天王星

天王星

天王星係距離太陽第七遠嘅行星。佢個名來自拉丁文Uranus（萬國音標：/jəˈreɪnəs/ or /ˈjurənəs/）。佢屬於木星型行星，直徑來講排第三，而質量來講排第四，佢嘅自轉軸可以話係瞓響軌道平面上，傾斜嘅角度高達97.77°，目前佢有27粒衛星。

天王星每84年公轉1次。大氣層有揮發性物質，主要有水、阿摩尼亞同埋甲烷；而核心主要係岩石同埋冰。

衛星

天王星總共有27個衛星，由內到外排列分別係天衛六（Cordelia）、天衛七（Ophelia）、天衛八（Bianca）、天衛九（Cressida）、天衛十（Desdemona）、天衛十一（Juliet）、天衛十二（Portia）、天衛十三（Rosalind）、天衛二十七（Cupid）、天衛十四（Belinda）、天衛二十五（Perdita）、天衛十五（Puck）、天衛二十六（Mab）、天衛五（Miranda）、天衛一（Ariel）、天衛二（Umbriel）、天衛三（Titania）、天衛四（Oberon）、天衛二十二（Francisco）、天衛十六（Caliban）、天衛二十（Stephano）、天衛二十一（Trinculo）、天衛十七（Sycorax）、天衛二十三（Margaret）、天衛十八（Prospero）、天衛十九（Setebos）同天衛二十四（Ferdinand）。

天王星嘅衛星可以分為3大類：

天衛五、天衛一、天衛二、天衛三同天衛四嘅體積比較

1. 主群衛星：包括天衛五、天衛一、天衛二、天衛三同天衛四，佢哋係最大嘅5粒衛星。
2. 內圈衛星：喺天衛五軌道裏面嘅13粒衛星（天衛六、天衛七、天衛八、天衛九、天衛十、天衛十一、天衛十二、天衛十三、天衛二十七、天衛十四、天衛二十五、天衛十五同天衛二十六），同光環有非常密切嘅關係。
3. 不規則衞星：喺天衛四軌道外面嘅9粒衛星（天衛二十二、天衛十六、天衛二十、天衛二十一、天衛十七、天衛二十三、天衛十八、天衛十九同天衛二十四），可能係天王星形成之後冇耐所捕獲嘅天體。

光環

天王星光環

天王星總共有13個光環，不過就比土星嘅光環暗淡好多，直至1977年，天王星喺恆星SAO 158687前面經過，粒恆星喺天王星經過前後都有變暗咗，咁佢嘅光環先至俾人發現。至於光環嘅數目要到1986年，航行者二號飛近去先至睇到。喺2005年，哈勃太空望遠鏡再搵到多2個光環。由內到外排列，天王星嘅光環分別係ζ（1986U2R）、6、5、4、α、β、η、γ、δ、λ（1986 U1R）、ε、ν（R/2003 U 2）同μ（R/2003 U 1）。

出面網頁

• Uranus Profile, NASA
• Uranus Photo Journal, JPL, NASA
• 香港太空館天王星資料
• 香港太空館「宇宙的本質」講義第九章「類木行星」