賣豬仔

出自維基百科,自由嘅百科全書
(由下南洋跳轉過嚟)
跳去導覽 跳去搵嘢

賣豬仔粵拼maai6 zyu1 zai2)原本指由中至外嘅苦力買賣,係種奴隸貿易。啲工人雅稱華工,俗稱豬仔,主要種類有三——去美國或者加拿大嘅賒單苦力[1][2]、去拉丁美洲嘅契約華工[3],同去南洋嘅豬仔華工[4]

歷史[編輯]

「豬仔」招攬自五湖四海,以窮鄉僻壤居多,聚埋喺幾個貿易發達嘅城市道交易。「賣豬仔」檔口嘅集中地,有澳門、香港、廣州、汕頭、廈門同新加坡等[5]

澳門[編輯]

呢種生意响十九世紀中後期至二十世紀初最蓬勃,澳門係當時嘅遠東交易中心,喺聖安多尼教堂同大三巴牌坊附近,呢種舖頭林立,1866年大概有四十間,1873年有多過三百間,1856至1873年(冇計1861同1867年)間,出口嘅華工唔止十八萬。佢等自稱招工館,葡人稱之為「barracão」(譯作巴拉坑),華人叫豬仔館[6]。當時中國窮困潦倒,無數老百姓生活艱難,有好多後生壯丁,俾人販呃或者自願,賣身出埠做苦工。南粵人隨船出海之後嘅第一站落角點,多數係東南亞(故謂之曰下南洋),唔少最終去到所謂「新世界」——歐洲列強玩嗮嘅大細殖民地。

香港[編輯]

香港响十九世紀時,一度係世界主要的苦力轉運中心,政府嘅公共工程局就開咗啲打着招工館牌面,外觀似客棧,内籠同監獄無異嘅豬仔館。豬仔館有官辦同民營嘅,去到1906年式微時,都重剩返23間。喺美孚嘅饒宗頤文化館,以前係其中之一,叫「華工屯舍」,乃唯一現存嘅呢類歷史遺跡。响1851至1872年間,由香港運去美國、澳洲同東南亞嘅華工總數有32萬零人。响1861至1872年間,由香港起航嘅苦力船有426艘,英國船最多,其次係美國嘅。航運商人同中介人靠貴價賣船飛嚟弁取暴利,為咗賺到盡,重會超載同剋扣食糧飲水。旅途期間,「乘客」一路圂喺艙底,迫到密厔厔,唔夠飲,食唔足,空氣濁,缺醫乏藥,過着非人生活,死好多人。由1850至1856年,華工出洋死亡率平均係25.2%。同一時期,由香港出發到秘魯、三藩市同古巴嘅苦力船上面,先後有4次嚴重死亡事故,比率由20%至66.66%不等[7]

詞義[編輯]

簽咗賣身契之後,就會變成契約工,收到啲安家費,亦失去自由,俾人用船一批一批噉運走。有文獻記載話,佢等喺長期嘅海上航程之中,會遭到牲口式對待,尤其是喺開餐時——啲人唔一定有碗用,通常主人會用大木兜或者鐵㷛裝啲嘢食出嚟,成班就圍住踎喺道食,形同餵豬,於是就有「賣豬仔」一詞嘞。同時代,呢門生意喺中國沿海多處都有,販運路線唔同[8]

後來,「賣豬仔」又多咗引申意義——呃人糊里糊塗噉做某件事[9]、出賣自己勞力[10],同埋出賣其他人[11]

參考[編輯]

  1. borderlessmovement (2017-04-06). "美國契約華工是否奴隷". 無國界社運 Borderless movement (中文). 喺2021-06-12搵到.
  2. "由香港啟程的賒單工 - 黃杰輝 - 真証傳播 Goodnewscom". www.gnci.org.hk (英文). 喺2021-06-12搵到.
  3. "華工在拉美的數量 | 中國文化研究院 - 燦爛的中國文明". chiculture.org.hk (英文). 喺2021-06-12搵到.
  4. "「豬仔」出洋:簽下賣身契,到東南亞尋找新生活的華工們 | 故事 StoryStudio" (中文). 2016-03-06. 喺2021-06-12搵到.
  5. 李國樑 (2019-03-10). "【封面故事】在先民下南洋的浪潮,人與豬的命運被畫上了等號". The News Lens 關鍵評論網 (中文). 喺2021-06-12搵到.
  6. "鴉片與苦力貿易 - 澳門記憶". www.macaumemory.mo. 喺2021-06-11搵到.
  7. "【香港工運縱橫】從外籍傭工回顧苦力貿易". 惟工新聞 | WKNews (英文). 2014-04-29. 喺2021-06-11搵到.
  8. "林文映:賣豬仔與下南洋". www.thinkhk.com. 喺2021-06-11搵到.
  9. apps.itsc.cuhk.edu.hk https://apps.itsc.cuhk.edu.hk/hanyu/Page/Search.aspx?id=15626. 喺2021-06-11搵到. Missing or empty |title= (help)
  10. apps.itsc.cuhk.edu.hk https://apps.itsc.cuhk.edu.hk/hanyu/Page/Search.aspx?id=1435. 喺2021-06-11搵到. Missing or empty |title= (help)
  11. apps.itsc.cuhk.edu.hk https://apps.itsc.cuhk.edu.hk/hanyu/Page/Search.aspx?id=7964. 喺2021-06-11搵到. Missing or empty |title= (help)