亦係世界上最稠密嘅地區之一,喺市區一些地區更幾乎唔使等就可以隨時截到的士。

設施[編輯]

的士站[編輯]

乘客同埋的士都須要按次序上車同埋等客。

過海的士站[編輯]

乘客喺呢種的士站上的士,一定要過海(由香港島前往九龍/新界或相反),但只須畀單程隧道通行費。

香港區[編輯]

地區 地址
中西區 新港澳碼頭
中西區 介乎中環五號同六號碼頭之間
中西區 加多近街
中西區 第一街
中西區 干諾道西188號
中西區 交易廣場公共交通交匯處
灣仔 港灣道(鷹君中心商場/海港中心商場對面)
灣仔 駱克道介乎盧押道同柯布連道之間
灣仔 駱克道353號(介乎杜老誌道同馬師道交界)
灣仔 百德新街介乎京士頓街同告士打道之間
灣仔 謝斐道伊利莎伯大廈對出
灣仔 羅素街(時代廣場內)
東區 琉璃街介乎興發街同電器道之間
東區 北角道介乎和富道同渣華道之間
東區 太祥街介乎筲箕灣道同康祥街之間
東區 小西灣(藍灣半島)公共通輸交匯處
東區 盛泰道杏花邨街市外

九龍區[編輯]

地區 地址
九龍城 紅磡碼頭
九龍城 治民街
九龍城 新圍街
旺角 海帆道,大角咀(維港灣)
旺角 櫻桃街近奧海城第二期
油尖 紅磡港鐵站
油尖 永星里介乎石壁道同彌敦道之間
油尖 天文臺道介乎金巴利道同漆咸道南之間
油尖 漢口道近海防道
油尖 麼地廣場帝苑酒店外
油尖 中港城公共交通交匯處
深水埗 荔灣道(美孚港鐵站)
觀塘 佳廉道
觀塘 觀塘渡輪碼頭
觀塘 觀塘茜發道西行近麗港東街交界處

的士上落客區[編輯]

一啲原本係所有路面車輛或大部分路面車輛唔准停車上落客貨嘅位置(禁區),劃作容許的士停車只作即時上落客,禁區生效時間內唔可以等客。

的士站

牌子同埋車型[編輯]

一款市區紅色石油氣的士 - Toyota Crown Comfort
的士後座

早期香港的士喺1940年代誕生,喺1940年代至1960年代期間,當時的士全部係歐洲車及美國車,分別有摩利士(Morris)Oxford、Minor、柯士甸(Austin)Cambridge、Plymouth、Dodge、Desoto、Willy、Standard、快意(Fiat)、Hillman、雪鐵龍(Citroen)、標緻(Peugeot)、福特(Ford)、福士平治200D火水燈(W115)以及之前兩代(圓燈同埋車尾兩側起角嗰款以及一款較圓渾嘅型號)等。其中以摩利士同埋平治佔最多。

1968年起,日本製造嘅的士引入香港,主宰香港市場並間接令的士平民化。

香港的士用嘅車輛型號必須經政府檢定。現時用嘅車型絕大多數係豐田皇冠Comfort,亦有少少日產Cedric、日產Gloria重行緊。

牌子[編輯]

日產[編輯]

1968年引入嘅第一款日產的士型號係Cedric 130系,然後到1971年嘅230系,即行內俗稱嘅「大籮柚」,呢個時候平治開始退出本地的士市場,而摩利士因為汽油引擎同埋車身細嘅關係,六十年代開始已經冇再輸入並好快喺市面上消失,此後其他歐美牌子的士亦慢慢俾日製的士取締。1975年Cedric推出330系列,行內俗稱「大白鯊」。1976年9月23號,香港政府開始將正式發牌嘅新界的士車身髹上綠色,實施限制經營地區。1979年推出430,行內俗稱「火柴盒」,呢代開始,內籠由黑色轉成深藍色。由130系至430系列,日產的士一律配用2164cc四汽缸柴油引擎,最大馬力有64匹。1983年日產推出Y30系列取代430,行內俗稱「番鹼盒」,開始改用較大容量2289cc嘅新引擎。然後到1987年轉款為Y31,並提供普通版(圓燈及全手攪車窗)同埋豪華版(石英大燈,司機位及左後門有電窗)兩種。1991年Cedric Y31私家車同埋的士車身開始分家,的士版即目前喺街上所見嘅行運通石油氣的士嗰款。但早期仍然用黑色泵把,及配用再加大容量2500cc柴油引擎。大約1994年1995年,引擎進一步加大至2700cc,呢款車車尾並印有2.7字樣,以茲識別。1997年日產代理引入15架日產Cedric Y31石油氣的士樣版到港作試驗,其中10架係1994年曾經喺日本落地行嘅中古車,目的係用作試驗用咗幾年嘅石油氣的士嘅用途。而另外5架全新車,就配上同車身顏色相同嘅泵把,並配用新款鬼面罩及尾燈,引擎容量1998cc,馬力85匹。

日產的士喺2005年底停止輸港。

豐田[編輯]

豐田皇冠Comfort的士內籠
豐田Alphard豪華的士內籠
2008年豐田Crown Comfort新款的士
2008年豐田Crown Comfort新款的士(背面)

豐田的士喺1979年首次引入。最早期係LS90系,特點係四圓燈設計,配用2188cc四汽缸柴油引擎,馬力66匹。1980年推出LS110系,分前期同埋後期,前期係四盞方燈,配米黃色內籠,後期改用石英大燈,灰色內籠,引擎重係2188cc的L系。1983年並特別為一位傷殘的士司機設計一部配用自動波、電窗、風油軚同埋絲絨座椅嘅特別版。1984年推出LS120系,特點係有黑色嘅C柱,引擎改用2446cc的2L,馬力有75匹。呢代同時有幾架傷殘司機版本,但波棍係擺喺中控台上,故此只得4個乘客座位,而LS120亦有兩代,頭燈設計有啲唔同,而內籠開始轉用深藍色設計。1988年推出LS130系,並分有四期,第一期稱為鑽石皇冠,大概一年後加設風油軚,其他設計冇變,但改叫翡翠皇冠,1990年作出小改款,改用新設計嘅鬼面罩,型號為LS131系列,代理稱之為明珠皇冠,最後一期加上電鎖,改稱為琥珀。1993年推出LS140系,代理稱為銀禧皇冠,1994年再作出小改款,型號為LS141系列,代理稱為金禧皇冠。其實,銀禧、金禧、鑽石、翡翠、明珠皇冠嘅車身外殼設計唔同,但底盤完全冇分別,故此兩代嘅廠號亦同樣係LS130系。而相對嘅3.0汽油引擎嘅Royal Saloon,1987-1991(即鑽石、翡翠及明珠冠車殼)年款採用7M-GE引擎,廠號係MS133,而1991-1995年款(即金、銀禧殼)就用新嘅2JZ-GE引擎,廠號係JZS133,香港代理並冇入過S140系嘅皇冠,S140系同JZS133同樣喺1991-1995年間生產,但分別只在於硬頂型車身(Hardtop)同埋最頂級嘅Crown Majesta,呢兩款同香港有引進嘅JZS133房車版有好大分別,包括較闊嘅車身(Hardtop 1755mm、Majesta 1800mm)、較闊嘅車軸跨距,而Majesta亦有較長嘅2780mm軸距,同JZS147、UZS143 Aristo相同;而S140同S130嘅最大分別,在於S130繼續用皇冠車系用開嘅同車身分離式嘅獨立底盤,而S140就採用單體硬殼式底盤結構。

1995年起,皇冠S150系私家車同埋的士車身開始分開發展,的士版即目前嘅金豐(Comfort)的士車身,車架開始放棄使用分離式大陣,改用單體硬殼式結構,而車廂方面改用灰色為主嘅色調,柴油版金豐的士採用2L引擎,是為LXS10。

1997年豐田代理引入15架豐田金豐石油氣的士樣版到港試驗,特點係配用日本本土鍾意用嘅沙板倒後鏡,引擎容量係1998嘅3Y-PE,馬力79匹,是為YXS10。1999年石油氣的士試驗成功,並開始全線引入,車身外觀一直冇大改變,但加設自動波作為選配設備。2000年加設六幅式合金輪圈作為標準配備,2001年有另一款五幅式輪圈可以揀,並增設引擎轉數錶。2002年隨住皇冠皇室型改款而改用相同嘅倒後鏡,同時錶版嘅里程計亦由跳字改用液晶式顯示。2005年車尾窗內嘅迫力燈改用LED燈,及兩側前沙板加設一對指揮燈。大約2004年,代理唔再引入手波型號,故此一律配用自動波。2006年,代理增加咗一款稱為「愛心的士」嘅型號,特點係左邊B柱被移前10cm,故左邊前門比標準版本細,而後門比較長,B柱並設有手挽、左後座亦可以向左面旋轉,以便行動不便人士好似長者、受傷者或殘疾人士上落,而呢款的士亦用咗電動車門,取代手動遙控設計;車價方面比標準版貴10,000港元左右。2008年,豐田Crown Comfort的士作出小改款,車尾冚改用新款高亮度L型大面積尾燈組,配合全電鍍牌框,而車頂的士招牌換上全新圓拱形設計,並換上白光燈照明,換上同車身同色嘅倒後鏡,車尾重貼有LPG 2.0的字樣,係繼豐田七人車款5座位的士Alphard Hybrid之後再推出嘅新款載客的士。2008年8月開始,為符合歐盟最新廢氣排放標準,新到港嘅豐田皇冠的士,波棍由設於軚盤左側改為擺喺地台上,排氣喉位置亦重新編排,故此乘客座位由5個減至4個,但規格同目前嘅5座位的士相同,引擎方面改用15吋195呔,引擎型號為1TR-FPE VVT-I,馬力116匹[7]

車型[編輯]

旅行版的士[編輯]

自香港開埠以來,的士普遍係一般嘅五座位的士,但曾經有一段時間推出過旅行車型的士。

2000年,香港福特汽車代理引入首批澳洲福特Falcon石油氣旅行版的士,賣點係有特大嘅行李存放空間,特別適合用作機場出入嘅用途。雖然車身較大,但車廂比較窄,加上引擎容量達到3900cc,耗油量比一般日製的士多達一倍有多,故即使有200匹馬力輸出,亦得唔到用家青睞。大概喺2003年2004年期間,呢批旅行版的士開始逐漸喺市面上消失,原因係呢款車比較食油,維修費貴,從而加重經營成本,再加上技術以及安全性問題,亦因此試驗失敗,並且未能普及。由於油價及維修成本高等不利因素,導致用呢款車經營困難嘅情況,全港最後一架福特Falcon石油氣旅行版的士自2008年9月10日起停止營運(退役前車牌號碼:EH1196,架車退役前多數喺元朗區服務,亦係呢款車唯一一架新界的士),標誌住旅行版的士從此喺香港絕跡。

福特旅行版的士

四座位的士[編輯]

豐田四座位的士

每架的士喺車頭同車尾同時設有綠底白字嘅半圓形牌,上面寫上架的士嘅載客上限,而香港的士普遍以5座位為主,但都有一段時間推出過4座位的士。

1984年,政府容許引入4座位的士,首款引入嘅係第4代三菱Lancer,配用1.8升引擎,當時號稱係起動速度最快嘅車型。後來亦引入日產Sunny B12、日產Bluebird 910、豐田Corona CT141、大發Charade、五十鈴Gemini,亦有一款豐田皇冠LS120系Deluxe版本(配地台波箱),另外亦有多款樣版四座位的士,包括萬事得323、萬事得626、五十鈴Aska、福特Telstar,只係呢幾款車試驗反應唔係咁理想,最終只引入少數行駛。4座位的士特色係車廂細,最多只可以載4人,但同時佔路面地方較少,速度較快,比較慳油,又環保啲,相對適合只有1至2人時搭。可是,現實情況係4座位的士實用性低,市民畀一樣價錢而坐少1人,因此不被精打細算嘅香港人所接受。1990年代開始,4座位的士逐漸被淘汰,去到近年路面上已經冇4座位的士,但喺大概1992年,日產代理當時仍輸入少少Crew的士,配2.0升引擎同埋自動波箱,係繼傷殘人士版本皇冠之後,另一款配用自動波嘅的士。但由於當時四座位的士已進入淘汰時期,加上唔受乘客歡迎及實用性低等不利因素,呢款車只服役短短半年至一年之後亦被淘汰。除此之外,政府喺近年推廣石油氣的士,而以福特、日產及豐田為主嘅的士製造商都以5座位的士作標準,進一步令4座位的士喺市面消失。據運輸署記錄,之後嘅超過十年內都冇4座位的士登記。

不過,2008年3月喺香港代理日本豐田汽車嘅皇冠車行話,因應符合歐盟最新嘅廢氣排放標準,計劃自2008年8月起,新出的士會由目前嘅五座位改為四座位。但規格就同現時五座位的士一樣。四座位的士卒之喺2009年2月開始重返香港。

環保的士[編輯]

石油氣的士嘅標示貼紙

1990年代,香港空氣污染問題日益嚴重,政府於是喺路面交通方面着手推行一系列措施,而環保的士就係其中之一。由於柴油車經常排放黑煙及有毒物質,政府於是採取以其他較少污染嘅的士取代柴油的士。

1997年,香港豐田代理皇冠汽車同埋日產代理合誠汽車分別各自引入15架樣版石油氣的士來港,即總共30輛,其中10架日產係1994年喺日本曾經落地行嘅二手車,目的係用作試驗用咗幾年嘅石油氣的士嘅用途;而另外5架全新車就有同車身同色嘅泵把、新款鬼面罩同埋尾燈,當時石油氣的士引擎為1,998cc,馬力分別有79匹及85匹。及至1999年,石油氣的士試驗成功,並全面逐步取代所有柴油推動嘅的士。政府後又發放一次性資助金鼓勵的士車主將旗下嘅柴油的士換晒做石油氣的士。至此,香港進口柴油的士同埋柴油的士嘅登記數字減至相當低嘅水平。

2001年8月1號起,法例禁止柴油的士進口香港[9]

2002年7月,行政長官董建華話過,自引入石油氣的士同埋超低硫柴油後,有關空氣質素超標次數,較以往2年少45%,噴黑煙嘅車亦少咗大概一半[10]

2004年12月嘅統計,香港共有18,100架已登記石油氣的士,已達的士總數99%,此外各區有成50個石油氣加氣站經營緊。

政府推廣石油氣的士以「噪音低同埋污染少」為賣點,但曾經遇到唔少打擊,例如有司機誤以為石油氣的士較易發生爆炸;早期石油氣的士加汽站收費貴,站點又唔夠;從柴油車換成石油氣車嘅費用高;石油氣車起動較慢等。然而,隨住政府強制推行同埋一段適應期,有關問題已大為改善。

政府亦曾經考慮過以天然氣電力作的士嘅環保能源,但係由於能源費同埋換車費用不菲,因此未有全力推行。

七人車款五座位的士[編輯]

混燃款新界的士Toyota Alphard Hybrid

2007年6月開始,由七人車款改裝而成,用混燃豐田Alphard五座位的士誕生。由於燃費較高,根據2007年8月嘅香港電油價格,市區行走每公里燃費係港幣1蚊,高速公路行走大概要港幣5至6毫,故此,呢款車喺營運時期只以電召形式提供服務。車費同一般新界的士相同。基於油價貴同埋呢款車營運成本過高,喺嚴重虧損嘅經營環境下,全港兩架豐田Alphard的士(車牌:MW4329、MY4160)已經喺2008年年中退出營運,唔再提供任何的士載客服務。

2011年2月,有五部由豐田Noah改裝而成嘅五座位市區的士,再次以電召形式提供服務,專門載輪椅客。呢個名為「鑽的」嘅「無障礙計程車服務」由社企經營,最大特點係可以畀輪椅直接上落,但預約收費高過一般電召服務,同埋只係主要服務九龍區。

I-TAXI創新的士資訊系統[編輯]

隨住的士服務不斷提升,2008年的士業界引入I-TAXI創新的士資訊系統,已正式獲運輸署批准,並得到十幾個的士團體同埋的士車行認同,現正全力推出市場,目前已有部分的士裝咗I-TAXI創新的士資訊系统,乘客可以喺的士車廂睇到免費資訊。

GPS派遣系統[編輯]

2007年,科浪國際(2336)旗下航天科浪宣佈,推出專為香港的士行業而設嘅智能派遣系統,並命名為「TAXI4U」,方案利用全球定位系統(GPS)科技配合先進數據庫處理技術嚟整合的士營運,呢項服務唔但只有助業界提升營運效率,亦由於佢可以記錄司機接載乘客嘅詳細資料,可以畀乘客享受更方便快捷及安全可靠嘅的士服務。

據了解,「TAXI4U」乃本地首個成功開發及應用喺的士行業嘅智能派遣系統,得到多個的士團體、流動通訊系統營運商及相關政府部門全力支持。當的士營運中心收到客人電召後,可以用後台嘅智能乘客管理系統,通過無線網絡以最短時間派遣附近嘅的士前往目的地接載乘客。

該公司將智能交通嘅科研技術,套用喺「TAXI4U」方案內,包括Kenji汽車黑盒系統及VTRACK4U軟件,再加上航天科浪喺公共交通嘅經驗,喺得到的士團體支持下,「TAXI4U」好快會投入服務,象徵住香港智能的士發展嘅一個重要里程碑,帶動整個的士行業邁進資訊新年代。

此外科浪國際主席更揚言將「TAXI4U」推展至國內城市,由於國內即將舉行多個國際大型項目如2010年世界博覽會、2012年亞運會等,科浪國際期待抓緊咁龐大嘅市場商機。

現時,「TAXI4U」已獲得香港的士集團有限公司嘅支持,早前已就TAXI4U服務進行測試,的士團體對效果感到非常滿意,唔但只可以協助加強營運效率,更重要係可以提升業界服務水平及專業形象,對香港市民及遊客提供更快捷可靠嘅服務。

經營模式及牌照[編輯]

的士車行(1)
的士車行(2)

大部分的士係獨立個人擁有及經營,但亦有一啲的士係由的士公司(的士車行)擁有,由司機租用或者請司機營運。每架的士配一個牌,惟近年香港政府已停發新的士牌以減少的士數量,從而減少交通擠塞及路面空氣污染情況,故此只可以喺自由市場買入牌照或者喺舊有的士取消登記時參與公開競投。因此喺供不應求下,造成牌價高企,現時一般的士牌可達700萬港元,重貴過香港唔少住宅單位價格。故此,買賣的士牌照亦成為一種投資,主因係的士牌具永久性質,兼且相比買賣物業,的士牌價值唔會隨住時間例如樓齡而受影響。

的士牌嘅轉讓手續並唔繁複,一日內就可以辦理轉名文件手續以及交易,更同物業買賣一樣可以進行按揭,因而亦同利率走勢嘅變化緊扣。近年嚟,更有唔少中國內地公司睇中的士牌嘅投資潛力而進行炒賣活動。各種因素促使的士牌照價格年年遞升,屢創新高,同時造成唔少司機只能租車營業,而做唔成持牌車主。

安全[編輯]

據政府統計數字,1996-2000年每年交通意外宗數水平約為3200宗,至2002年遞升至3617宗。

乘客安全[編輯]

鑑於私家車同埋的士交通意外頻生,政府於是喺1983年1月1號起立法規定,私家車同埋的士司機旁邊前座位置都要扣安全帶。2001年1月1號,條例擴展至的士後座乘客。[11]

司機安全[編輯]

香港的士車廂內普遍不設前後座之間嘅透明隔板或者欄,以致的士司機遇劫時有發生,甚至劫殺亦發生過。1995年元朗區一宗新界的士司機被劫殺案件發生後,政府曾試驗喺部分新界的士前排座位上加裝防護網,以保障司機安全,但最後全部拆晒。

其他[編輯]

  • 罷/慢駛事件
  • 的士台
  • 禮貌司機選舉+旅遊業
  • 優質的士服務研討會[7]
  • 香港的士服務標準計劃
  • 的士聯合報失服務中心
  • 語言+操英語、普通話
  • 車身廣告
  • 電台

工會及的士團體[編輯]

未來發展[編輯]

  • 全球定位系統

圖片集[編輯]

參考[編輯]

  1. 運輸署-2005交通統計年報 (英文)
  2. 《香港便覽》 - 交通,政府新聞處,2006年3月
  3. 噉係由於青嶼幹線馬灣出口嘅道路管制所致,有關道路管制只係畀市區的士喺夜晚23:00至朝早7:00用嗰個出口前往馬灣。
  4. 道路交通(車輛登記及領牌)規例 - 新界及大嶼山的士的許可地區,《香港法例》,2006年12月1號
  5. 新界的士七月擴經營範圍,《香港政府新聞網》,2005年4月29號
  6. 新界的士團體不滿未能進入博覽館範圍經營,《香港電台》,2005年12月21號
  7. 7.0 7.1 7.2 《運輸署年報-2005》
  8. 1995至2005年按交通工具分類平均每日乘客人次(千次),《2006運輸資料年報》,香港運輸署
  9. http://www.td.gov.hk/mini_site/annualdigest05/chi/ch8/ch8.html
  10. 行政長官致辭全文,《香港政府新聞公報》,2002年7月3日
  11. 兩點式帶不護上半身,《太陽報》,2006年9月24號

政府資料[編輯]

其他資料[編輯]

睇埋[編輯]

出面網頁[編輯]