中華人民共和國教育

出自維基百科,自由嘅百科全書
Jump to navigation Jump to search

中華人民共和國教育係中國大陸嘅國有公開教育系統,由中華人民共和國教育部主管。古代教育時多數以攴攴齋形式為主,直到中華人民共和國成立後先至有現代教育嘅學校。從1986年開始推行九年義務教育

[編輯]

中華人民共和國成立後,教育模式按嗮蘇聯(1991年12月解體)模式而發展,將原先嘅綜合性大學拆分。嗰時中華人民共和國成立無耐要好多工業技術人才而成立咗好多間技術學院。1950年代期間開咗大規模嘅掃盲運動,重喺1955年成立咗高考。1960年代中葉到後半段,受到文革破四舊嘅「讀書無用論」同「剷除一切牛鬼蛇神」嘅思想影響,教育一度停頓,連大學入學考試都唔例外。1970年代,中國共產黨組織大量城市「知識青年」離開城市進行上山下鄉運動直到1970年代尾為止,自從中共十大之後,教育重返正常渠道,1977年正式恢復返高考。

1977年恢復高考之後,第一屆高考嘅錄取率好低。隨後1986年7月1號實行咗義務教育法後而唔畀學校喺學生義務教育期間[註 1]留級或開除學籍嘅情景。1990年代尾實行大學擴招政策後雖然畀好多人喺大學讀書,但弊端亦逐漸出現[註 2]。而「教育產業化」政策實行之後令學校收費猛漲到要做有錢佬啲細路先至有得讀書。雖然中國大陸實行咗一系列擴招政策,但好多人認為而家啲大學生好低質素,使就業情況出現嚴峻。

教育系統[編輯]

中華人民共和國教育制度
教育類 等級 強制性
高等教育 研究生 博士 隨便
碩士
本科 學士
高等專科(冇學位
高中
(普通高中、中專中職
高三
高二
高一
九年義務教育 初中 九年級[註 3] 必須
八年級[註 3]
七年級[註 3]
初中或小學
(分水嶺)
六年級[註 3]
小學 五年級
四年級
三年級
二年級
一年級
幼稚園 大班 隨便
中班
小班

中國大陸主要受到龐大嘅人口系統影響而衍生咗好多種唔同嘅教育等級制度。分別係幼稚園、學前班、聾啞人或盲人學校、重點學校[註 4],高等教學機構[註 5]。受到金字塔架構同影響,一到越高等級嘅教育,學生數量出現勁跌狀態。

學前教育[編輯]

喺中國大陸,學前教育一般從3歲開始。幼稚園嘅班級分為:

班級 小班 中班 大班
年紀(週歲) 3~4 4~5 5~6

部分幼稚園同小學重辦學前班嚟教識唔夠6週歲啲細路,以便適應學校教育同生活。通常嚟講,幼稚園生活包括一日三餐同遊戲為主;一到中午時分都要求學生午休;部分幼稚園重針對偏遠學生用校巴形式接送。學前班雖然有啲似學校上課噉,但時間好短兼超多戶外活動。

九年義務教育[編輯]

小學[編輯]

喺中國大陸,小學一般分為五到六級制。喺2002年之前要夠7週歲先要入學,2002年開始改為夠6週歲先要入學。多數嚟講,一至二年級係低年級(小學基礎)階段,三至四年級係中年級(小學提高)階段,五、六[註 6]年級係高年級(小學拓展)階段。學生係呢五到六級嘅學業期間,多數要學語文數學品德與生活同道德與法治[註 7]體育與健康[註 8]科學音樂美術信息技術[註 9]英文。但實際上,由於小學畢業時冇統一考試,所以除咗語數英三科之外,老師好少甚至唔關注其他課程嘅課時同教學嘅質量,甚至成績都唔啋。而多數鄉下同山旮旯地區啲小學,凈學語文、數學同體育三科。小學畢業考試時,部分城市甚至按成績高低嚟決定點揀升學嘅學校(唔理學區係點劃分都好),從而出現擇校現象,2010年代初開始,部分城市開始將綜合素質評價納入升學考入面。

初中[編輯]

中國大陸啲學生入初中時,會通過「排隊」、「電腦派位」、「擇校」、「按區劃分」四種方式其一嚟搞。其中:

關鍵詞 表達意向
排隊 根據學生喺指定地區排名決定上,派到本區或跨區嘅某間初中。
電腦派位 將學生通過電腦隨機派位方式,派到指定小學所屬區嘅初中。 隨機派位,去到指定意向學校要靠撞彩。
擇校 向學校畀擇校贊助費或通過學校嘅入學考試入讀。 大多數家長會揀呢種情況,因為所在小學附近冇師資較好嘅初中而出現噉情況。
按區劃分 按學生住址嚟派到就近初中 睇學生住邊度而定邊間初中距離學生嘅屋企最近或指定劃分嘅初中區域而定

雖然初中教育唔係清一色免費,但費用對於低收入家庭嚟講,要使好多錢先至得。令一小部分農村學生讀完小學之後唔再讀書,而進行務農或等到年紀大啲時入市區打工[註 10]。雖然法律上講係違法行為,但實際上由於地區政府冇乜稅收支持,加上上級唔夠錢撥入,令呢啲現象成為過眼雲煙。

學生喺初中階段除咗要學語文數學英文三科之外,重多咗學道德與法治[註 11]物理化學等三項主要考試科目。雖然歷史地理生物體育與健康[註 8][註 12]信息技術[註 9]等科目都有學,但亦睇重咗教學質量,而音樂美術。有部分地區搞日文俄文嚟頂住英文課,亦有部分省份將五科合併成「歷史」同「科學與社會」兩科嚟學。

中國大陸嘅九年義務教育規律係,從一年級(小學)入學開始,一直到讀嗮九年級(初中)就係完成九年義務教育階段嘅學習。

中考[編輯]
睇埋:初中畢業生學業考試

1980年代,中學畢業考同中考喺埋一齊。祗要中考一肥佬就冇得畢業,即使畀高中錄咗都唔畀入學[註 13]

從1990年代開始,初中取消畢業考。學生凈喺三年內冚唪唥課程嘅期末成績超過合格線[註 14]且冇任何處分或撤銷所有處分記錄,先至有得畢業。實際嚟講,學生修業多數係由於自動退學或嚴重違反校紀或法律而被取消學籍資格,很少有因為其他原因而修業。學生喺九年級就快結束時(多數喺每年6月中旬)要考中考。

雖然相關教育主管部分明令禁止學校推出變相補課嘅規定,但係有相當一部分學校為咗保證升學率,喺八年級結束之後到九年級期間,會提早兩到三個禮拜開課,甚至用埋週末嚟補習[註 15]。喺九年級開始(部分學校甚至喺九年級學期過咗一半時亦會搞)期間,很多學校會為升學率而調整過班級啲學生,將學習成績比較叻啲人分埋一齊,而成績比較渣嘅人會分埋一齊甚至轉到第間學校讀書。

而中考科目方面,1970年代初到1990年代尾,主要考為主[註 16];1994~1996年,部分學校喺英文科加開咗聽力考。2000年底按照鄧小平嘅講話而關注咗五育嘅發展。

中考結束之後,學生將會面臨「三岔路」嘅境界。所謂嘅「三岔路」係決定學生讀高中(包括普通高中同重點高中)、中專、踏入社會嘅其一,不過學生可以報考省內是旦一間中專。高中嘅招收範圍都有唔同,鎮級高中凈錄取或招收所屬鎮入面或附近鎮學籍嘅學生;而超級高中可以招收指定省份入面,任何市鎮嘅優秀學生或尖子生。

高級中學階段[編輯]

學生喺初中畢業之後要面臨三岔路嘅境界。所謂嘅「三岔路」分別係:

  • 升入高級中學為今後入大學做准備。
  • 直接入讀中等專業學校(中專)或職業中學(技校)
  • 直接出去打工或再考入高等職業學校(職高)

三岔路[編輯]

普通高中、重點高中[編輯]

高中三年內嘅學習期間,其中高一打基礎,高二搞過渡,高三而備考。學生除咗要學初中必考嘅六科之外,亦加多咗三科,部分學校甚至加學美術體育與健康[註 8]信息技術[註 9]通用技術研究性學習等科目;外文科方面,多數嚟講係英文科,亦有部分學校揀日文俄文科嚟學。高一級時會學部分課程,到高一下學期期末考結束之後[註 17],學生需要決定喺高二同高三期間,揀文科定理科學。多數情況嚟講,學生喺高一需要通過信息技術、地理同歷史嘅畢業考。到咗高二之後,學生除咗要學語數外三科之外,受到分科影響,將會出現噉嘅分岔路:

分科類 指定選修科目(綜合同X科)
理科 物理、化學、生物
文科 政治、歷史、地理

就快讀嗮高二之前,部份省會有畢業考;之後其它同呢九科無關嘅其它科目都會停嗮。

中專、職高、技校[編輯]

中專同埋職高、技校有好多唔同嘅專業,喺鄉下地區,農業或畜牧、獸醫一類嘅學校比較多;市區入面,計算機商業等其它專業齊全,甚至有幼稚師範類學校。由於高中之後嘅大學教育要使好多錢,所以大部分低收入家庭會揀細路讀職業學校而快啲結束學業,即刻開始做嘢而獨立生活。雖然中專嘅入學標準要夠一定分數先至得,但係技校同職高即使中考總分0分都可以入去(前提要中考開考前提早2~3個月提出報名,重要交正學費先至得)。

上課時間同長度,畢業嘅標準[編輯]

普通高中、重點高中[編輯]

由於中國大陸嘅普通高中同重點高中都係全日制教學,雖然教育局規定周末雙休日要休息,但有相當一部份學校為咗高升學率或賺多啲錢,重規定學生要用禮拜六同成個週末、挨晚時分補習;到高三期間(部分學校從高二級開始)亦加開晚自習或早自習、甚至霸寒暑假時段畀學生學嘢[註 18]。讀嗮高中之後,科科成績合格嘅有高校畢業證;太多肥佬咗嘅科凈得結業證;未讀嗮三年就話退學嘅,凈得修業證。高中多數嚟講,期末考同畢業考冇補考制度。而上課時間同長度,高一同高二級基本上從08:00到18:00[註 19],高三從08:00到20:00~23:00[註 19]不等。

中專、技校、職高[編輯]

中國大陸嘅中專、技校、職高係部分全日制教學或上下午校不等,對普通高中嘅時間相對寬鬆啲,加上教學資質多數以盈利為主,上堂內容多數比較懶散[註 20]。一般嚟講,基本上從08:00開課,上課最多上到15:00到16:30就放學[註 19]。部分學校嘅高二級到下學期時,晏晝基本冇課上。讀到高三級,學校會統一安排學生或嗌學生搵出面啲單位實習[註 21]。而畢業考制度,全部科目合格嘅會有畢業證;學校亦會針對肥佬咗啲學生進行補考,直到合格嗮為止,但到畢業嗰年,指定肥佬咗嗰科補考重係肥佬嘅話,冇得繼續補考,凈係發結業證。中途退學嘅,得修業證。

至於升學考同普通高中一樣,都係要考高考先至有大學讀,但由於受到民間傳統觀念影響,好少甚至冇學生去參加咁大規模嘅高考,凈參加成考為主。

最終大考[編輯]

普通高考[編輯]
內文: 普通高等學校招生全國統一考試

高考喺中國大陸嚟講,係成個教育系統最緊要嘅考試,亦係中國大陸嘅大事之一。從1977年恢復高考一直到2002年為止,高考喺每年7月7~9號辦。從2003年開始,高考提早一個月,改為每年6月7~9號[5][6][註 22]。2002年開始,高考從之前嘅「3+2」改成「3+X」模式[註 23][7]。雖然從2005年開始,北京教育考試院提出過將高考改喺每年6月頭個雙休日[8],但一直冇下文。由於中國大陸從2004年9月開始實行新課程改革(俗稱「新課標」),所以從2007年起,部分省份實行「3+X+1」[註 23]嘅新考試模式,喺每年6月9號上晝開考[註 22][9]

從2015年開始,原先高考有嘅奧賽等5加分項都取消埋,但少數民族地區重保留咗呢項優惠制度。

成人高考[編輯]
內文: 成人高等學校招生全國統一考試

成考亦係中國大陸嘅大事之一。雖然規模冇高考咁犀利,但中專、技校同職高啲學生成日揀。2004年之前喺每年5月中旬開考[10],從2004年開始改為每年10月第二個週末[11]。而考試科目相對比較簡單,不過考試範圍唔同:

目標 考試科目
高升專 語文、數學、外文[註 24]
高升本
語文、數學、外文[註 24]<文科:歷史、地理
理科:物理、化學

高等教育[編輯]

中國大陸嘅高等教育有本科專科之分,其中本科至少讀4年先至有得畢業[註 25],專科至少讀3年先至有得畢業[註 26]。大專同高職畢業出嚟啲學生冇學位,雖然喺普通大學讀書,且本科畢業出嚟啲學生,一定會有本科畢業證書同學士學位證書,但專升本啲學生全部成績合格之後,凈得本科畢業證書,冇學士學位證書。雖然中國教育唔強逼學生去考研究生,但入讀研究生時一定要有齊本科畢業證書同學士學位證書先至得。專升本同專升研啲學生一定要參加學士學位證書嘅考試先至得。

考生參加全國研究生入學考試時,必須先網上報名,再按考生所在嘅單位搞現場報名。考生報名時凈限讀一個研究方向,而且考試期間要初試同復試兩關先至得。其中政治理論同英文、專業課係必考;數學科睇研究方向而定,有啲理科專業或法學碩士免試,不過至少要考兩科唔同嘅專業課。過咗初試分數線啲學士可以參加複試,否則要通過調劑先可以參加得複試。

複試由研究生導師自主選拔,按初試成績排名而定順序,最後向所報考嘅研究目標面試。考生一定要過咗初試關同複試關之後先至有得喺指定學校注冊就讀。讀咗2~3年先至有碩士學位。

攞到碩士學位之後,假設繼續攻讀博士學位,需要繼續參加報讀院校開設嘅博士生入學考試,合格過關之後重要至少讀3~4年時間先至有最高嘅博士學位。雖然有好多院校有直博[註 27],但一定要使多5年先至讀嗮,半佬唔可以輟學或退出,唔係嘅話一未達到博士畢業要求,唔單止冇博士學位證書,相反連碩士學位證書都冇埋。

中國大陸部份城市從1990年代中葉開始,部份有條件嘅家庭會將細路送到等其它教育強國接受高等教育[12]

其它情況[編輯]

喺中國大陸,中小學成日出現拖堂現象[13][14]。雖然學校有明文規定唔可以拖堂,但學校校長對呢種現象係隻眼開隻眼閉[15]。重有喺中小學期間,「男仔唔畀留長髮」[註 28]、「女仔唔畀留長指甲或搽指甲油」、「必須要着校服返學」[註 29]成為出名嘅規矩之一。甚至出現「唯高分論」[18]、「重知識輕能力」同「重理論輕實踐」[19]嘅情況。1949到1986年間嗰時,如果小學讀畢業年級[註 30]考試肥佬就要留級;自從1986年實施《義務教育法》後,一年級到九年級[註 3]期間需要接受義務教育,雖然法律冇對留級現象做明文規定,但多數省級政府另行實施咗《小學生學籍管理規定》同《中學生學籍管理規定》,明文規定唔畀留級,但出於身體原因而提出休學申請係可以留級[20];另外有部分省份明文規定高三唔畀留級[21][22]

入學年齡方面,雖然《義務教育法實施細則》冇講明細路至少一定要夠6週歲先至必須入學[註 31],但2015年開始,有啲學校逼至少夠6週歲[註 32]嘅學生入學[25][26][24]

註同攷[編輯]

  1. 喺中國大陸,舊年義務教育階段一般係【小學六年+初中三年】或【小學五年+初中四年】嘅模式。
  2. 例如學習壓力加大、功課冇減少、甚至出現部分高等學校為咗升學率而強制嗌學校讀埋嗮亂七八糟嘅補習班。
  3. 3.0 3.1 3.2 3.3 3.4 呢種年級嘅稱呼從2003年9月開始實施,唔同學制啲學校嘅年級嗌法都唔一樣。喺六三學制,七、八、九年級分別嗌成初一、初二、初三級,保留小學六年級嘅嗌法;而五四學制,六、七、八、九年級分別嗌成初一、初二、初三、初四級,冇小學六年級嘅嗌法。
  4. 重點中學可以分為私人、文化同職業學校及第二等級學校,第二等級學校亦可以細分為正常版、師範版同技術版、專業版。
  5. 高等教學機構可以分為普通學院、專業學院同大學、短期限技術學校級別。
  6. 六年級係六三制學校嘅術語,五四制學校唔承認有「六年級」嘅講法。
  7. 早期品德與生活同品德與社會學呢兩科統稱「思想品德」;1998年時拆分成思想品德同社會兩科;2005年時將兩科改名成「品德與生活」同「品德與社會」兩科;2017年秋開始將兩本嘢重新合併兼改成「道德與法治」。
  8. 8.0 8.1 8.2 喺初中同小學期間,多數學校將呢科拆開嚟學。其中體育課一般到操場上,健康知識另開一科嚟學。直到高中同大學時將兩者合一嚟學。
  9. 9.0 9.1 9.2 中國大陸從2002年開始,陸續將呢科加入到教育當中。
  10. 呢種現象喺2002年之前,中國大陸經濟比較落後嘅地區成日出現。自從2002年中國教育加大財政投入,及同年12月1號國務院實行咗《禁止使用童工規定》後,地區經濟開始發展從而改善咗一部分教育。
  11. 2005年暑假之前,呢個課堂多數嗌佢做思想政治課,2005年9月1號發佈嘅新教材開始改名做思想品德;2017年9月1號開學時改做道德與法治。
  12. 中國大陸部分地級市從2002年開始陸續將體育科列入考試項目當中,而廣東地區從2004年開始列入中考[1]
  13. 嗰時啲人利用修業嘅理由而唔畀入學,俗稱退檔。
  14. 喺中國大陸,學校多數嗌嘅「合格線」指嘅係(成績≥滿分×60%),喺學生界曾經流傳過「60分萬歲」嘅講法[2][3]。但喺技能培訓考試入面,「合格線」指嘅係(成績≥滿分×80%)。
  15. 喺中國大陸,中考一般喺每年6月中旬開考,間間初中學校都會喺每年5月初上嗮除六科以外嘅其它課程。
  16. 喺1970年代文革結束到1990年代尾,嗰時啲先生都係文革時期出嘅班子,曾經流行過「學好數理化,行遍天下都唔怕。」嘅講法[4]
  17. 中國大陸大部分學校都係噉揀。不過亦有例外,有啲學校會喺高一上學期考完試之後就要你揀文科定係理科。
  18. 雖然有關教育部門明令規定唔畀學校利用禮拜六同成個週末、挨晚時分、晚黑前半夜及啱天光無耐、寒暑假嚟補習,但有相當一部分學校當上級領導發罯瘋,重係利用該時段嚟錢或搏高升學率。尤其係高二同高三級最明顯,高二級喺暑假未放完時,比開學日提早2~3個禮拜開學;而高三級係個超長嘅魔鬼賽程,比開學日提早1個月或多一個禮拜開學,甚至正常學期期間,一個月得4日休息同有晚修或早修,連寒假幾乎冇得停,最長得9日咁短。所以好多讀過高中啲學生話「高三最難挨,想考得過高考,必須要撐得住連續46周嘅學習。」
  19. 19.0 19.1 19.2 高中嘅午休時段一般從11:50~12:20到14:20~14:30,而中專或技校一般從11:20~11:30到14:00~14:10。
  20. 喺中國大陸,民間認為入高中先至最有前途,職業學校無非係等出個閏臘月嘅地方。由於長時間係噉,令好多入讀職業學校啲學生都唔想嘥心機去學嘢。加上社會亦睇死啲中專、技校、職高生,話佢哋係「垃圾」。
  21. 公辦學校會統一安排學生出去指定單位或場所去實習,而民辦學校唔會嗌學生去指定單位或場所,而係學生自願去隨機單位實習。
  22. 22.0 22.1 藝術類同體育類學校凈喺每年6月7、8號考高考。喺中國大陸大多數電視或報紙媒體,唔會提及每年6月9號嘅X科詳細考試情況。
  23. 23.0 23.1 呢度講嘅「3+2」係語數英三科基礎上,加考兩科選修科目;「3+X」係語數英三科基礎上,加考文理科綜合科目;「3+X+1」係語數英三科基礎上,加考文理科綜合科目同埋基本能力測試(俗稱「X科」)科目,喺廣東地區嗌成「3+文理科綜合+X」。
  24. 24.0 24.1 必須要喺範圍內是旦揀一個。
  25. 多數本科系嘅學校都係至少4年先至有得畢業,但醫學專業類要至少讀5年先至有得畢業。
  26. 專科相對於部分專業嚟講,有啲學校至少讀2年書就畢業。
  27. 直接攻讀博士嘅簡稱,係本科畢業後再攻讀博士,最後考試成績一達到博士畢業要求,就有博士證書。
  28. 有部分學校甚至唔畀女仔披頭散髮或一定要剪短髮先至得[16]
  29. 中學期間學校必有規定。至於小學,多數學校凈限制禮拜一至五着,亦有少部分學校凈限禮拜一統一着校服返學[17]。至於點解,睇埋校服#中國呢部分。
  30. 中國大陸唔同學制,畢業年級都唔一樣。六三學制係六年級先至畢業、而五四學制係五年級先至畢業。
  31. 喺《中華人民共和國義務教育法》第五條有規定:「凡係夠六週歲啲細路,唔理佢嘅性別、民族、種族都好,應該要入學接受規定年限嘅義務教育。貧困或低下條件嘅地區,可以推遲到七週歲入學。」[23]
  32. 喺中國大陸,年紀「夠6週歲」嘅條件係必須要喺8月31號深夜或之前出世[24]
  1. "广东中考体育考试恢复 按40分纳入升学总分". 新浪. 2004-05-18. 
  2. “合格”不是“60分万岁” 鳳凰網 (2016-05-05)
  3. 大学真的就是60分万岁么? 简书 (2015-12-24)
  4. “学好数理化 走遍天下都不怕”使人文教育受阻 搜狐 (2015-10-22)
  5. "北京部分酒店"高考房"涨价千元 套间2508元/天". 中新網. 2016-06-03. 
  6. "北京今年高考将如期举行 全国高考日期同样不变". 中学语文教学资源网(转京华时报). 2003-05-07. 
  7. 今年山东高考文理综改用全国卷 难度略加大 齐鲁壹点 (2016-03-17)
  8. 媒体七大理由倡议高考改期,称可降低社会成本 腾讯 (2005-06-08)
  9. "高考成绩组成 并列优于相加". 中国教育新闻网. 2014-11-12. 
  10. "广东2004年成人高校春季入学 考试时间改为10月份". 考易網. 2004-03-03. 
  11. 成考报考指南-了解成考
  12. Student and Exchange Visitor Information System
  13. 对教师“拖堂”的理性思考[失咗效嘅鏈] 中國知網
  14. "禁止教师拖堂应赋予学生话语权". 中国教育和科研计算机网. 2008-09-08. 喺2016-08-03搵到. 
  15. "我对"迟到"与"拖堂"的理解". (原先內容喺2005年2月18號歸檔). 喺2016年8月3號搵到. 
  16. "专家解读学校禁止女生留长发事件". 新浪. 2009-09-24. 喺2016-08-03搵到. 
  17. "众口难调的校服该怎么穿". 中国教育新闻网. 2015-11-03. 
  18. 学業成績至上主義で育った中国人女子大生の素顔 日中や日中大学生の違い 中国の大学生は勉強ばかりして、社会経験が乏しい ★阿修羅♪
  19. 五大发展理念下教育发展与改革 中国共产党新闻网 (2016-01-11)
  20. 小学生想留级却遭学校婉拒[失咗效嘅鏈] 中国日报网 (2014-09-10)
  21. 学籍管理规定触动了谁的神经 今日永城 (2010-01-26)
  22. 四川新高中生学籍管理 高三学生不准留级转学 四川新闻网 (2010-07-19)
  23. 中华人民共和国义务教育法 全国人民代表大会
  24. 24.0 24.1 "幼儿园频现"复读生" 河北政协委员呼吁放宽小学入学年龄". 新华网. 2016-01-09. 喺2016-08-04搵到. 
  25. "孩子差2天满6岁不能上小学 家长:再等1年耗不起". 中國新聞網. 2013-07-19. 喺2016-08-04搵到. 
  26. "不足6岁的伢读小学格外难". 楚天都市報. 2016-05-18. 喺2016-08-04搵到. 

連出去[編輯]