2013年香港國際貨櫃碼頭工潮

2013年葵青貨櫃碼頭工潮遊行

2013年香港國際貨櫃碼頭貨櫃碼頭工潮係指由香港國際貨櫃碼頭外判工人喺2013年3月28號發起嘅一場工業行動。

背景

2012年9月底，有碼頭工友喺Facebook開設「碼頭的辛酸」專頁，希望畀公眾了解貨櫃碼頭不為人知嘅情況，透過分享工作期間嘅圖片，展示工友嘅待遇同埋環境好惡劣，意外成日發生。

2013年1月，《蘋果日報》屬下嘅《爽報》記者喺碼頭員工嘅協助底下，一連潛入碼頭禁區七日做暗訪，直擊貨運工作情況。報道表示：七日之內，各種撞車、貨櫃倒冧意外，幾乎日日上演。負責吊貨櫃嘅起重機工人，工作環境特別惡劣，唔單止要喺68英尺（20.73米）高嘅駕駛艙裡面連續開工12個鐘頭，重連食晏都要喺高空一邊開工一邊食，但係賺到嘅一份收入就好微薄。報道亦都表示：香港國際貨櫃碼頭公司為咗增加收入減低開支，將大部份吊機操作及貨櫃司機工種外判咗出去，最多去到三重外判。一直為工人爭取權益嘅職工盟表示：曾經發過信畀貨櫃碼頭業管理層，要求改善員工待遇，但係得唔到任何重視。職工盟香港碼頭職工會組織幹事何偉航話：為碼頭工人向外判公司爭取福利極之困難。

參與罷工嘅碼頭工友分別受僱於4間分判商：「培記」、「高寶」、「聯榮」及「永豐」。

主要人物

• 嚴磊輝（香港國際貨櫃碼頭公司董事總經理）
• 李卓人（香港立法會議員／香港職工會聯盟秘書長）
• 何偉航（香港碼頭業職工會總幹事）

事件經過

高寶執笠

4月18號，高寶宣布決定6月底結業。