丹尼士標槍

出自維基百科,自由嘅百科全書
丹尼士標槍
Dennis Javelin

丹尼士標槍
製造廠丹尼士車廠/
TransBus International
/亞歷山大丹尼士
邊道出英格蘭Guildford
馬來西亞(UMW-Dennis Javelin)
取代咗丹尼士Dorchester
製造年份1986年—大概2010年
主要對手利蘭Tiger
富豪B10M
規格
8.5米、10米、11米、12米
引擎康明斯C系/ISBe(六汽缸)
波箱ZF(棍波/自動波)

丹尼士標槍(Dennis Javelin)係英國丹尼士車廠(同埋後來嘅TransBus International/亞歷山大丹尼士)出嘅中置引擎巴士。佢取代咗丹尼士Dorchester中置引擎巴士。

丹尼士標槍喺1986年亮相。當時款車有11米同埋12米客車可以揀,副引擎係擺喺底盤中間而挨埋驅動軸,水箱就擺喺引擎側邊,而前軸同埋引擎之間就整咗個預製空間去擺行李(即係所謂嘅太空艙底盤設計)。後來丹尼士出埋標槍8.5米同埋10米版客車、巴士版以及12米嘅標槍GX(Javelin GX)客車,其中巴士版同埋8.5米客車版標槍係冇預製行李空間(即係所謂嘅樓梯式底盤設計)。另外丹尼士標槍亦出過三軸版本。

丹尼士標槍嘅引擎劃一用康明斯C系,後來改為劃一用康明斯ISBe引擎,而波箱可以係棍波或自動波。

丹尼士標槍喺車軸之間同埋尾輪跨加埋有多啲位擺行李,兼且受惠於Bedford Vehicles嘅車喺1986年全線停產,令一啲買開Bedford巴士嘅公司改買丹尼士標槍,因此丹尼士標槍嘅銷路比之前嘅丹尼士Dorchester好。另外英國國防部亦買咗多架丹尼士標槍巴士,包括右軑同埋左軑版,佢哋啲座椅可以喺短時間內拆走並改成救護車,用嚟運送傷兵。

丹尼士標槍喺2005年之後曾經有一段時間冇出過,不過喺2007年亞歷山大丹尼士睇見丹尼士標槍嘅倉貨重有公司要,兼且英國國防部對丹尼士標槍重有需求,因此將丹尼士標槍改良到可以用歐盟四型或以上嘅引擎。不過亞歷山大丹尼士喺大概2010年出咗最後一批丹尼士標槍底盤之後,丹尼士標槍就冇再被開發並宣佈停產。

另外由丹尼士同埋馬來西亞UMW合組嘅UMW-Dennis公司曾經裝嵌丹尼士標槍底盤(稱為UMW-Dennis Javelin),供應東南亞同埋大洋洲市場。

出面網頁[編輯]