不充分決定論

不充分決定論（參見英文：underdetermination），係科學哲學上嘅一個問題，指研究者有陣時冇足夠嘅證據嚟完全肯定決定要信乜—喺現實應用當中，人好多時都淨係有弱證據，能夠證明某啲可能性係錯誤嘅，但做唔到排除晒所有嘅可能性。

證據

内文：證據

睇埋：充分必要條件

證據係指俾人用嚟支撐一個論述嘅資訊，例如家陣有人唔見咗個銀包，A 先生指控話係 B 先生偷咗個銀包（論述；$S$），然後佢哋喺 B 先生間房嗰度搵返唔見咗嘅銀包（證據；$E$），就支撐咗 A 先生嘅論述。喺知識論（思考知識嘅哲學領域）當中，證據可以分做強同弱兩種，

• 強證據係指「如果搵到，就可以證明個論述係真」（$E\rightarrow S$）嘅證據，而
• 弱證據係指「如果搵到，就可以表示個論述有可能係真」（$S\rightarrow E$）嘅證據。

事實表明，強證據好難搵。喺現實世界，人類好多時都焗住要齋靠弱證據做判斷。

概論

睇埋：科學哲學同科學理論

舉個簡化例子，想像家陣阿明睇住阿苹去買嘢，而阿明已經知：

• 阿苹買咗蘋果同雪梨；
• 蘋果每個 1 文；
• 雪梨每個 2 文；
• 阿苹總共使咗 10 文；

有咗上述呢啲資訊（證據），阿明可以排除以下嘅可能性：

1. 阿苹買咗嘅係 6 個雪梨－冇可能，因為 6 個雪梨會使 12 文；
2. 阿苹買咗嘅係 12 個蘋果－冇可能，因為 12 個蘋果會使 12 文；

但阿明齋靠手上嘅資訊，排除唔到以下呢啲可能性（睇返弱證據嘅概念）：

1. 可能阿苹買咗 2 個蘋果 4 個雪梨；
2. 可能阿苹買咗 4 個蘋果 3 個雪梨；
3. 可能阿苹買咗 6 個蘋果 2 個雪梨；

－三個可能性都同手上嘅資訊吻合，所以阿明唔知邊一個先係真確，而且佢未必有時間同能力去搵進一步嘅證據。科學知識都有噉嘅問題－想像家陣有幾個理論，佢哋都解釋得到研究緊嗰樣現象，而且呢幾個理論都同已知嘅數據相容，而研究者做唔到進一步嘅驗證，就焗住要講「呢幾個理論都有可能係真嘅」。

不充分決定論講緊嘅就係噉嘅現象：手上有多個可能性，呢啲可能性冚唪唥都同已知嘅證據相容，所以唔知邊個可能性先係真確。原則上，人可以進一步搵多啲證據返嚟，搵齊嗮先做決定，不過喺現實，人往往因為受資源限制，未必吓吓都做到呢樣嘢。

睇埋

• 奧坎剃刀
• 有限理性
• 複雜系統
• 等結果性

外拎

• （英文） Stanford, Kyle (Winter 2000), Edward N. Zalta (ed.), Underdetermination of Scientific Theory, The Stanford Encyclopedia of Philosophy.