世界女排大獎賽
世界女排大獎賽（World Grand Prix），係國際排球聯合會（簡稱 國際排聯 或 FIVB）一年一度舉行嘅大型世界排球比賽，相對於男子嘅係世界排球聯賽（World League），但係唔同嘅地方係，女排大獎賽唔使好似世界排球聯賽咁，參賽球隊一定要畀好貴嘅參賽費。
有鑑於女排嘅三個世界大賽（世界盃、世界女排錦標賽、奧運會）分別係四年一度喺固定一個主辦國舉行，為咗加強世界各地（尤其係東亞地區嘅觀眾）對女排嘅注意同吸引力，國際排聯喺1993年首度舉辦一年一度嘅世界女排大獎賽，以分站賽事嘅成績嚟決定參加總決賽嘅名單，而總決賽嘅優勝者就係成個賽事嘅總冠軍。
早年嘅分站賽事同總決賽都喺東亞地區舉行，但係近年一啲分站賽事亦都陸續喺歐美各地舉行，到咗2003年，總決賽更加首次喺歐洲嘅意大利舉行。
世界女排大獎賽嘅地位唔及三個四年一度舉行嘅世界大賽，但係獎金就遠勝世界大賽，乃係純粹商業性比賽，所以嬴得世界女排大獎賽總冠軍一般唔會睇成係世界冠軍。不過大獎賽就造就咗一班世界女排明星，方便向全世界推廣女排。
世界女排大獎賽自1993年第一次舉辦10幾年來，冇一支球隊能夠成功衛冕賽事嘅總冠軍，直至2005年，巴西女排首度成為賽事嘅衛冕總冠軍，更加係而家奪標最多嘅球隊。（詳見 歷年三甲）
歷年三甲
[編輯]| 年份 | 分站 參賽 隊數 | 總決賽 | |||
|---|---|---|---|---|---|
| 主辦城市 | 冠軍 | 亞軍 | 季軍 | ||
| 1993年 | 8 |  香港 |  古巴 |  中國 |  俄羅斯 |
| 1994年 | 12 | 中國上海 |  巴西 | 古巴 | 中國 |
| 1995年 | 8 | 中國上海 |  美國 | 巴西 | 古巴 |
| 1996年 | 8 | 中國上海 | 巴西 | 古巴 | 俄羅斯 |
| 1997年 | 8 |  日本神戶 | 俄羅斯 | 古巴 |  南韓 |
| 1998年 | 8 |  中國香港 | 巴西 | 俄羅斯 | 古巴 |
| 1999年 | 8 | 中國玉溪 | 俄羅斯 | 巴西 | 中國 |
| 2000年 | 8 |  菲律賓馬尼拉 | 古巴 | 俄羅斯 | 巴西 |
| 2001年 | 8 |  中國澳門 | 美國 | 中國 | 俄羅斯 |
| 2002年 | 8 | 中國香港 | 俄羅斯 | 中國 |  德國 |
| 2003年 | 12 |  意大利安德利亞 | 中國 | 俄羅斯 | 美國 |
| 2004年 | 12 | 意大利雷焦卡拉布利亞 | 巴西 | 意大利 | 美國 |
| 2005年 | 12 | 日本仙台 | 巴西 | 意大利 | 中國 |
| 2006年 | 12 | 意大利雷焦卡拉布利亞 | 巴西 | 俄羅斯 | 意大利 |
| 2007年 | 12 | 中國寧波 |  荷蘭 | 中國 | 意大利 |
| 2008年 | 12 | 日本橫濱 | 巴西 | 古巴 | 意大利 |