伏打電堆

伏打電堆

伏打電堆（Volta Pile）係伏打整嘅「電池」，已知世界嘅第一隻持續放電俾電路嘅電池。伏打電堆係由意大利化學家伏打 (Alessandro Volta) 發明嘅，喺一七九九年發表咗佢嘅實驗結果。

伏打電堆嘅發明可以追溯到，伏打同賈法尼之間，對青蛙大脾實驗，嘅爭論，賈法尼同伏打嘅都係意大利嘅科學家。伏打電堆仲促成咗一連串嘅發現，包括威廉尼高森 (William Nicholson) 同安東尼卡萊爾 (Anthony Carlisle) 喺一八〇〇年嘅水嘅電解，將水分解成氧氣同氫氣，仲有堪斐戴維 (Humphry Davy) 喺一八〇七年發現或分離咗化學元素鈉 (Sodium)、鉀 (Potassium)、鈣 (Calcium)、硼 (Boron)、鋇 (Barium)、鍶 (Strontium) 同鎂 (Magnesium)。

成個十九世紀嘅電力行業都係由相關嘅電池所驅動，好似丹尼爾電池同格羅夫電池 (Grove cell)，直到一八七〇年代發明咗發電機先有變。

青蛙大脾實驗

賈法尼係意大利醫生同生物學家，做過一個實驗，將一條青蛙嘅大脾神經同金屬接觸，發現青蛙嘅腿會因為金屬掂到而自動收縮。佢覺得呢個係青蛙身體內部嘅「動物電」引起嘅。伏打唔同意賈法尼嘅睇法，認為「電」唔係來自生物體內，而係金屬，整咗個電堆，指出電流係金屬之間嘅化學反應。