上海粗炒

出自維基百科,自由嘅百科全書
上海粗炒

上海粗炒係一款用咗上海地名而有港式飲食特色嘅香港炒麵,呢種炒麵喺上海幾乎都唔會搵到[1],不過流行喺香港同海外嘅中餐館,常被認為係上海菜嘅代表。

粗炒簡介[編輯]

過去喺上海,一般大小飯店都唔會有上海粗炒賣,好多上海人根本都無聽過呢款嘢食,上海粗炒只不過係「街邊嘢食」,上海最具有代表性嘅炒麵係蝦仁兩面黃。1950年代前後,大批上海人移居香港,亦將上海餐飲文化帶到香港。由於香港人並唔鍾意食煎炸嘢,所以有好多人會選擇經過本土化改良嘅上海粗炒,傳統而地道嘅兩面黃炒麵因而顯得唔受歡迎。過咗一段時間之後,上海粗炒就成為一款好常見嘅食品,代表咗香港嘅上海麵食,並由華人餐廳傳向世界各地。

用料同做法[編輯]

上海粗炒原本只係早期上海街邊嘅炒麵,帶入香港後經過咗傳播同口味改良,選用瘦肉絲椰菜等配料,加入上湯調味料翻炒。麵條就用類似烏冬嘅粗麵,蒸完再炒,令到麵條熟而唔爛,兼有少少𡁻口。

基本做法係將麵條放入水浸5分鐘後撈出,再浸入凍水,令佢口感更彈牙、有韌性,唔易斷,再瀝乾水份待用。炒鍋燒熱油後加入肉絲同切絲後嘅椰菜分別翻炒後盛起。跟住,將麵條同調味醬油加入鍋炒到水份收乾;最後將肉絲,椰菜回鍋炒勻就得。

參考[編輯]

  1. 張本厚. 海人不吃 海粗炒 (中文). 香港都市日報. 喺2011-10-30搵到.