任何一種能夠作為科學出現嘅未來形而上學導論
| Prolegomena.jpg
《形而上學導論》初版扉頁 | |
| 作者 | 伊曼努爾·康德 |
|---|---|
| 語言 | 德文 |
| 原著書名 | Prolegomena zu einer jeden künftigen Metaphysik, die als Wissenschaft wird auftreten können |
| 題材 | 哲學 |
《任何一種能夠作為科學出現嘅未來形而上學導論》[1]（德文：Prolegomena zu einer jeden künftigen Metaphysik, die als Wissenschaft wird auftreten können）係德國哲學家伊曼努爾·康德嘅一本短篇著作。本書喺康德嘅《純粹理性批判》出版之後兩年，即1783年首次面世。
《形而上學導論》可以當係《純粹理性批判》嘅縮水版，入面包咗對前作嘅總覽同埋完善。康德話喺呢本書用嘅方法係「分析」法，同《純粹理性批判》用嚟檢視人類心智能力同原則嘅「綜合」法打對台。[註 1]
因為對《純粹理性批判》收到嘅負評唔順氣，康德特登喺《導論》度加插咗對前作嘅辯護，重點強調論證形而上學係咪可以當係科學存在嘅重要性。本書附錄仲詳細收錄咗康德對《純粹理性批判》受批評嘅反駁。
內容概要
[編輯]導言
[編輯]康德聲稱《導論》嘅目的係畀學生同老師一條研究形而上學科學方法嘅思路。同其他科學唔同，形而上學仲未做到普遍同永恆嘅知識，亦冇分辨真理同謬誤嘅標準。康德於是問：「形而上學有可能存在嗎？」
休謨曾經研究過因果律嘅起源問題：因果律嘅概念究竟係獨立於經驗，定係從經驗度認識到？康德認為休謨錯喺嘗試從經驗度搵因果律概念。如果因果律唔係從經驗得出，咁就要扯到形而上對象，例如「萬能嘅神」或者「唔死嘅靈魂」。康德聲稱自己透過邏輯推理得出「因果律同其他純粹概念係源自人類理性本身，而唔係靠經驗外部世界得嚟。」
同《純粹理性批判》用「綜合法」論證唔同，康德喺《導論》度用「分析法」。佢將形而上學當成由三部分組成嘅科學，依次討論純粹數學、純粹自然科學同形而上學各自點樣可能成立。結論令佢可以劃定純粹理性嘅界限，再答「形而上學點做科學？」呢條問題。
註釋
[編輯]- ↑ 分析同綜合方法同分析與綜合判斷唔完全一樣。分析法係由已知推未知，綜合法則由未知搵已知。康德喺原書第四節度講，分析法係「靠住已知嘅嘢，有信心噉由嗰度出發，追溯返未知嘅源頭」；而綜合法則係「喺純粹理性本身度做研究，嘗試透過原理嚟確定佢嘅成分同使用法則。」
參考資料
[編輯]- ↑ Kant, Immanuel (1978)。《任何一種能夠作為科學出現嘅未來形而上學導論》。漢譯世界學術名著叢書。龐景仁譯。商務印書館。ISBN 9787100017985。
出面網頁
[編輯]
- 任何一種能夠作為科學出現嘅未來形而上學導論，James Fieser譯嘅英文版，基於保羅·卡魯斯1902年版本。
- Projekt Gutenberg-DE收錄嘅德文原文 Wayback Machine嘅版面存檔備份