姬息姑

姬息姑（—前711年）係西周魯國君主，即係魯侯，前721年到711年在位，死後謚號隱公，所以又叫魯隱公。佢老頭係魯侯姬弗涅，佢攝政於佢出身好啲嘅細佬姬允，最後畀人刺殺而死。

屋企[編輯]

姬息姑係姬弗涅（謚惠公）個仔。佢阿媽係聲子。

姬弗涅正室係宋國嫁過來嘅孟子。但孟子死，姬弗涅就搵陪嫁親戚嘅聲子就填房。姬弗涅同聲子就生咗姬息姑。後尾姬弗涅娶咗宋國君主子司空（謚武公）嘅女仲子做妾，生咗姬允（謚桓公）。因為仲子出身嘅地位比聲子高，所以按例，姬允係將來嘅魯侯。之後，姬弗涅死，因為姬允年紀太細，國人就揀姬息姑攝位。

姬息姑公元前721年正月接位，雖然《春秋》寫嘅係春天，但實情周正比家下夏正早一個月，所以係冬天。雖然接位，但覺得個位始終係細佬嘅，打算到佢大個就畀返個位佢。

公子翬（《左傳》寫羽父，《史記》秦本紀寫公子翬）見姬息姑係攝政，遲早還位畀姬允。於是乎，翬提出殺死姬允，求佢畀個太宰佢做。之但係，姬息姑斷然拒絶。姬息姑重話佢一定會還位，而且經已喺菟裘起屋，打算響嗰處終老。

翬聽到咁就好驚，如果將來姬允就位，知道咗佢做過啲咁事，可能會秋後算賬。於是乎把心一橫，走去姬允度，話姬息姑有意害佢，請求姬允畀佢殺姬息姑，姬允就當然應承。

翬就密謀殺姬息姑。姬息姑後生時，重係公子嗰陣，就同鄭國響狐壤打仗，因此畀鄭國俘虜。鄭國困（讀溫陰戈去）響尹氏嗰度。後尾佢哋賄賂尹氏，拜尹氏主人鍾巫，咁尹氏先至於咗佢。姬息姑回國後就立館畀鍾巫。每逢十一月就去拜，而間館由寪氏睇住。

翬就趁呢個機會，響公元前711年，十一月，壬辰日，派人暗殺姬息姑，嫁禍畀寪氏，即刻立由姬允繼位。寪氏因為咁而死咗啲人。

姬息姑當政期間，魯國國力較強。除咗到棠地觀魚，畀當時人認為不合於禮之外，處理政事、軍事都比較謹慎公正，亦同鄰國修好，所以周圍小國如滕、薛等國，都到魯國朝拜。佢同鄭國、齊國等強國亦都結好。

《春秋》呢本書，以姬息姑登位做開始嘅年份。

《春秋》記隱公三年春，周王二月，己巳日有日食。按額我畧曆計，應該係公元前719年2月14號，唐曆三月己巳日。響日出時分所見。

謚號隱，來自【隱拂不成】，即係好慘咁畀人掃走，唔成功咁意思。因為魯只係一個侯國，叫公只不過係尊稱，唔係公爵咁解。

呢篇同中國人相關係楔位文。歡迎幫維基百科擴寫佢。

呢篇姬息姑係一篇關於歷史嘅楔位文章。你可以編輯呢一版嚟充實內容。