九段線

紅色嗰條就係九段線

「九段線」（粵音：gau2 dyun6 sin3）係中國政府畫喺地圖上面，用嚟聲稱南海領土冚唪唥屬於自己嘅一條唔黐埋嘅線，因為呢條線分咗做九條細線，所以就有咗呢個名。呢條線仲有好多唔同嘅名，譬如南海斷續線（粵音：naam4 hoi2 tyun5 zuk6 sin3）同埋U型線（粵音：U jing4 sin3），越南方面就嗌佢「牛脷線」（粵音：ngau4 lei6 sin3，越南文：Đường lưỡi bò），因為佢嘅形狀十足十條牛脷噉款。

「九段線」係嚟自1947年嗰陣中華民國畫嘅「十一段線」，範圍差唔多冚嗮成個南海咁滯。呢條線亦惹嚟極之多拗撬，因為九段線同家下嘅現代海權概念查實係有衝突嘅，之但係九段線畫起嗰陣又仲未有國際公約同埋海權概念呢家嘢，噉樣亦攪到中國同第啲同樣聲稱有南海主權嘅國家，譬如菲律賓、越南、馬來西亞都成日因為呢個問題而拗餐懵。菲律賓仲喺2014年試過向荷蘭嘅常設仲裁法院發起「南海仲裁案」，到2016年7月仲裁庭裁定中國違反咗《聯合國海洋法公約》，仲話中國喺南海嘅填海工程「搞軭（waang1）嗮個環境」，仲要求中國即刻停止喺南海搞緊嘅活動𠻹，中華人民共和國外交部就講到明，唔接受呢個結果。