人格謀殺

人格謀殺（Character assassination，簡稱CA，直譯意思係「人格暗殺」 ），係一種蓄意同持續嘅行為，目的係損害個人嘅聲譽或可信度。

「人格謀殺」呢個詞大約喺1930年左右開始流行， 呢個概念作為學術研究嘅主題，最初由Jerome Davis(1950) 喺一系列文章中提出，揭示咗政治抹黑運動嘅危險。六十年後，Martijn Icks 同Eric Shiraev (2014) 重新提出呢個詞，並透過探討同比較各種歷史上嘅人格謀殺事件，重新引起學術界嘅興趣。

對於被人格謀殺所針對嘅在世嘅人，結果可能會令佢被社群、屋企或其他生活或工作環境所排擠。呢啲後果，往往會對佢嘅人生造成冇得掹嘅傷害，影響佢嘅一生，甚至乎對於歷史名人嚟講，到佢死後幾個世紀依然喺度。

响實踐入便，人格謀殺成日涉及雙言巧語、放流料、影射或者蓄意誤導等欺騙性嘅手段，主題涉及主體嘅道德、誠信同埋聲譽，佢可能涉及編造信息，將嚴格意義上真實嘅訊息以誤導嘅手法提出，或者將一啲訊息响冇必要嘅情況下提出。例如，攻擊者可以講，目標人物响某一年冇交任何所得稅，但事實上有關人士並冇拖欠稅款，因為實際上嗰個人响當年並冇收入；或者攻擊者可能將目標人物嘅私生活攞嚟討論，就算目標人物嘅私生活同目標人物所批判嘅議題無關亦都係一樣。