中文維基百科嘅弊端

出自維基百科,自由嘅百科全書

中文版維基百科有好多弊病——唔少固然亦見於其他語言版,重包含大把獨有嘅問題。

錯漏多[編輯]

中文版維基百科現時充斥一睇就知好唔妥嘅劣質文章,例如文句㪐㩿、機器翻譯、數據過時、欠缺根據、虛構失實……不過該網絡社群嘅制度及文化令呢個缺陷長存;隨咗積極參與者之間成日拉幫結派,經常惡性競爭之外,各方對於生寶嘅編輯者亦極為警剔,好興對經驗淺嗰啲諸多挑剔,隨便將人哋所作之改動打咗回頭先至算;而當對方肯行多一步,為此發起討論,即使爭論只關乎常識,都往往會遇到經驗深者,拋出新仔難以理解/路過者唔打算學嘅站內術語及規則,導致佢哋因冇癮而由得啲離譜內容留低。

相對於其他數種漢語版本及兩種英語版本,打躉於中文版,專門將他人更改取消嘅人員之比率特別高,呢班友習慣一見到有新嘢同自己表面印象唔匹配,就隨便全部還原,而唔係稍為研究下,跟住去蕪存菁、參與改善或予以指導;[1]然而,對於同一篇文原本嘅百孔千瘡,會視而不見。吊詭之處,係偶然貢獻者經常只會喺見到現狀非常礙眼,先至會郁下手,自然唔容易一步登天,無奈有大把熟練者會聚焦噉對之吹毛求疵,反而樂於變相謹守陳年錯漏。[2]

增長慢[編輯]

全球用中文嘅人數達14億以上[3],係世界主要語言之一。然而,中文維基百科嘅規模同中文嘅普及率遠遠唔成正比,甚至遠遠唔及英文維基百科嘅1/15。有觀點將原因歸咎於中國大陸當局封鎖維基百科。不過,即使只計算非中國大陸嘅大概1億名中文使用者(部分中文非母語使用者),參與中文維基百科嘅人數重係遠遠比唔上其他語言嘅維基百科。例如瑞典文得大概900萬人用,但瑞典文維基百科嘅文章數目已經係中文維基百科嘅兩倍幾[4]。除咗中文維基自身嘅問題外,某啲小語種同強勢語言嘅通用性都可能係瑞典文維基快速增長嘅原因之一,例如瑞典文德文非常相似,由德文維基百科中翻譯文章到瑞典文維基百科非常容易。

自從2006年11月中文維基百科文章數突破十萬大關之後,文章增長出現速度大幅減慢之勢。2007年1月成個月,中文維基百科只係增加咗3180篇文,平均每日只係增加咗103篇,比半年前(2006年7月)成個月嘅6219篇,少咗近一半[5]。同一時間,排喺中文維基百科前面嘅俄文維基百科文章數目正逐漸拋離。

中文版比好多個其他語言版嘅維基百科更加政治化,有關人等又鍾意用刪除,而非修改嘅方法,嚟處理各類糾紛,乃至於喺英文版等氾濫嘅大財團宣傳稿式文章,亦較難留低或維持原狀;由於維基百科商業化會帶嚟另外一種誤導,呢個特色可圈可點。[6]

內容少[編輯]

中文維基百科另一為人詬病嘅地方係佢充斥大量未完成作品。據統計,中文維基百科每篇文章長度得大概3,000字節(每個漢字佔3字節),比德文日文等主要語言短少[7]。當中超過2千字節嘅文章更只有13%,同樣比大部份主要語言為少[8]。少於一成文章嘅長度超過平均長度,意味住中文維基百科只靠極少數內容極詳盡嘅文章,去支撐文章平均長度嘅數字。

除咗小作品嘅問題,未完成翻譯嘅文章同樣有好多。現時有超過3,000篇文重未完成翻譯,即超過文章總數嘅2.5%。相對於其他語言版本,呢個數字係比較嚴重,最差嘅情況係,有啲文章得一少部分內容已被翻譯。

有唔少講中國政治嘅文章,被長期定格成某個冇乜反中共觀點嘅版本,原因除咗有陸港澳台編輯者因世界觀相去甚遠而成日打編輯戰之外,重有身處港澳嘅異見人士會驚中共按編輯紀錄,將佢哋又拉又鎖,因而唔敢喺維基百科按意願寫作;亦有中共嘅防火長城作祟,只特許極少量身處大陸嘅人正常接駁至該網站,因此佢哋喺表現出嚟嘅觀點同常識上,都冇乜可能算係大陸網民嘅典型,只能夠推測係嚴謹噉按照中共規則辦事嘅小眾。[9]呢類封鎖往往會搞到啲重要嘅文史哲理文章,長年得幾十個管理員有權編輯,而佢哋偏偏又好少會為其加入有深度嘅內容。[10]

專業貧[編輯]

中文維基百科喺科技化學物理數學醫學等文章嘅建構同經營方面,專業性亦明顯唔夠英文或德文維基百科咁高,喺翻譯上進度亦略嫌過慢。咁相信係同中文維基百科參與者,正如前段提及,以大學生及中學生為主,而冇乜在職專業人士及大學教授參與有關。

中文版維基百科有唔少管理員經常扭曲部分規則並選擇性執行;理論上,一切非抄襲嘅內容都包含若干比重嘅自行總結,此乃現代學術論文嘅基本元素,多數並無唔妥,不過實際上,當有人因某啲唔願意承認嘅商業或政治等原因,而唔畀某啲內容流傳,就會濫用佢哋(只要同時極端解讀「原創總結」及「抄襲」兩個術語,就可以對任何文字套上欲加之罪……),而典型手段就係以佢哋為籍口嚟將文章恢復成舊版,抹走特定户口喺嗰道嘅所有變動,亦拒絶講解或溝通(明知自己理虧,唯有濫用權力,唔辯論就唔使出醜……),有時重會封鎖文章編輯權或剝奪户口使用權。[11]若果範疇十分之熱門又唔牽涉中國政治,例如關於流行娛樂,就可能因有大量擁躉及公關加入論戰而令(部分)改動最終成功(呢種衝突偶然會觸發激烈抗議,管理員見到反對者太多,驚對方可能發動嘅罷免程序等高門檻制衡手段會見效,於是退讓……),不過需要經過多人參與嘅繁複程序,始終都係費時失事……[12]

由於被外行挑剔嘅技術作品,往往出自該題材嘅少量行家之手,而撰寫研究文章所需功夫亦頗多,重可能因作品被蹧蹋而谷氣,義務有能者冇財力支援,亦冇人力幫忙,撞到異常狀況時往往會束手無策,唯有放棄;[13]呢種歪風,變相鼓勵無能者嘅低成本另類抄襲——例如用機器翻譯英文版維基百科——關於中文世界嘅部分自然會因此匱乏及唔細緻,文句難以理解及擾亂中文文法嘅弊病亦毋須多講;同一派管理員歡迎嘅另外一種抄襲形式,係由授權條款寬鬆嘅政府文件搬字過紙,噉樣意味佢哋變相用官方宣傳打壓民間學術……可謂劣幣驅逐良幣。

綜合呢幾種因素,中文版維基百科正往淪為特定勢力嘅宣傳工具嘅方向發展,變得越嚟越唔似供讀者作知識參考,正常嘅百科全書,同典型被中共網絡審查過嘅嘢越嚟越相似。[14]呢類網絡宣傳系統,加料時多數集中於政治類內容,然而其滅聲手段會涉及一切學科,因此佢嘅操縱行為,係專業內容增長嘅明顯障礙。[15]

[編輯]

  1. https://www.inmediahk.net/%E5%86%8D%E9%A7%81%E6%99%82%E6%98%AD%E8%AC%AC%E8%AB%96%EF%BC%8D%EF%BC%8D%E8%A2%AB%E5%9B%9B%E6%AC%A1%E7%BD%B7%E5%85%8D%E5%8D%BB%E6%AD%BB%E4%B8%8D%E8%AA%8D%E9%8C%AF%E7%9A%84%E7%AE%A1%E7%90%86%E5%93%A1
  2. 基百科:用户贡献内容,也贡献银子! | 南方周末. www.infzm.com. 喺2022-10-03搵到.
  3. The World Factbook美國中央情報局
  4. 瑞典語維基百科實時統計
  5. 維基百科多語言統計:每月新增文章 (英文)
  6. 基百科成功了吗? | 南方周末. www.infzm.com. 喺2022-10-03搵到.
  7. 各語言版本維基百科字節數比較
  8. 各語言版本維基百科2KB以上條目數比較
  9. 鏡書刊 - 當維基百科遭遇中國,變成了什麽樣?. RFI - 法國國際廣播電台 (繁體中文). 2015-12-13. 喺2022-10-07搵到.
  10. 文维基百科"编辑战"背后 | 南方周末. www.infzm.com. 喺2022-10-03搵到.
  11. Liao, Han-Teng (2014). "Cultural Politics of User-Generated Encyclopaedias: Comparing Chinese Wikipedia and Baidu Baike" (英文). Rochester, NY. doi:10.2139/ssrn.2508885. {{cite journal}}: Cite journal requires |journal= (help)
  12. https://www.inmediahk.net/%E4%B8%AD%E6%96%87%E7%B6%AD%E5%9F%BA%E7%9A%84%E8%85%90%E6%95%97%E2%80%94%E2%80%94%E5%81%B4%E7%9C%8B%E7%AC%AC%E5%9B%9B%E6%AC%A1%E6%9B%B8%E7%94%9F%E7%BD%B7%E5%85%8D%E6%88%B0
  13. Qiu, Zhang; 邱彰 (2012). Long yu ying de bo dou : Meiguo Hua ren fa lü shi (第Chu ban版). Taibei Shi: Mi le wen hua guo ji you xian gong si. ISBN 978-986-88351-3-9. OCLC 825941045.
  14. Unwire.hk. 媒訪問被BAN中國維基編輯 確認中國網民經常翻牆撰文 | Unwire.hk. LINE TODAY (繁體中文). 喺2022-10-07搵到.
  15. 基百科清理中共网军势力 知情人透露详情 - 大纪元. 纪元 www.epochtimes.com (簡體中文). 2021-09-16. 喺2022-10-07搵到.

睇埋[編輯]