黑社會 (電影)

出自維基百科,自由嘅百科全書
跳去: 定向搵嘢
經過重新組合嘅《黑社會》電影介紹圖片

黑社會》係喺2005年出嘅香港電影之一,呢套戲亦係喺康城影展參加過競賽嘅作品。續集係《黑社會2:以和為貴》。

電影資料[編輯]

制作[編輯]

劇情大綱[編輯]

故事背景係講述香港黑社會一啲內部爭鬥嘅事,當中圍繞住好多唔同嘅人,關係亦千絲萬縷,所以角色人數亦特別多;而且當中混雜好多黑社會嘅背語(即係暗示語)同埋所謂家法嘅場面,令套戲嘅真實感覺更強。

幫會「和聯勝」每兩年就要再選一個新嘅辦事人(最高統帥),今年又係選舉嘅時候,有兩個最有實力嘅地區老大企出嚟參選,佢哋為咗呢次選舉各自招兵買馬,四出拉隴社團叔父同埋其他地區嘅話事人支持。同一時間,警方已經嚴密監視呢次幫會選舉嘅動靜,知道當中一定會有問題發生。

阿樂係幫會喺佐敦區嘅話事人,為人內冷外熱,係一個冷靜溫和嘅人,不過如果招惹到佢嘅話,可以心狠手辣到得人驚,有一個好愛o錫嘅仔;大D就係荃灣嘅揸弗人,聲大氣粗,外內都係一樣咁冷酷無情,邊個得罪佢嘅話就預咗冇好下場,佢老婆主要就幫佢手睇住盤生意。

幫會班叔父之中,除咗寸爆同一兩個叔父之外,其餘嘅人都傾向選阿樂,而輩份最高嘅叔父鄧伯亦企喺阿樂嗰邊,所以喺叔父輩嘅投票之中,阿樂以大票數勝出,當選為下一任嘅「和聯勝」龍頭大哥。不過幫會龍頭一定要有龍頭棍嚟做信物,龍頭棍就係幫會嘅團結象徵,每一任龍頭大哥都好好咁保管,唔係嘅話幫會好可能出現混亂。鄧伯叫阿樂去搵現任幫會龍頭吹雞攞支棍準備接任,但係俾大D截糊搵咗吹雞,重恐嚇佢唔好交支龍頭棍出嚟;吹雞兩頭唔到岸,唯有叫手下四眼明去廣州攞返支棍之後收埋唔好拎出嚟,睇定個形勢再算。

吹雞去酒樓見大D,勸佢唔好搞事,大D於是發難要打佢;同一時間,警方正式大舉出動,拉咗「和聯勝」一眾大哥返差館問話,包括鄧伯、阿樂同埋大D,而吹雞就喺俾警察拉嘅時候,為咗唔想俾大D追打而衝咗出馬路,俾橫過嘅車輾到重傷。

一班大哥被困喺差館嘅羈留所度,總督察許SIR就搵咗三個叔父傾計,要佢哋平息阿樂同大D之間嘅不和,唔想江湖多事;當阿寸爆入去羈留室勸大D,大D居然揚言要搞個「新和聯勝」嚟同將會由阿樂掌旗嘅「和聯勝」抗衡;後來警方再安排鄧伯入去同大D傾,希望搵個大嘅可以拆掂單嘢,點知大D直認不諱話想另起爐灶,重即場同鄧伯反面,正式向阿樂宣戰。

另一邊廂,阿樂嘅軍師師爺蘇同埋得力助手大頭一齊搵返俾人綁咗去嘅四眼明, 重搵返支龍頭棍,於是大頭就帶住支棍走先,師爺蘇就留低應付殺到嚟嘅公安。大頭拎住碌龍頭棍搭跨境貨車返香港,而東莞仔就受咗老大命令聯同大D嘅頭號馬仔一齊去兜截大頭;路上個貨車司機藉詞去廁所停低車走咗去,大頭覺得唔對路,即刻落車逃走,點知都俾東莞仔追到,重打咗大頭一身要佢交支龍頭棍出嚟;後來東莞仔個老大再打電話話大頭先係自己人,叫東莞仔拎返支龍頭棍返去交畀幫會殺手飛機,再轉交畀阿樂嘅手下火牛。

當東莞仔保住支龍頭棍揸車返市區途中,Jimmy 仔喺後面跟住想幫阿樂拎返支棍,東莞仔誤會以為佢係大D嘅人,叫飛機出嚟阻止佢嘅跟蹤,但其實Jimmy仔只係想幫佢老大龍根報仇,因為龍根喺選舉上面左右不定,最後俾大D糟質到不似人形。正當飛機接過龍頭棍想搵火牛嘅時候,原來一早已經有人喺度恭候,而落車嘅正係大D嘅頭馬長毛,佢哋挾持咗火牛,要飛機交支龍頭棍出嚟;當飛機一夫當關想救火牛之際,Jimmy仔從後出現,兩個夾手夾腳打走班打手救走火牛,不過飛機就俾人斬到重傷要入醫院。因為傳送龍頭棍有功,後來支棍交到阿樂手上之後,阿樂就認咗Jimmy仔、東莞仔、師爺蘇、大頭、飛機呢幾個立功嘅功臣做契仔

阿樂重喺羈留室嘅時候,知道重傷嘅吹雞為咗甩身想爆大D嘅罪証畀警方,覺得呢個係拉隴大D嘅好機會,於是搵人搞掂咗吹雞,而阿樂喺放咗出去之後重幫手保釋埋大D;喺架車度,兩個人終於傾掂數以後有錢齊齊搵,喺關二哥面前重新斬雞頭燒黃紙再次結義,從此阿樂同大D就攜手合作,重聯手殺死尖沙咀最大勢力嘅老大恐龍,正式搶埋尖沙咀嘅生意。

一日,阿樂同個仔約埋大D兩公婆去郊遊釣魚,傾傾吓大D提出新意見,但係呢個意見就令到阿樂好唔滿意,跟住發難將大D兩公婆殺死,埋咗兩條屍之後就揸車離開……

主要出場人物同埋演出者[編輯]

  • 林懷樂(阿樂):任達華
  • 大D:梁家輝
  • Jimmy仔:古天樂
  • 飛機:張家輝
  • 大頭:林雪
  • 師爺蘇:張兆輝
  • 東莞仔:林家棟
  • 雷太(大D老婆):邵美琪
  • 許SIR:姜大衛
  • 鄧威(鄧伯):王天林
  • 徐添(寸爆):譚炳文

出面網頁[編輯]