馬力 (立法會議員)
呢篇文章講嘅係已故香港立法會議員、原民建聯主席，港區人大馬力。想搵馬力嘅第啲意思，睇下「馬力 (搞清楚)」。
| 馬力 (立法會議員) | |
|---|---|
| 生 | {{{生}}} |
| 職 | 香港立法會議員、 香港區全國人民代表大會代表、 民建聯主席 |
馬力，GBS，JP（MA Lik；1952年2月23號—2007年8月8號），做過香港立法會議員、中華人民共和國全國人民代表大會嘅香港代表，民建聯主席。
目錄 |
[編輯] 屋企
祖籍福建廈門，廣東廣州出世，馬力喺1962年俾屋企人帶去香港定居。由廈門來港後，馬力自小成長嘅地方係福建人聚居嘅北角區。同大部分移民一樣，馬力初來港時只識講福建話，連一句廣東話也唔識。
[編輯] 事業
馬力入讀培僑小學，響培僑中學讀書時，佢曾經係民建聯前主席曾鈺成嘅學生。馬力響接受訪問時曾表示，響培僑讀書期間令佢培養出「服務社會及服務國家」嘅信念。馬力培僑中學畢業之後、最初留喺母校培僑教書，1974年考入香港中文大學中文系（聯合書院）。佢做過培僑中學嘅先生。
1985年到1990年間，入讀港大中文系研究院。馬力響讀書時期經中大教授馬蒙引薦，加入咗「中國語文學會」，從而認識前新華社香港分社秘書長毛鈞年，其後毛鈞年成為馬力從政嘅關鍵人物。
1980年代係馬力從政嘅轉捩點。1985年，前新華社香港分社秘書長毛鈞年推薦馬力出任《基本法》諮詢委員會秘書處副秘書長（當時馬力得33歲，佢同現任中央政策組顧問邵善波同為副秘書長，梁振英係秘書長。邵同馬都係全職，梁只係兼職）。馬力多年後接受傳媒訪問時曾經話，出任副秘書長令佢廣結政界人脈。「香港大部分從政人物都是自八五年《基本法》草委及諮委成立後走出來，這些人我全部都認識，十分清楚他們的想法。」[1]
馬力曾經響香港多份報章撰寫專欄。辛維思係佢響1980年代中英談判時響《明報》使用嘅筆名，取意「新思維」。當初傳媒曾經懷疑佢嘅稿件係新華社嘅特稿，直至馬力後來出任民建聯主席，呢個秘密先得以公開。[2]
自1991年後做埋《香港商報》副社長。[3]2005年，佢獲特區政府頒發金紫荊勳章。[4]
[編輯] 參選
馬力係民建聯創會會員，響接替為2003年區議會選舉選舉失利負責而辭職嘅曾鈺成之前，佢一直係民建聯嘅秘書長，擔當文膽同司爺嘅角色，統籌選舉事務。
2004年，佢夥拍蔡素玉等代表民建聯合組名單出選2004年香港立法會選舉港島區議席。報名參選無耐佢就發現自己生結腸癌，選舉期間未能出席公眾活動。最後兩人獲選做香港立法會議員，以些微票數擊敗前綫嘅何秀蘭。經過一輪治療，馬力病情好轉。
[編輯] 病逝
2006年3月起，馬力病情出現反覆，不時需要做各種治療。2007年中，馬力結腸癌復發，留院治療，期間中央同廣東省領導、香港特區政府主要官員都曾經親自到醫院探佢。後來因癌細胞擴散至全身，重引起呼吸及循環系統衰竭，響2007年8月8日下晝兩點響廣州中山大學（原中山醫科大學）附屬腫瘤醫院病逝，享年55歲，[5][6][7][8]佢係香港特區1997年7月1日成立後首位響任內逝世嘅立法會議員。佢嘅議席遺缺將會由立法會補選產生補上。
[編輯] 著作言論
[編輯] 文學研究
佢本身係文學研究出身，曾研讀《楊家將》寫碩士論文，重對《紅樓夢》有研究，曾經同梅節合著紅學研究書籍《紅學耦耕集》[9]，係香港少數嘅「紅學專家」。
[編輯] 政論文章
響1986至1987年間，馬力以筆名「辛維思」發表近百篇闡析《基本法》嘅文章。馬力經常在報章上撰文，全盛時期在報章上有六、七個專欄之多，不時同政見不同者打筆戰。佢話自己欒在其中：「早期我的文章都會有新觀點，希望自己的創見、觀點、立場可以引起思考、論爭。以前和別人筆戰，不會怕什麼，幾長都無所謂，受人家圍攻，我睇人家寫乜，照砌番轉頭……」大公網：辛思維與紅學專家
[編輯] 肉餅論爭議
馬力響2007年5月15號同傳媒茶敘嗰時發表有關六四事件嘅言論引起社會好大迴響。[10]呢番言論引起極大爭議，《蘋果日報》、《明報》、《南華早報》響5月16日第二日都放響頭版報導。支聯會主席司徒華、民主黨主席何俊仁、曾經因為帶著香港人捐款去北京而被捕嘅李卓人、學運領袖王丹、港區人大代表李鵬飛等人都譴責馬力嘅言論。[10][11][12]馬力響5月16號向記者承認之前所用嘅例子太過輕挑，又話願意收回部分字眼，但無意收回觀點同道歉。[13]
2007年，有首《福佳始終有你》，改編自香港特別行政區成立十周年紀念主題曲《始終有你》，諷刺馬力。
[編輯] 影響
馬力擔任民建聯主席期間推行年輕化政策，提出「內強質素，外樹形像」方針，響2004年帶領民建聯贏取11個立法會議席，成為立法會第一大黨。2005年4月，佢又成功促成民建聯同親建制政黨港進聯合併，改名「民主建港協進聯盟」，簡稱仍叫民建聯。佢又推動向跨階層吸納黨員，令黨員人數急增，超過一萬，令民建聯成為香港第一個「萬人黨」。[14]
死後留下立法會議位空缺，間接導致泛民主派訂出初選協調機制，以選出代表參選。
[編輯] 注
- ↑ 大公網：馬力幕後到台前打造萬人黨
- ↑ 頭條網：左派明星殞落 馬力病逝
- ↑ 《香港特區名人錄》，第294頁，ISBN 62-8017-128
- ↑ 大公網：馬力生平簡介
- ↑ 馬力病重期間 中央及廣東省領導人曾探望，香港電台，2007年8月8日
- ↑ 民建聯：主席馬力下午兩時病逝，香港電台，2007年8月8日
- ↑ 左派明星殞落 馬力病逝，頭條日報，2007年8月8日
- ↑ 馬力終年55歲 04年患結腸癌， 香港電台, 2007年8月8日
- ↑ http://www.jointpublishing.com/jpcbook/bookdetail.asp?isbn=962-04-0597-8 《紅學耦耕集》
- ↑ 10.0 10.1 馬力冷血 否定六四坦克壓人變肉餅，蘋果日報，2007年5月16日
- ↑ 關於香港馬力侮辱六四死難者答記者問，王丹，2007年5月16日
- ↑ 李鵬飛勸馬力辭職
- ↑ 馬力承認用例子輕率輕挑，明報，2007年5月16日
- ↑ 大公網：馬力幕後到台前打造萬人黨
[編輯] 出面網頁
| 前任： 曾鈺成 |
民建聯主席 2003年—2007年 |
繼任： 譚耀宗 |
