中正機場捷運

出自維基百科,自由嘅百科全書
Jump to navigation Jump to search

中正機場捷運係一條連接中華民國台北市桃園機場嘅捷運線,而家已經由桃園捷運機場線代替。最初招標嗰陣,長生國際開發公司係最好嘅投標者,於是就攞到30年特許經營權,所以呢條線又叫做長生線。嗰陣時長生公司想用民間興建營運後轉移模式(BOT)嚟起呢條捷運。但係因為好多原因,中正機場捷運嘅工程拖咗十幾年,最後政府就決定收返呢條捷運線嘅特許經營權,由政府出錢起,又改吓捷運線嘅走線,即係而家嘅桃園捷運機場線

路線資料[編輯]

  • 經營管轄:長生國際開發公司
  • 路線距離:主線35km、林口支線1.9㎞
  • 軌距:冇(膠輪系統)
  • 車站數:17
  • 雙線區間:主線4線
  • 電化區間:全線電化

歷史[編輯]

1990年代初,連接台北市同中正國際機場(而家嘅台灣桃園國際機場)嘅公共交通工具剩係得國道客運(巴士)一種;而高速公路又成日塞車,拖長到達目的地嘅時間。於是當時嘅台灣省住都處就開始搞機場捷運路線方案嘅規劃。

1996年10月,政府決定用民間興建營運後轉移模式起「中正國際機場聯外捷運系統」(代表色為紫色),又正式公告搵人投資;因為嗰陣房地產市道仲係好好,所以沿線嘅土地開發亦都成為其中一個誘因。最後有五間廠商交咗申請,入面嘅長生國際開發公司係最好嘅投標者,攞到30年特許經營權。

佢嘅規劃路線係台北捷運西門站去到中正機場(又叫長生線),全長35公里,計劃起16個站、代表色係紫色,起呢條捷運嘅成本係800億新台幣,加埋收地開支就大約係2,000億;沿線有六個市地重劃案,同埋要收兩達地,1,200公頃開發方案;另外又有長1.9公里,計劃起3個站嘅林口支線;列車同軌道計畫用膠輪系統,用4線設計、每一卡車有6個車廂,平均時速40km/h、每架列車大約可以載住450人;西門站同機場第二航廈響起嗰陣時亦都預留咗有關嘅設計。

但係喺幾年後,房地產市場衰退,土地開發需求冇以前咁多;嗰陣政府審查投資者條件嘅時候太過樂觀,忽略咗自償率偏低嘅事實;再加上長生公司同佢嘅母公司長億集團過度擴張,經常傳出資金週轉問題同融資困難嘅消息,機場捷運嘅興建時程因為咁樣拖完又拖。

2002年12月31日,長生公司同高鐵局開會,達成終止合約嘅共識,民間興建營運後轉移案正式宣告失敗,長生公司亦響下一年解散。原本交通部想搵嗰陣攞到第二優先權嘅中華工程公司接手。不過台北縣政府話要用返長生線方案,中華工程就話要用返佢哋嘅規劃、同高速公路平行又冇咁多車站嘅路線,加上受到地方政治、既得利益團體嘅壓力(土地開發需求),中華工程最後就唔承接呢單工程。長生公司解散同一年,政府就決定收返BOT模式嘅權利,改由政府出錢自己起。

車站一覽[編輯]

主線
E1二期航站 - E2一期航站 - E3鐵路支線 - E4山腳 - E5外社 - E6南勢 - E7文化二路 - E8長庚醫院 - E9體育園區 - E10輔仁大學 - E11泰山 - E12楓樹腳 - E13五股工業區 - E14福音 - E15西門
林口支線
E7文化二路 - E7B忠孝 - E7C仁愛

分別[編輯]

下面係中正機場捷運同修正後嘅桃園捷運分別:

  • 台北總站搬去台北車站
  • 應台北市政府對景觀嘅疑慮,市區路線改落地下,由台北市政府補貼差額。
  • 桃園嘅車站整合桃園捷運計畫,延伸路線到高鐵桃園站中壢市
  • 複複線(4線)減到複線(2線)。
  • 冇咗林口支線計畫。
  • 部分車站個位改咗。好似原本嘅鐵路支線車站(預留轉乘台鐵林口線)搬到500米外。有啲車站就因為冇咗土地開發計劃而擱置。
  • 膠輪系統改用一般標準軌鋼輪鐵路。
  • 由於前面講到嘅鋼輪系統克服地形坡度能力比較差,路線彎道亦都有部份調整。例如林口台地上嘅體育大學車站改為地下車站以降低站間嘅坡度。
  • BOT興建改為政府興建。

其他方案[編輯]

  • 當時投標嘅廠商提出嘅不同方案:
  1. 中工(票價180元)
    全長37.1公里,有8個站,由台北車站,經二重疏洪道,沿住高速公路經五股林口,轉過去桃園地區沿住台四線去到桃園機場;另外有林口支線長1.9公里,有3個站。
  2. 上慶(票價198元)
  3. 聯捷(票價220元)
    設有二期航廈站、國內航廈站、林口站、圓山站、松山機場站同埋新增嘅五股站、青埔站、桃園站,速度達160Km/hr。
  4. 台聯(票價140元)
林口線改建好難,亦都要同時升級台鐵桃園站到台北車站(最好可以去到松山或者南港車站)嘅運能,又冇土地開發誘因。
響長生公司確定冇辦法開發時,台灣高鐵嘅通車仍然係未知之數,主事者當時嘅心態係高鐵可以通車就好嘞。
目前執行嘅方案係「高鐵轉乘客運」方案,但是吸引唔到台北市旅客。
未來「台北車站<-->高鐵桃園站<-->機場捷運至機場」嘅方案同「台北車站<-->徒步轉乘機場捷運」重複。

出面啲頁[編輯]