GAG

Gag 係一個演講術語，即係話喺演講入面，加一啲令人印象深刻嘅嘢入去，例如係一個笑話咁，等啲人聽嘢聽得過癮啲，即係廣東話所謂搞 GAG，就係呢樣嘢。

台灣人將 GAG 跟音譯做「梗」，有所謂「鋪梗」，即係喺一個演溝入面安排嘅合乎演講內容，又聽得生鬼過癮嘅元素。

藝能界亦有用 GAG，喺一啲電影或者電視綜藝節目入面會利用 GAG 去制造效果，有啲 GAG 完全無效果會叫做「爛 gag」，台灣叫「爛梗」，或者一啲用到冇人用嘅舊 GAG 就叫做「老梗」。

爛gag

爛 gag泛指一啲唔好笑嘅笑話。通常有人搞爛gag後一般聽眾嘅反應係O嘴、dead air（冷場，亦叫死空氣，即係要送啲空氣去急症室喇），更甚嘅話搞gag者有可能被鄙視、俾人話「好煩」或者「好爛」。如果一個人搞爛gag太多亦有可能被封為「gag王」或「gag后」（「gag后」個拍擋就當然係「gag前」啦）。「爛 gag」又可以叫做「yuy」，因為當「gag」無咗上半部，亦即係爛咗嘅時候就變成「yuy」喇。呢個本身亦係一個爛gag。

Gag有好多唔同既種類，例如食字（即係利用字嘅諧音嚟搞gag，例如：A:你蝦人嘅… B:我無蝦人呀，我炒蛋之嘛－「蝦仁」係「蝦人」嘅諧音，因而產生「蝦仁炒蛋」呢個爛gag），又或者可以食情景。

搞gag需要豐富嘅想像力，聯想力同勇氣，腦嘅轉數亦要夠快先可以喺短時間內食字。現時係廣泛嘅即興活動之一，喺年輕一輩中特別流行。

Universal gag

Universal gag係指一啲非常普遍、大部分人都聽過、而且經常被重覆，聽到已經唔再識笑嘅gag。例子包括：

• 我的普通話很普通（用普通話讀出，經常喺同大陸人初次見面中用到）

參考

• GagNotes