Ikariam係一個德國開發嘅免費、以網頁為本嘅 MMOG 戰略遊戲。玩家淨係需要提供一個電郵地址、同自己改一個名，就可以開始遊戲。
玩家可以喺Ikariam 入面同數以千計嘅其他玩家溝通，控制自己嘅村莊同人民走向光榮同埋勝利。喺遊戲入面，玩家會扮演一個國家嘅國王或者皇后，同其他玩家進行一場資源爭奪戰。遊戲係24小時都喺度行緊嘅，就算玩家登出咗，村落仍然會自動採集資源同埋執行玩家登出前落嘅攻擊指令、甚至乎有可能俾其他玩家攻擊。
