句法學

出自維基百科，自由嘅百科全書
(由語法學跳轉過嚟)
  「句法」跳轉到呢度。想搵程式語言嘅句法，請睇「句法 (程式語言)」。
語言學系列
Portal Portal

句法學（粵拼：geoi3 faat3 hok6；英文：syntax）係語言學其中一個最重要嘅分科，專門研究語句嘅結構同規律。語句嘅基本組成部分係字詞，而一隻語言實會有一啲法則，指定字詞可以點樣組合埋一齊形成語句，當中將啲基本意思單位組合埋一齊係一樣好重要嘅特質，係非語言嘅通訊系統通常都冇嘅。

定位[編輯]

睇埋：語言學、構詞學、形態素同字詞

句法學係語言學下嘅一個學科，專門研究句子，尤其係講到字詞[註 1]點樣組合埋一齊形成句子。响 2024 年，不列顛百科全書係噉嚟形容句法嘅[1]：

句法係講緊句子、子句[e 1]以及短語[e 2]入面點樣編排字詞，亦會研究句子嘅組成以及句子啲組成部份之間嘅關係。

當中組合係一個好重要嘅關鍵字。例如想像紅綠燈，紅綠燈都係表達緊意思—紅燈表達「停車」、黃燈表示「就行得」而綠燈就表示「行得喇」，但係呢啲符號冇咩「以唔同方式組合埋一齊，意思會唔同咗」可言，所以「紅綠燈話」並唔算係一隻語言，其中一樣最重要嘅問題就係呢套通訊系統缺少咗句法[2]。

點解重要[編輯]

睇埋：複合原理同語境原則

句法學係語言學當中其中一個最重要嘅領域。首先，語言本質上就係要表達意思嘅。想像以下呢幾句粵語語句[3]：

  1. 「明仔鍾意食叉燒包。」
  2. 「明仔鍾意食辣椒。」
  3. 「叉燒包鍾意食明仔。」
  4. 「叉燒包食明仔鍾意。」

句 1 同 2 都係合乎粵語文法嘅句子，縱使佢哋「係咪合乎現實」係有得拗（例如可能明仔實際上唔鍾意食辣椒）。句 3 用咗嘅字詞同 1 完全一樣，但係字詞嘅排列方式唔同咗，意思就起咗大變化。句 4 聽落就完全唔合文法，違反晒粵語嘅正常字詞次序法則，以粵語做母語嘅人根本唔明佢噏乜[註 2]。

由上述嘅例子睇得出，喺一隻自然語言入面，同一樣嘅字詞用唔同方法組合（句法研究嘅重點），會強烈噉影響意思能唔能夠正確傳達。用技術化啲嘅詞彙講，即係話[4]：一段表達式嘅意思，係「佢啲組成部份」以及「呢啲組成部份之間嘅句法編組方式」嘅函數（複合原理[e 3]）。淨係得對字詞嘅認識，唔能夠達致正確噉理解語言。而事實亦都表明，教 AI 處理語言嗰陣設計者一定要用句法知識，先至可以教 AI 畀出正確嘅句子[5]。因此語言學研究者可以作出一個結論：句法學（作為語言學嘅一個學科）有必要存在。

大臣：皇后陛下，啲平民依家窮到連麵包都冇得食喇！

清醒正常嘅瑪麗皇后：噉呀？畀啲平民食蛋糕囉。

扻親個頭嘅瑪麗皇后：噉呀？畀啲蛋糕食平民囉。

語句概念[編輯]

内文：語句
睇埋：行間註釋

喺廿一世紀初嘅語言學上，句子（或者叫語句）可以大致界定做「有最少一隻字詞、能夠表達一個完整諗法」嘅語言單位[6]，會描述一件事件[7]。句子呢個概念成日畀人攞嚟同字詞或者形態素[e 4]比較。一種講法係可以噉樣想像：句子同形態素最大分別在於，一句句子嘅意思可以由組成佢嘅部份（形態素）推斷出嚟，但係形態素就唔得。好似以下嘅例子（呢度係講緊語音上嘅字詞，唔好諗文字住）。

  • 假想有一個以英文[註 3]做母語嘅人，佢完全唔識粵語，從來未聽過粵拼 faa1（漢字花）呢隻形態素，佢唔會有能力淨係靠聽 f 或者 aa 等嘅音素[e 5]估得出嗰嚿形態素係咩意思，最多就係靠撞。
  • 又假想有個人，佢係以粵語做母語嘅，而且佢除咗粵語之外咩語言都唔識。依家佢要學德文，啱啱學識 Ich（我）、esse（動詞指食）同埋 Käse（名詞指芝士）呢幾隻生字，噉依家叫佢聽 Ich esse den Käse 呢句德文句子係乜嘢意思——佢好大機會能夠正確噉估到句嘢嘅意思係「我食件芝士」噉解。

由上述例子可見：音素組成形態素，而字詞（一隻字詞有最少一嚿形態素）組成句子；組成一嚿形態素嘅音素，唔能夠提供「嚿形態素係乜嘢意思」嘅資訊，而組成一句句子嘅形態素同字詞，就能夠提供「句嘢係乜嘢意思」嘅資訊[8]。

字詞同句子嘅呢樣分別，亦造成兩者喺其他方面有重要嘅差異：一隻語言啲形態素意思係乜，只係有得死記（想像啲人背生字），所以是但搵一隻主流語言，隻語言入便有嘅形態素數量梗會係有限嘅；相比之下，一個人只要夠熟悉一隻語言，就能夠齋靠文法知識同埋一句句子有嘅字詞，判斷句句子嘅意思，唔需要死背隻語言入便有嘅可能句子，頂攏可能係要記「邊啲句子比較常見」噉嘅資訊，噉就表示一隻語言可以有無限咁多句[註 4]可能嘅句子[9]。

詞性概念[編輯]

内文：詞性

原則上，語句嘅基本單位唔係字詞，而係字詞嘅類型。想像以下呢句粵語句子：

「我食咗叉燒包。」

如果將句嘢入面嘅叉燒包換做（例如）三文魚、私家車或者阿明等嘅字詞，句嘢依然會係啱文法嘅——縱使我食咗私家車呢句嘢喺意思上好怪異。相比之下，如果將食換做三文魚變成三文魚咗，句嘢就會唔啱文法。由此可見，攞住一句句子，搵其中一隻字詞（x）嚟睇，都梗會响同一隻語言入便搵到一大拃字詞，就算將呢啲字詞是但一個代入去 x 個位度，句句子都仲會係啱文法嘅，同時唔同 x 屬同一類別嘅字詞如果換入去 x 個位，句嘢就會唔啱文法[10]。

於是乎，語言研究上就有咗詞性[e 6]嘅概念：隨便搵一隻語言，隻語言有嘅字詞數量閒閒哋數以萬計，但係呢啲數以萬計嘅字詞，可以按照佢哋「喺句子入便扮演乜嘢角色」[註 5]分做名詞同動詞等數量少嘅幾個類別；而語句嘅基本組成單位係詞性類別而非字詞，即係話

「我食咗叉燒包。」
「我做咗家務。」
「我上咗粵維。」

呢幾句嘢喺句法上相同，冚唪唥都可以抽象化噉想像成「[名詞]-[動詞]咗-[名詞]」嘅形式。

語句類型[編輯]

關係子句[編輯]

内文：關係子句

睇埋[編輯]

註釋[編輯]

  1. ↑ 响廿一世紀初嘅語言學界，「字詞」嘅定義有些少爭議性。詳情可以睇吓構詞同形態素方面嘅嘢。
  2. ↑ 呢度係跟描述語言學嘅觀點——以「母語使用者係點樣用隻語言嘅」做對錯嘅依歸。
  3. ↑ 或者是但一隻非粵語嘅語言
  4. ↑ 或者至少數量遠遠龐大過形態素數量。可以睇睇階乘同組合爆發嘅概念。
  5. ↑ 喺廿一世紀初嘅語言學上，詞性分類唔係按語義嚟分嘅。傳統上啲人成日諗住「名詞實係指物件，動詞實係指動作」，但係事實表明，指動作嘅字詞往往可以攞嚟做名詞。粵語例句：「跳舞好有益身心。」

歐詞[編輯]

  1. ↑ clause
  2. ↑ phrase
  3. ↑ principle of compositionality
  4. ↑ morpheme
  5. ↑ phoneme
  6. ↑ part of speech，PoS

引述[編輯]

  1. ↑ syntax. Encyclopedia Britannica，引咗嗰段："Syntax, the arrangement of words in sentences, clauses, and phrases, and the study of the formation of sentences and the relationship of their component parts."
  2. ↑ Mark R. B. Intro. to Syntax Lecture Notes. NYU Arts & Science.
  3. ↑ （香港繁體） 粵語句法學研究的原因、方法、課題 (PDF)，中國語文研究。佢哋四嗰一部份亦有提到粵語嘅詞尾。佢哋亦有略提粵語同標準中文（文法上建基於標準官話）嘅一啲分別。
  4. ↑ von Stechow, A. (2009). Syntax and semantics: an overview. Manuscript, University of Tübingen. 2. A Fregian Conception of Syntax/Semantics
  5. ↑ Parsing, C. (2009). Speech and language processing (PDF). Power Point Slides.
  6. ↑ sentence. Cambridge Dictionary.
  7. ↑ 9.2 Events, Participants, and Thematic Roles. Essentials of Linguistics. Open Library.
  8. ↑ Introduction to morphology and syntax (PDF). Cambridge University Press & Assessment.
  9. ↑ Thompson, Henry. "D. T. Langendoen and P. M. Postal, The Vastness of Natural Languages. Oxford: Basil Blackwell, 1984. Pp. Ix 189." Journal of Linguistics, vol. 22, no. 1, 1986, pp. 241-242.
  10. ↑ Koeneman, O., & Zeijlstra, H. (2017). Introducing syntax. Cambridge University Press. 1.2.1

參考書目[編輯]

  • Brown, Keith (1996). Concise Encyclopedia of Syntactic Theories. New York: Elsevier Science. ISBN 0-08-042711-1. {{cite book}}: More than one of |author=、|last= specified (help)
  • Carnie, Andrew (2006). Syntax: A Generative Introduction. Oxford: Wiley-Blackwell. ISBN 1405133848.
  • Freidin, Robert (2006). Syntax. Critical Concepts in Linguistics. New York: Routledge. ISBN 0-415-24672-5. {{cite book}}: More than one of |author=、|last= specified (help)
  • Graffi, Giorgio (2001). 200 Years of Syntax. A Critical Survey. Studies in the History of the Language Sciences 98. Amsterdam: Benjamins. ISBN 90-272-4587-8.
  • Wong, T. S., Gerdes, K., Leung, H., & Lee, J. S. (2017, September). Quantitative comparative syntax on the Cantonese-Mandarin parallel dependency treebank (PDF). In Proceedings of the fourth international conference on Dependency Linguistics (Depling 2017) (pp. 266-275)，講到粵語同標準官話喺句法上嘅幾個分別。

出面網頁[編輯]

維基同享有多媒體嘅嘢：
句法學
由「https://zh-yue.wikipedia.org/w/index.php?title=句法學&oldid=2141868」收