今日傳媒集團

今日傳媒集團係以服務澳洲華人同中國在澳留學生為主嘅親中派媒體，喺2010年由張大鵬創立，總部位於雪梨

集團旗下擁有五大城市互聯網媒體：今日悉尼、今日墨爾本、今日昆士蘭、今日阿德、今日珀斯。

同中國共產黨嘅關係

今日傳媒集團同中國共產黨有頗為密切嘅關係，例如喺2017年1月，中國駐悉尼總領事顧小傑，就曾經訪問今日傳媒集團，又大讚今日傳媒集團自創辦以來始終堅持客觀公正嘅輿論導向。另外，前中共外交官陳用林喺2019年4月喺悉尼科技大學一個研討會發言嘅時候，亦提到今日傳媒集團喺好多議題上都極力地同中共保持一致。

2020年12月3日，澳洲SBS同《布里斯本時報》報道有唔少嘅澳洲中文傳媒都係畀中國共產黨控制，或者同中國共產黨有密切嘅關係。其中就提到，今日傳媒集團係由幾個同中共統戰部團體有關嘅媒體人所管理。

爭議

環繞今日傳媒集團同旗下媒體嘅批評，主要係同佢親中立場有關。時事評論員黃世澤喺討論澳洲政府支持香港人嘅人道救生艇政策嘅時候，提到有啲喺澳洲嘅中國人被今日悉尼等親中媒體，應該執咗佢。

涉嫌煽動干預紐卡素大學學術自主

2017年8月，紐卡素大學一名印度裔講師被指喺課堂同埋測驗入面，將台灣同香港稱為國家，引起中國留學生不滿，雙方交涉嘅錄音首先就係喺今日悉尼入面大篇幅報道。今日悉尼大篇幅訪問咗有關嘅留學生同埋中國駐悉尼嘅官員，亦用上『辱華』一詞報導事件，而中國官員亦向紐卡素大學施壓。事件後嚟引起咗澳洲其他媒體對於呢啲中國留學生同埋中國大使館損害校園言論自由嘅關注，而且亦有學者質疑包括今日悉尼在內嘅澳洲華人媒體，喺呢啲事件上面嘅煽動。紐卡素大學發表聲明，指有關內容來自國際貪腐監察組織「透明國際」（Transparency International）嘅一份報告，當中以「國家」（Country）一詞指代國家同埋地區，包括台灣同埋香港，又表示對話被秘密錄音同埋公開，令事件失去循校內渠道處理嘅機會，感到失望。

睇埋

• 中華人民共和國對外宣傳