俄羅斯入侵期間嘅烏克蘭文化遺產

切爾尼戈夫圍城戰之前嘅切爾尼戈夫州立魯索夫通用科學圖書館

2022年2月24號，俄羅斯武裝部隊喺總統普京嘅命令下開始全面入侵烏克蘭，係俄烏戰爭自2014年打響以嚟嘅重大升級，亦都係第二次世界大戰以嚟歐洲遭受嘅最大規模軍事襲擊。而喺俄羅斯入侵期間，烏克蘭嘅好多文化遺產都受到唔同程度嘅損毀甚至被完全摧毀，又或喺國家畀敵國一步步摧殘嘅背景下而處於危險之中。俄羅斯對500幾處嘅烏克蘭文化遺產嘅蓄意破壞同搶掠已經畀外界視為其喺烏克蘭犯下嘅戰爭罪行之一環。2022年，時任烏克蘭文化部長亞歷山大·特卡真高將呢一系列事件描述為文化滅絕。

法律保護

文化財產受到國際人道主義法嘅特殊保護。《日內瓦公約》第一議定書同《關於武裝衝突情況下保護文化財產的海牙公約》（對烏克蘭同俄羅斯一樣具有約束力）禁止締約國利用歷史遺跡嚟支持佢嘅軍事行動或者作為敵對或報復行為嘅對象。《海牙公約第二議定書》只係畀喺「迫切嘅軍事必要性」下而且冇其他可行選擇嘅情况下對文化財產進行攻擊。而針對文化遺產嘅襲擊構成嘅戰爭罪可以喺國際刑事法院受起訴。

著名文化遺產

切爾尼戈夫嘅聖三一修道院，修道院喺俄羅斯圍攻切爾尼戈夫嗰陣畀佢哋炸過

烏克蘭擁有七處嘅聯合國教科文組織世界遺產，包括首都基輔嘅聖索菲亞大教堂、洞窟修道院同埋西部城市列域夫嘅成個舊城區。夏爾奇夫、尼古拉耶夫同切爾尼戈夫等嘅城市嘅其他文化遺產都考慮緊申報世界遺產之列。

2022年4月下旬，美國政治雜志《Politico》報道話烏克蘭已經將畀佢哋擊沉嘅俄羅斯黑海艦隊巡洋旗艦莫斯科號沉船遺骸註冊為「水下文化遺產」。

保護工作

烏克蘭國內

空嘅基輔國立美術館，啲藝術品畀人搬走晒去安全地方，攝於2022年4月

受2022年10月10號基輔空襲波及嘅美術館同畀膠布保護嘅列賓象（圖左），襲擊當日美術館隔離嘅游樂場被導彈擊中，美術館嘅玻璃窗就震碎咗

喺基輔嘅烏克蘭國立歷史博物館館長菲迪·安德羅舒克同兩位同事一齊守護博物館，畀博物館唔好受襲擊同潛在嘅搶掠。安德羅舒克仲話喺文尼察、日托米爾、蘇梅同切爾尼戈夫嘅另外四間博物館都成功轉移、儲存同保護佢哋嘅主要展品，其中文尼察博物館就用作無家可歸者嘅臨時庇護所。而喺伊凡諾-法蘭基夫斯克嘅當代藝術中心嘅藝術家團體整咗掩體，同基輔、馬里烏波爾、敖德薩、扎波羅熱等城市嘅畫廊合作撤離同保護藝術品。

喺基輔嘅沙瑎達池尼蓋特曼紀念碑被人用沙包層層裹袱保護

烏克蘭國內嘅好多紀念碑都用沙包同其他各種材料包裹。截至2022年4月中，基輔已經有大概28個紀念碑好似咁樣受到保護。而喺列域夫，當地市民用塑膠同其他材料包住一啲拆唔到嘅石像同噴泉築成保護。

2022年3月，烏克蘭啓動咗“在綫拯救烏克蘭文化遺產”（Saving Ukrainian Cultural Heritage Online，SUCHO）項目嚟備份同保存烏克蘭文化機構可能瀕臨滅絕嘅數據同技術。3月28號，數字化轉型部啓動咗一座NFT博物館幫助保護烏克蘭嘅國家地位同歷史。個網站名叫烏克蘭元歷史 NFT 博物館，當中包含一條「戰線」或者事件時間表同相應嘅 NFT，其中有關於戰爭嘅關鍵時刻嘅推文同烏克蘭藝術家嘅插圖。截至4月1號，博物館賣NFT已經籌到大概60萬美金，呢啲資金會用喺幫助重建被摧毀或者被整爛嘅博物館、劇長同其他文化機構。

烏克蘭亦都喺俄羅斯入侵破壞入面，保護咗唔少俄羅斯文化遺產。

國際上

俄羅斯全面入侵烏克蘭之後唔多久，聯合國教科文組織就宣布佢哋正努力喺烏克蘭所有重要歷史古蹟度貼上《1954年海牙公約》嘅標誌。呢個組織仲會同烏克蘭嘅博物館館長合作，協調保護工作，保護館藏，仲會通過衛星影像監測文化遺址有冇損壞。而國際博物館協會嘅官員都開始記錄執法部門可能發現嘅非法跨境運輸文物同殘片。

喺波蘭，當地文化機構通過入侵之後唔多久成立嘅烏克蘭博物館援助委員會提供援助。呢個委員會向烏克蘭所有博物館同文化機構提供支援，幫佢哋保護館藏、文獻記錄、數碼化同清單編製。

2022年5月，捷克文化部委託布拉格國家博物館運送氣泡布、聚乙烯泡沫等包裝材料、滅火器同定向纖維板去遮擋窗戶。烏克蘭藝術援助中心（總部喺德國，由德國政府等機構支持）同ALIPH（總部喺瑞士）等國際組織自2022年春季以嚟都積極提供緊急援助。

展覽

2022年4月，位於美國洛杉磯東 荷里活 嘅烏克蘭文化中心舉辦咗一場藝術籌款活動，喺藝術展覽、無聲拍賣同音樂會中重點展示咗洛杉磯烏克蘭藝術家嘅作品，當中包括已故烏克蘭作曲家米羅斯拉夫·斯科里克嘅作品。主辦方話所有收益會捐畀烏克蘭嘅人道援助，仲希望文化遺產同語言可以傳承落去下一代。喺烏克蘭境外，烏克蘭難民同僑民都喺各烏克蘭節日期間踐行傳統，著上傳統服飾，表示對反侵略戰爭嘅支持。

喺2022年6月嘅米蘭家具展上，烏克蘭設計師維多利亞·亞庫沙同卡捷琳娜·索科洛娃通過佢哋嘅作品突出咗烏克蘭嘅文化傳統同象徵意義。索科洛娃話，佢創作呢啲作品係為咗避免「烏克蘭設計由世界地圖上消失」，而亞庫沙就話佢嘅使命係「向世界展示烏克蘭文化嘅創造力同美感，從而彰顯其特色」。

2022年5月，Virtue Media Group VICE、Blue Shield Danmark 同丹麥聯合國教科文組織國家委員會宣佈佢哋嘅「備份烏克蘭」項目，當中志願者會用應用程式掃描烏克蘭境內嘅物件，然後將佢轉換成 3D 模型上傳去雲端數據庫備份。

對文化遺產嘅破壞同搶掠

聖母安息教堂

截至2024年10月16號，聯合國教科文組織已經核實457處文物遭到破壞，當中包括143處宗教場所、231處具有歷史或藝術價值嘅建築、32處博物館、33處紀念碑或雕像、17處圖書館、1處檔案館。呢個列表只包含由多個可靠來源得知嘅案例，而唔包含表面淺層嘅破壞，例如門窗損壞咁。

截至2023年1月，烏克蘭文化部報告咗1189宗文化物品遭破壞或摧毀嘅事件，當中包括563所「創意中心」、453所圖書館、63所博物館同美術館、18座劇院同愛樂音樂廳，以及92所藝術教育機構。當中21處設施視為具有國家意義。另外約有100件物品幾乎或完全摧毀。

截至2022年6月10號，已經有458個文化遺址遭到破壞。《紐約時報》嘅視覺調查團隊編製咗一份清單，當中列出咗截至2022年12月部分或全部遭到摧毀嘅約339座建築物、紀念碑同其他文化機構，呢份清單項目主要關注頓巴斯地區。

大火後 伊萬基夫歷史 同 地方誌博物館

2022年2月25號，位於首都基輔以北約80公里嘅伊萬基夫歷史及地方誌博物館喺俄羅斯嘅轟炸之後發生大火。館中收藏咗唔少民間藝術品，當中就包括咗瑪麗亞·普里馬琴科嘅畫作、漢娜·韋雷斯同佢女瓦倫蒂娜·韋雷斯嘅紡織作品。當地人由燃燒嘅建築物中搶救出咗一部份畫作同其他物品。不過，冇被及時搶救而被破壞嘅藝術品數量就唔清楚。 而喺基輔一帶，正在興建中嘅娘子谷大屠殺紀念中心喺2022年3月1號受到破壞。中心嘅一座博物館建築受到結構性損壞，相鄰嘅墳場都受到破壞。遺址嘅其他部分，包括猶太教堂同猶太燭台雕塑，就幸免於難。3月15號，基輔小歌劇院大樓遭到損壞。

至13世紀庫曼石雕，右面石雕完全摧毀，而附近嘅二戰軍人紀念碑（背景）則局部受損

而喺東部，第二大城哈爾科夫嘅聖母安息主教座堂喺哈爾科夫戰役中受到破壞。一枚巡航導彈對大教堂嘅藝術品同彩色玻璃造成損毀，同時哈爾科夫市中心都受到破壞。 哈爾科夫嘅文字大樓都喺俄羅斯嘅軍事行動中受到破壞，哈爾科夫郊區德羅比茨基亞爾一座紀念大屠殺遇難者嘅紀念碑都受到破壞。 3月7號，哈爾科夫藝術博物館嘅外部受損，雖然內部嘅展覽冇受損，但仍然面臨地面攻勢同空襲嘅風險。 除此之外，城內唔少現代建築受到破壞，當中包括哈爾科夫國立大學經濟學院大樓、州行政大樓、市議會大樓同歌劇同芭蕾舞劇院。哈爾科夫同州內還有一個遭到嚴重破壞嘅城市——位於頓涅茨河畔嘅伊久姆，呢座被俄軍佔領近半年嘅城市入面嘅歷史建築、教堂、紀念碑以及9至13世紀嘅庫曼石雕都喺俄羅斯對城市爭奪戰中受到損壞或摧毀。

毀壞嘅亞濟夫卡聖母聖誕教堂

2022年3月，俄羅斯嘅炮擊摧毀咗三座建於19世紀嘅木製教堂，佢哋分別係位於扎沃里奇嘅聖喬治教堂、位於弗亞濟夫卡嘅聖母聖誕教堂，同埋位於盧基揚尼夫卡嘅耶穌升天教堂。 呢啲俾炮擊嘅教堂都屬莫斯科宗主教聖統烏克蘭正教會。 2022年3月12號至6月頭，聖山拉伏拉（斯維亞托希爾斯克嘅洞穴修道院）多次遭到空襲同炮擊，之後該地區俾俄羅斯佔據。修道院嘅幾座教堂受到徹底摧毀，其他建築都遭到唔同程度嘅破壞。喺第一輪襲擊中，修道院內尋求庇護嘅約520名難民中有數人受傷。

頓內茨克州立學術戲劇院

2022年3月16號幾乎被夷爲平地，當時至少有 1,300 人喺內避難位於東南部城市馬里烏波爾、建於1960年嘅頓內茨克州立學術戲劇院喺2022年3月16號被俄軍空襲，導致建築物受到重創。《美聯社》估計當中約600人喪生。2022年3月23號，有消息指市內收藏藝術家阿爾希普·庫因芝同其他烏克蘭藝術家作品嘅庫因芝藝術博物館受損，館內一部份作品事先已被移走。2022年3月底，有消息指出烏克蘭最大嘅私人電腦博物館之一嘅Club 8-bit喺馬里烏波爾圍城戰中被摧毀，該博物館內收藏咗500多件可追溯到20世紀50年代嘅電腦歷史展品。而在9月，俄羅斯再向位於南部港口城市尼古拉耶夫嘅尼古拉耶夫學術藝術戲劇院嘅庭院發射咗一枚火箭彈，造成嚴重破壞。

北部城市切爾尼戈夫自2月24號俄羅斯入侵起就被圍困近兩個月，屬於烏克蘭古物博物館嘅塔爾諾夫斯基故居喺3月11號幾乎完全燒毁。 哥德復興式風格嘅切爾尼戈夫州立青少年圖書館受到一定程度嘅破壞。 3月6號，切爾尼戈夫州藝術博物館同切爾尼戈夫文學博物館及保護區遭到炮擊，兩者受到唔同程度嘅破壞。 據報道，曉爾斯電影院（即現切爾尼戈夫州州立青少年中心）、烏克蘭酒店以及一個軍事博物館分館都受到破壞。不過，呢啲博物館先前已經收埋藏品喺保險庫入面。 切爾尼戈夫州立魯索夫通用科學圖書館亦喺3月30號受到炮轟，同樣造成一定程度嘅破壞。

炮擊及佔據之係嘅科尼格莊園

而位於隔離蘇梅州，特羅斯佳涅茨市長於2022年4月宣布科尼格莊園喺2022年2月被俄羅斯軍隊炮擊，佔領期間受到破壞。科尼格莊園係一座建於十八世紀嘅新古典主義宮殿建築群，當中包括當地歷史博物館、朱古力博物館、藝廊、俄羅斯作曲家柴可夫斯基畫廊同花園。