Wikipedia:投票

出自維基百科,自由嘅百科全書
(由Wikipedia:Straw polls跳轉過嚟)
呢版係篇論文;唔同政策同指引,佢只反映一啲編者嘅意見。若有需要,更新佢,又或者響討論版度傾。


維基百科有時要用到投票嚟幫手做決定。要記住,維基百科唔係民主政治。一般情況下,通過共識達成嘅決議,好過人多蝦人少(majority rule)嘅結果好多。但係有時用投票都不失為睇清唔同維基人立場嘅做法,而且重可以顯示到咩意見至係大多數人支持嘅,咁咪可以快啲達成共識。

票制[編輯]

維基百科用嘅票制有好多種,以下講吓常用嘅幾種:

共識票制[編輯]

共識票制唔係真係想用投票嚟解決問題,反而係想透過投票嚟尋求共識。投票嗰陣,開票嗰個人會喺版面頂部寫明而家投票投緊乜嘢,然後大眾就喺下面投票嘞。一人只可以投一票,呢一票可以係以下一類:

  • 贊成
  • 中立 / 棄權 / 純意見(一樣意思)
  • 反對

立場要用粗體標明。投完票一定要寫明自己投呢票嘅理由,同埋用 -- ~~~~ 簽名。例如:

  • 贊成,因為呢篇嘢文筆好好。 -- 06:27, 15 六月 2006 (UTC)

投完票你都可以改變自己嘅立場。喺咁嘅情況,原本嗰票唔好就咁完全鏟咗佢,應該用<s>橫線</s>劃咗佢,然後喺後面或者第度寫返自己嘅新立場。記住每一處有加減嘢都要簽名噃,例如:

  • 反對。佢對文章寫作嘅貢獻唔夠多。-- 09:27, 13 六月 2006 (UTC)
    支持,原來佢習慣寫好成篇文章先一次過登出嚟。-- 06:38, 15 六月 2006 (UTC)

要注意嘅係,共識票制入面,贊成票同反對票嘅比例唔係決定結果嘅絕對因素。贊成同反對兩方面提供嘅理據,先至係決定因素。故此,每個共識票制嘅投票都需要一個負責人,嚟維持投票秩序同埋做最後決定。呢個負責人有時可以投得票,有時唔得,視乎個投票嘅規矩。

共識票制通常都係用嚟決定某樣嘢做定唔做好。例如刪唔刪除一篇文章、或者用嚟選管理員。

贊成票制[編輯]

顧名思義,贊成票制就只可以投贊成票。你可能會諗:唓,淨係投得贊成票,實當選啦,投嚟把鬼?其實,贊成票制係用嚟喺一大堆候選人入面,選出最受人支持嘅一個或者幾個。同共識票制一樣,發起人要寫明今次投咩票,不過下面嘅選擇唔再係贊成或者反對,而係邊個候選人。亦因為淨係可以投贊成票,投票嗰陣就唔使寫明投贊成、反對定係中立。

贊成票制入面,投票唔一定要畀理由,簽個名就得。但係你有咩想講,都當然歡迎你留個言啦。為咗方便點票,贊成票制入面會用數字、即係半形嘅#、而唔係*嚟做點列符號。例如:

  1. 06:56, 15 六月 2006 (UTC)
  2. HenryLi 09:10, 15 六月 2006 (UTC)

贊成票制入面都可能有負責人,亦唔一定有。相比起共識票制,負責人嘅角色比較細啲,只係負責維持秩序同點票,頂多係打和嗰陣,佢嗰票會成為決定性一票。重有,贊成票制入面,一個人可以投票畀多個候選人。

贊成票制通常係喺件事一定會做、但係未決定做啲乜或者邊個做嘅時候用。

多數票制[編輯]

多數票制可以話係贊成票制嘅變種,亦可以話係維基投票最早嘅模式,所有其他投票制度都係由呢度衍生出嚟嘅。多數票制同上面講過嘅贊成票制其實一樣,都係淨係有得投贊成票,冇得投反對票;不過多數票制入面,每人只係准投一票。多數票制通常係用嚟選人,而今次選完之後就唔會再選。

投票人身份[編輯]

投票嘅時候,只有已經登入嘅用戶投嘅票先至有效嘅。匿名人士投嘅票喺點人頭嘅時候唔會算數,但係佢哋嘅意見會同其他人嘅意見一齊考慮。

睇埋[編輯]