Billie Holiday

Billie Holiday(1915年 4月7號—1959年 7月17號)外號 Lady Day(婦女節，亦有人譯做淑女黛小姐)，係一個美國爵士樂歌手，喺爵士樂介一個好有盛名嘅爵士樂歌后。佢有個標誌就係佢成日帶朵花喺頭髮度。

[編輯] 生平

Billie Holiday喺1915年 4月7號美國馬里籣州巴爾的摩出世，佢老竇 Clarence Holiday 係一個結他手，喺十幾歲嗰陣唔小心搞大咗人個肚而生咗Billie Holiday，Billie一直由佢亞媽湊大，同佢老竇關係唔係咁好。

Billie 11歲嗰年曾經畀人強姦，15歲嗰年開始賣淫，直到18歲開始喺一間酒店仔駐唱，結束咗佢賣淫生涯。就係喺駐唱期間識咗佢音樂上嘅好拍檔 Benny Goodman，喺 Benny 穿針引線之下，喺唱片公司錄咗幾隻歌，就咁開始咗佢音樂事業。

1939年佢翻唱《Strange Fruit》(奇異果實)，係一首關於反對種族歧視嘅歌，係講美國南部私刑嘅情況，結果引嚟好多白人知識份子同自由主義者支持，個個做晒佢歌迷。

不過喺佢嗰個年代，黑人喺美國都係受種族歧視，Billie Holiday係一個黑人女性，雖然佢嘅才藝受到認同，但好多地方都因為佢係黑人而唔畀佢表演，遇到呢啲情況，就搵到個叫 Helen Forrest 嘅白人女藝人，用同Billie Holiday一式一樣嘅風格代替佢表演，仲好受歡迎。

喺嗰個年代，爵士樂壇亦好興吸毒，Billie Holiday嘅感情生活亦過得唔太好，佢成日都畀男友毆打，於是佢開始吸毒同飲酒，最後喺佢44歲嗰年因為心臟問題而過身。