Mayday

出自維基百科,自由嘅百科全書
跳去: 定向搵嘢

Mayday」(萬國音標:/ˈmeɪdeɪ/)係無線電求救信號裏面最緊急嘅一個信號。當一隻船或者一架飛機發出「Mayday」訊號嘅時候,即係話如果唔即刻採取行動,就會有人命傷亡。宜家,警察同消防員有時都會用「Mayday」表示需要馬上支援。

來源[編輯]

目前最多人接受嘅講法係:「Mayday」來自法文「Venez m'aider!」(「來幫我!」)入面嘅「m'aider」(法文發音:/mɛˈde/),係英國倫敦古萊頓機場(Croydon Airport)嘅高級無線電通訊員費德歷•史丹利•莫霍德(Frederick Stanley Mockford)喺1923年首先使用嘅。當時,機場空管要求莫霍德創造一個畀機師同埋地勤用來緊急求救嘅詞,要簡單明瞭。由於當時大部份飛機都係來往倫敦同法國巴黎嘅,因此莫霍德就用咗來自法文嘅「Mayday」。

使用[編輯]

由於Mayday訊號嘅嚴重性,祇有嚴重事故,例如着火、爆炸、(船)下沉、燃料耗盡等等,對機/船上人員構成即時生命威脅,而且駕駛員無辦法自救嘅時候,先至可以發Mayday訊號。發虛假求救訊號唔單止浪費資源,重可能延誤真正有需要嘅救援,所以喺好多地方都係刑事罪行。而另一方面,由於Mayday訊號嘅嚴重性,如果一隻船或者一架飛機發出Mayday訊號,其他船/飛機就要全部避讓,畀出事船隻先緊急靠岸,或者畀出事飛機緊急降落。唔避讓係違反國際民航規則嘅行為。

Mayday訊號喺任何頻道都可以被人聽明,但係大部份航空或海事搜救組織都有人24小時監聽緊急頻道。

發出「Mayday」訊號嘅時候,一定要重復「Mayday」三次,然後根據以下格式來講明緊急狀況:

Mayday!Mayday!Mayday!(航管中心代號)(航班代號同埋飛機/船隻型號)We're declaring an emergency!(描述緊急狀況)(描述駕駛員意圖)

例子[1]

Mayday! Mayday! Mayday! Canton Tower, this is WikiAir 009. We're declaring an emergency! We have only 6 minutes of fuel remaining on board! Requesting emergency landing at Canton Airport!

根據唔同緊急狀況嘅需要,控制中心重會要求駕駛員提供以下資料:

  • 乘客人數以及傷亡狀況
  • 宜家嘅位置/上一次定位嘅位置同埋航向
  • 飛行高度
  • 剩返幾多燃料
  • 其他有用嘅資訊

接力求救[編輯]

一隻船因為某啲原因發唔到Mayday訊號嘅話,可以通過其他方式(例如煙花)求救。其他船或者飛機如果見到一隻船放煙花求救,應該馬上呼叫通知控制中心。如果喺無線電裏面聽到一部船或者一架飛機發Mayday訊號,但係控制中心過咗兩分鐘都未回應嘅話,應該嘗試代為呼叫控制中心。

無線電靜默[編輯]

控制中心或者搜救機構收到Mayday訊號之後,可以用「Silence, Mayday.」(根據國際規則,「silence」要用法文發音/siˈlɑ̃s/;意思係「靜默,收到Mayday求救訊號」)或者「Silence, détresse.」(法文發音/siˈlɑ̃s deˈtʀɛs/,意思係「靜默,收到緊急求救訊號」)。</ref>要求無線電靜默。喺無線電靜默期間,祇有搜救機構同出事船隻/航班可以用伊個頻道通話,其他船或者飛機要轉用其他頻道,直到控制中心或者搜救機構宣佈「Silence finit.」(法文發音/siˈlɑ̃s fiˈni/;意思係「靜默結束」)。

[編輯]

  1. 國際航管嘅通用語言係英文,所以例子都要用英文。伊句話嘅意思係:「緊急求救!緊急求救!緊急求救!廣州控制中心,我係維基航空009號航班。宣佈進入緊急狀態!我等宜家剩返最後6分鐘嘅燃料!請求緊急降落廣州機場!」

睇埋[編輯]