香港銀紙
香港銀紙，又叫香港紙幣，係港元其中一種形式。截至2006年，香港流通紙幣有$10、$20、$50、$100、$500及$1000。
歷史[編輯]
香港最初嘅銀紙係由1845年喺香港成立嘅東藩滙理銀行出。喺1935年政府通過貨幣條例以前，好多銀行都有出銀紙，但呢啲銀紙主要作商業上嘅交易。政府只接受部分特許銀行嘅銀紙為合法通貨。1935年以後，政府授權香港上海滙豐銀行、有利銀行（其後俾滙豐收購）同埋印度新金山中國渣打銀行（1956年改名香港渣打銀行）出5蚊以上嘅港紙。而面值1蚊及以下嘅港紙就由香港政府出（政府曾短暫印製1仙、5仙同埋10仙（1毫），以補充市面銀仔唔夠）。
1960年香港政府唔再出一蚊紙，另外由1959年開始，滙豐同埋渣打嘅鈔票面積縮細。1974年有利銀行唔再出100蚊紙，至此香港發鈔銀行得番兩間。而香港政府喺1976年出5蚊銀之後，兩間銀行唔再出5蚊紙。1985年開始兩間銀行嘅鈔票面積再度縮細，「大棉胎」鈔票唔再存在。1993年滙豐同埋渣打為配合香港主權移交，更改鈔票式樣，取消帶有殖民地色彩嘅設計。另外政府亦宣佈出10蚊銀，香港上海滙豐銀行自此冇再出10蚊紙，而渣打銀行亦喺1995年後唔再出10蚊紙。後來，1994年中國銀行香港分行（家下中銀香港）亦成為香港其中一間發鈔銀行。
政府原本諗住用10蚊銀取代10蚊紙，但市民對10蚊紙嘅需求重係好高：一來因為10蚊銀好重，二來每逢過農曆新年之時，唔少人都鍾意用新銀紙封利是，而為免俾人覺得寒酸，好多人都只會入銀紙而唔入銀仔入利是封。加上，自從亞洲金融風暴爆發，香港經濟每況愈下，唔少市民要求政府出返10蚊紙。另一方面，亦由於10蚊銀好易俾人偽造，喺推出後幾年間政府同埋銀行都收到唔少假銀仔，當中更不乏大量生產個案。於是政府自2002年起，再次由香港金融管理局出10蚊紙，但另一方面，香港上海滙豐銀行同埋渣打銀行唔再出10蚊紙之後，開始大量發行20蚊紙。現時以鈔票冧巴計，20蚊紙發行量最多，其次係100蚊紙。
政府喺1995年之前出過1仙銀紙，目的係為方便找贖同埋用嚟畀公共服務賬單嘅仙額。呢啲銀紙自1995年10月1號起停用。
2007年7月8號，金融管理局出10蚊塑膠銀紙，係香港首次出膠銀紙。
發鈔銀行[編輯]
政府透過香港金融管理局授權3間商業銀行喺香港出銀紙，分別係中國銀行 (香港) 有限公司、香港上海滙豐銀行有限公司及渣打銀行。而2002年推出嘅10蚊紙同埋2007年推出嘅10蚊膠銀紙係由政府香港金融管理局出。
印[編輯]
金管局喺1996年4月代表政府從英國De La Rue集團購入位於大埔嘅印鈔廠，該廠隨即以「香港印鈔」呢個名經營業務。香港印鈔有限公司由香港金融管理局總裁擔任主席。政府繼續係香港印鈔嘅大股東，有用控制權。
防偽特徵[編輯]
- 紙：銀紙用純棉紙印，紫外光燈照住都唔反光。
- 水印：水印係喺造紙過程中形成，由銀紙任何一面都睇得到水印。水印有唔同嘅光暗度，圖像非常清晰，但喺紫外光燈照射下，水印唔會顯現。
- 金屬線：銀紙夾有由上而下嘅金屬線，由銀紙任何一面都睇得到。
- 透視標記：攞起銀紙背光睇，會發現銀紙兩面嘅特別設計彩色圖形完全重疊一致。
- 凹板印刷：銀紙嘅主體圖案以凹板印刷技術印製，喺印刷過程中將大量油墨留喺張紙度，令銀紙有凹凸感，而且層次分明，線條清晰。