中華人民共和國2018年修憲

中華人民共和國2018年修憲係第四部《中華人民共和國憲法》（八二憲法）嘅第五次修改，由中國共產黨中央委員會提出，喺2018年3月11號經第十三屆全國人大第一次會議表決通過，同日公佈實施。

憲法修改內容包括設立國家監察機關、取消國家主席同國家副主席任期限制，仲有從憲法層面上確立憲法宣誓制度等事項，共21條。其中嘅第十四項修憲建議刪除國家主席、副主席「連續任職不得超過兩屆」嘅限制，引起國際關注。

內容

• 憲法序言增寫「科學發展觀」、「習近平新時代中國特色社會主義思想」同「富強民主文明和諧美麗嘅社會主義現代化強國」字眼。
• 憲法正文確認中國共產黨嘅領導地位，憲法第一條第二款之後增加一句：「中國共產黨領導係中國特色社會主義最本質嘅特徵」。
• 確立憲法宣誓制度，憲法第二十七條增加第三款：「國家工作人員就職嗰陣應當依照法律規定公開進行憲法宣誓。」
• 調整全國人大專門委員會設置，將「全國人大法律委員會」改為「全國人大憲法同法律委員會」。
• 取消國家主席同國家副主席嘅連任限制，憲法第七十九條第三款刪除「國家主席、副主席連續任職不得超過兩屆」。。但國家主席嘅職權並未得到增減
• 正式賦予設區嘅市地方立法權，憲法第一百條增加第二款：「設區嘅市嘅人民代表大會同佢哋嘅常務委員會，喺唔同憲法、法律、行政法規同本省、自治區嘅地方性法規相抵觸嘅前提下，可以依照法律規定制定地方性法規，報本省、自治區人民代表大會常務委員會批准後實施。」
• 確定增設國家監察機關，憲法第三章「國家機構」入面增加一節，作為第七節「監察委員會」。另外，針對監察委員會成立，修改憲法相應條文。之後，本身嘅監察部、國家預防腐敗局同最高人民檢察院反貪總局、瀆職侵權檢察廳、職務犯罪預防廳，全部被撤銷，相關職能整合到監察委員會。

評價

支持

新華網、人民網、環球網等官方媒體報道話各級政府機關紛紛表態擁護呢次修憲，好多民眾亦對修憲抱支持態度。多間媒體則引述多地幹部群眾意見指引述支持修憲嘅觀點認為，修改憲法「有重大現實意義同深遠歷史意義」，「有助於推動憲法與時俱進、完善發展」。憲法修正「將會令我國嘅憲法具有更高嘅權威性」、「必要、及時」、「符合國家事業發展需要、順應人民意願」。針對監察委員會嘅設立，評論指「設立監察委員會提供憲法依據，將會對推進全面依法治國、全面從嚴治黨起到巨大促進作用」。港區全國人大代表葉國謙認為，修憲「改動合理」。港區全國人大代表鄭耀棠就話「修憲反映人民意志」。香港工會聯合會會長林淑儀指出，「取消限制係變得更靈活，因爲最終連任幾多屆都係人民意願」。

中國大陸媒體對刪除國家主席任期限制作出解釋，又多次駁斥所謂「終身在任」嘅講法。2018年3月1號，《人民日報》發表文章，表示「黨嘅總書記、黨嘅中央軍委主席、國家中央軍委主席、國家主席嘅任職規定保持一致，係符合我國國情、保證黨同國家長治久安嘅制度設計」。《環球時報》引述權威解讀表示，任期限制取消唔代表恢復領導幹部終身制，而係要保持並完善「三位一體」嘅領導機制。環球時報仲話，支持修憲既係理性亦係信仰。3月1號，中國大陸《人民日報》發文話，修改國家主席任職規定，係著眼喺健全黨同國家領導體制，喺憲法上作出制度安排。呢個修改唔意味改變黨同國家領導幹部退休制，亦唔意味領導幹部職務終身制。全國港澳研究會副會長劉兆佳表示，通過修憲刪除國家主席任期限制，係希望提升國家主席喺外交嗰陣嘅地位，強化習近平嘅核心地位。不過佢認為呢個修訂並唔係最緊要，因為中國政治架構入面最重要嘅職位並唔係國家主席，而係中共總書記同中央軍委主席。3月4號，十三屆全國人大一次會議新聞發布會上發言人張業遂回答記者提問話：「中國共產黨黨章對黨嘅中央委員會總書記、黨嘅中央軍事委員會主席，憲法對中華人民共和國中央軍事委員會主席，都冇作出『連續任職不得超過兩屆』嘅規定。憲法對國家主席嘅相關規定，亦採取上述做法，有利於維護以習近平同志為核心嘅黨中央權威同集中統一領導，有利於加強同完善國家領導體制。」第二日，全國人大常委會副委員長王晨對修憲草案進行說明。當佢講到刪去國家正副主席任期「連續任職不得超過兩屆」嘅規定嗰陣，現場響起熱烈嘅掌聲。呢個係現場人大代表同政協委員喺王晨開始做說明之後，第一次拍手。喺王晨完成介紹關於國家主席任職規定嘅修改後，全場再次響起掌聲。

反對

香港《明報》、英國廣播公司中文網、美國之音、《紐約時報》及德國之聲評論認為，呢次修憲「係對鄧小平努力推動同建立嘅廢除領導人終身制並建立任期制嘅破壞同打擊」，削弱集體領導模式嘅制衡能力，同時可能會重新發生個人崇拜等問題。台灣《蘋果日報》、三立新聞、聯合新聞網同英國廣播公司、美國自由亞洲電台、《紐約時報》等引述中國大陸網民言論批評呢次修憲。台灣《中國時報》報導話綠營意見認為中共同台灣戒嚴時期做法一樣，令人反感。美國《紐約時報》同英國廣播公司批評該修憲係鄧小平時代提出嘅「廢除領導人終身制」嘅結束同回歸毛澤東時代嘅領導人終身制。法國國際廣播電台等媒體就以「習皇帝」嚟形容呢個刪除任期限制嘅事件。《台灣蘋果日報》批評話，全國人大「將習近平新時代中國特色社會主義思想寫入中國大陸憲法」，係為咗延續毛澤東時代鞏固權力核心。香港《東方日報》表示，鄧小平主政之後推動廢除領導人終身制，廢除中共黨主席制，設立冇實權嘅「虛位」國家主席，實行集體領導，制定國家領導職務嘅任期制，江澤民同胡錦濤兩代領導人都有執行有關規定。問答平台知乎嘅移動客戶端畀北京市互聯網信息辦公室從應用商店上予以下架整改，風傳媒同明鏡網指呢件事同修憲有關。法國國際廣播電台指出，由於目前社會主義國家入面，古巴、越南、老撾嘅國家領導人都有連任次數限制；如果修憲獲得通過，中國將成為北韓外，另一個領導人可以有機會終身任職嘅社會主義國家。美國有線電視新聞網指稱「加冕典禮同一個全新嘅獨裁時代來臨」。

美國南加州大學美中學院主任杜克雷接受英國廣播公司中文網採訪嗰陣認為，今次修憲並「唔係咁大嘅一件事」，佢解釋話，「黨總書記、軍委主席嘅職務更加重要，但冇任期限制，今次取消任期限制嘅係國家主席，相當於一個禮儀頭銜」。但杜克雷唔贊成中國將權力集中喺個別人士身上。佢認為，一個擁有全權嘅領袖或只聽從少數人嘅意見，可能會誤判形勢，增加咗唔穩定嘅風險。密西根州立大學政治學者埃莉卡·弗朗茲批評話，一人統治會做出唔明智政策抉擇，包括喺外交政策上挑釁同可能爆發戰爭。香港評論員劉銳紹話，「習近平目前權傾朝野，黨內外無人能匹敵，但佢走政治回頭路，恐怕令到黨內高層潛在不滿；一旦發生大型民亂或經濟破滅，或者會出現管治突然崩裂嘅情況」。台灣中央社分析話，「咁樣意味中國重回強人時代，亦進一步證明全球民主倒退」。英國《衛報》引述北京大學教授賀衛方批評話，「如果一國憲法可以依據最有權力嘅人意思修改，呢部憲法就唔係真正嘅憲政大法。」英國牛津大學中國大陸中心研究人員喬治馬格納斯表示：「我哋認為自由民主制係常態，顯然並唔係咁。因為，喺整個人類歷史入面，就國際秩序嚟講，民主存在嘅時間並唔係咁長久。由唔開明領導人掌控嘅政權，排斥伴隨我哋成長嘅嗰種民主模式」。另外民運人士王丹、嚴家其、王軍濤等16人發表聯合聲明，對修憲作出哀嚎。武漢民運人士黃芳梅制作視頻，寓意習近平修憲會令中國喺歷史入面倒退。

3月7號，清華大學有學生掛出女生節條幅「愛你冇限期」、「如果有，咁就講佢刪掉」，美國《紐約時報》等媒體指事件同諷刺修憲有關。《紐約時報》報導話，好多自由派嘅知識分子同官員私下對修憲案表示擔心。《紐約時報》批評中國政府壓制反對修憲嘅言論，又指武漢民運人士黃芳梅、安徽前檢察官沈良慶同湖南冷水江市嘅律師團體被地方政府要求停止公開發表反對修憲嘅言論。中共中央黨校黨建教研部前教授蔡霞喺2020年表示：「我個人嘅睇法……從修憲開始，我哋可以睇到呢個黨事實上已經係政治僵屍，擺明修憲從黨內程序上佢就係唔合法嘅，綁架咗十八屆三中全會（應該係中共十九屆二中全會），喺三中全會前嘅兩日搶住拋出取消任期制嘅講法，逼三中全會好似食狗屎一樣吞落去，三中全會咁多中央委員，居然冇一個人敢喺三中全會上將呢個問題提出嚟，所以呢個黨本身已經係一個政治僵屍。」