俾利喇街同飛能便度街交界巴士奪命交通意外

俾利喇街同飛能便度街交界巴士奪命交通意外發生響2018年1月10號，意外搞到一死一傷，重引發埋兼職有事就禁兼職，噉全職有事就禁咩嘢嘅輿論。

背景

2018年1月10號朝早九點，澳門男仔揸嘅白色七人車經俾利喇街去高士德大馬路方向行駛，去到飛能便度街斑馬線前，停車讓斑馬線嘅人橫過馬路。當時着紅衫師奶同一個阿婆一前一後橫過斑馬線，行先嘅紅衫師奶行到安全島嗰陣，跟住尾行嘅阿婆行到白色七人車前面嗰陣，突然一架新時代八號巴士標前大力撞埋白色七人車車尾，發出砰一聲，白色七人車就被巴士急速推前撞飛過緊斑馬線嘅阿婆，嗰頭同上半身捲咗入七人車車底，之後七人車繼續被巴士推前再撞埋前面部灰色七人車，部灰色七人車再推前撞前面部私家車，部私家車再撞前面部私家車，搞成一架巴士搞到五車連環相撞意外。而響意外現場行先嘅紅衫師奶同附近泊緊嘅電單車嘅男人逃過一劫。肇事新時代巴士擋風玻璃爛嗮，車頭又爛咗；白色七人車車尾爛得最嚴重，車尾玻璃粉碎；響白色七人車前邊嘅灰色七人車同兩部私家車嘅車頭同車尾損毀就冇噉嚴重。

過程

撞車之後，有路人見到立即打電話報警。響交通警同消防員去到現場之前，情況危急，有十幾個熱心市民上前合力抬起白色七人車，好小心噉將阿婆救出，響現場等白車嚟。之後交通警同消防救護員去到現場，發覺阿婆成身血，頭部懷疑被夾到變形，大量出血，已經冇呼吸同心跳。救護員立即將佢送到山頂醫院搶救，最後響朝早九點十五分搶救無效死亡。灰色七人車五十四歲男司機懷疑扭親條頸，由救傷車送院治理；肇事新時代巴士男司機輕傷，經過救護員檢查之後，拒絕送院。五個男司機都通過酒精呼氣測試，交通意外唔涉及酒後駕駛。大批交通警圍封意外現場調查，向肇事司機了解情況，搵附近嘅舖頭閉路電視影片翻睇。消防員幫手清洗地下血漬，拖車將肇事巴士同其他四部私家車拖走，到朝早十點三十五分左右解封現場。

結果

治安警

治安警交通廳話，經過初步調查，死者姓梁，六十七歲，澳門居民；梁女當時橫過斑馬線被撞，白色七人車當時停響斑馬線畀人行，跟尾嘅新時代巴士突然衝前撞埋七人車到，搞到五車相撞同埋行人死亡嘅交通意外，而肇事司機話自己搞錯咗剎車當油門先會出事。

巴士公司

新時代巴士公司緊急調查有關交通事故，即時派人到醫院跟進同慰問死者屋企人，重話會將呢次事故徹底調查同對事故深感痛惜。之後又話相關巴士車廂嘅閉路電視影片已經當場交畀警方扣查，結果要等警方調查。而涉事車長姓麥，三十二歲，澳門居民，考咗巴士牌有九個月，返咗三個月工，係兼職巴士車長，報稱任職賭場，年度體檢正常，今個月7號啱啱休過假，事發嗰日朝早六點五十分開始做嘢，通過酒精測試。涉事巴士車齡六年半，2017年5月29號通過政府年度驗車，2017年12月31號完成公司嘅正常保養程序，事故之後亦通過驗車，初步排除部車係機件問題。新時代會進一步徹底調查事故原因，如果係人為疏忽，將會對相關責任人從嚴處罰，重會協助死者屋企人嘅後續事宜。事故發生之後，交通事務局已經召集巴士公司了解事故原因，重責成巴士公司要制定有針對性預防措施。新時代將會全面檢討呢次事故，進一步加強公司嘅安全管理。公司堅持安全第一嘅原則，再次提醒所有車長提升安全意識，為乘客提供安全嘅公共交通服務。重話會積極配合警方徹底調查事故原因。

交通事務局

10號晏晝六點幾，11號開始暫停非長期性質工作嘅車長揸公共巴士，賭場巴同員工包車就唔受影響。

後續

暫停兼職車長揸公共巴士風波

車長同兼職車長

而事發之後三間巴士公司車長流傳交通事務局唔畀再請兼職車長，而三間巴士公司唔肯證實消息，但係有新時代嘅兼職車長就證實收到公司要求停職，之後響晏晝六點幾交通事務局發佈消息證實有關傳言。

11號，先後多個自稱兼職巴士車長打電話畀澳門電台時事節目《澳門講場》，話10號事故發生之後中午已經收到消息，公司管理層要求兼職車長轉做正職，唔係就要簽自願離職，佢哋認為被勸退嘅原因係同事故有關。懷疑當局指示嘅理據，有聽眾反問如果正職車長遇到事故，係唔係正職巴士車長都要全部停職。兼職車長吳先生都認為，交通事務局響10號嘅交通事故亦有責任。佢哋話要趕班次，如果遇到大塞車，會響之後提高車速。兼職車長吳小姐話，巴士公司如果達唔到指定班次嘅服務，巴士公司會被扣分，車長同站長也都會被扣錢，又話追返班次會增加事故風險，佢重認為事故嘅路段唔適合行巴士。

12號，有唔同巴士公司被停職嘅車長，話收到公司管理層電話，口頭警告唔好再同媒體或其他人講停職事件嘅細節，重話如果繼續發大件事，本來有得做都會變冇得做。希望減少公眾監督嘅輿論壓力，而咁啱同一日澳廣視去筷子基巴士總站同青州工業園街巴士總站採訪車長對於唔畀兼職返工對佢地有咩影響嗰陣，所有車長都答同平時一樣，同電台或其他網上自稱車長或兼差車長答法差天共地。

交通事務局

12號，交通事務局同埋三間巴士公司召開記者會，交通事務局話三間巴士公司暫停非長期性工作車長揸公共巴士係安全第一，措施只係臨時性，主要係針對有其他工作嘅車長，因為唔能夠保證呢啲些車長有足夠休息時間，局方唔希望車長響出面做完一日嘢之後再提供揸公共巴士服務，相信呢類車長發生事故機會較高，巴士公司會先行檢視呢啲車長嘅休息時間，同埋有冇足夠培訓，唔排除佢哋可以繼續提供服務，但係如果證實事故風險高，局方會當機立斷，甚至取消非長期性嘅工作車長。林衍新又澄清非長期性工作車長同兼職車長唔同，兼職車長係長期同巴士公司有合作關係，但係每日返工揸唔夠八個鐘巴士，響措施之下唔受影響佢又話暫停非長期性工作車長揸公共巴士第一日，受影響巴士服務約有一百個班次，以每天一萬班次嚟計，影響係一個百分比；第二日受影響有六十個班次，影響率係百分之零點六。佢又希望市民諒解巴士公司因為人手不足影響服務。另外，響同一記者會到，三間巴士公司都話唔存在車長要追班次嘅情況。交通事務局局長林衍新就話，局方已經為巴士公司提供足夠彈性，不會強逼巴士公司，例如遇到大塞車，畀巴士飛站。佢又話由於發生嚴重車禍，局方即刻檢討巴士車長整體培訓同監管要求，響檢視嘅過程入面發現，非長期性工作車長可能休息唔夠，所以要採取緊急臨時措施即時處理，同時畀巴士公司重新檢視而家巴士公司嘅入職標準同埋培訓之類，減少再發生意外機率，係負責任嘅態度，唔存在將車禍責任轉嫁到巴士車長到。

巴士公司

新時代

新時代話，而經按局方指示暫時唔安排兼職車長揸巴士。呢間公司有三十幾個兼職車長，工作安排分為幾類，有啲每日返工，但係工作時間比正職少啲；有啲就每個禮拜返一、兩日工，亦有提供彈性返工安排。兼職車長分佈響唔同路線，工作時數唔多，相信對營運影響唔大。

新福利

新福利話，公司有三十幾個兼職車長，將會根據當局要求暫時唔安排兼職揸巴士。班次編排會先做內部調動，盡量配合當局要求。由於未知係唔係臨時安排，內部評估之後會同當局匯報情況。

澳巴

澳巴話，公司有十一個兼職車長，每日返工，每個禮拜安排例休，工作同福利待遇同正職相同，只係佢哋唔想每日返八個鐘，所以安排每日返四、五個鐘。相信佢哋唔係當局指嘅「非長期性質工作」嘅車長，所以重會安排佢哋正常返工。

公共巴士職工總會

坊間有意見話涉事車長係兼職車長，考咗巴士牌九個月，認為新手車長駕駛經驗未夠班，唔應該揸巴士，但係公共巴士職工總會副理事長鄭華章話新手車長駕駛經驗、技術或者唔及有經驗嘅車長，但係都係經過嚴謹考核，同埋專業培訓先可以揸巴士。但係無論新手、老手，都有機會因為一時疏忽而釀成意外。而工會提醒所有司機，尤其係巴士車長，揸車嗰陣要打醒十二分精神，時刻留意路面情況，避免疲勞駕駛。因為巴士車長要負責車到所有乘客同路面使用者嘅安危，責任重大，凡事應該安全為先。佢又話，而家巴士公司不時舉行講座培訓，同埋提升車長嘅駕駛安全意識同埋服務態度。隨着近年有好多新車長入行，為咗確保整體巴士服務、安全，認為巴士公司要加強培訓，不斷提升車長嘅安全駕駛意識，避免再有悲劇出現。至於交局指示，暫停所有兼職車長揸公共巴士。鄭華章認為，當局要求暫停兼職巴士車長職務係斬腳趾避沙蟲。本身亦係兼職巴士司機嘅鄭華章話，自己亦被公司要求轉正職，如果唔係就終止合約。但佢唔排除部分兼職車長身兼幾職，搞到疲勞駕駛，但係強調唔係所有兼職車長都係連續直踩幾個鐘，認為當局一刀切嘅做法都係為咗公眾安全，相信一眾兼職車長會體諒，佢重話巴士司機相比其他旅遊巴司機壓力大，加埋巴士班次間隔緊密，對車長造成一定壓力，要趕班次時間，但係唔存在唔達標會被扣錢。

交通諮詢委員會委員

交通諮詢委員黃承發話，巴士司機人手緊張，而家兼職司機停工，會對巴士服務造成一定影響，但係可以藉住而家檢視兼職車長制度有冇問題，例如洗唔洗要累積一定時數嘅駕駛公共巴士經驗。

運輸工務司司長

運輸工務司司長羅立文話，佢對發生車禍表示可惜，交通局正跟進處理後續事宜。佢又話而家好多巴士行緊街，唔想再發生類似事件，佢認為揸巴士需要一定技術，承擔嘅責任重大，需由長期同埋穩定嘅車長來揸。佢又話，日常巴士營運係交通局負責，佢唔清楚細節同埋太多技術性問題，亦唔想單方面解釋，如果有需要會要求交通事務局同埋三間巴士公司同傳媒見面，交代更多細節。

治安警交通廳瘋狂執法風波

響交通意外發生之後嘅第二日（11號），社交平台傳出治安警交通廳響全澳多個地方對車輛響斑馬線前唔讓先執罰，搞到公眾質疑明明今次事件係私家車讓行人過斑馬線，巴士響後面衝黃格先出事，變咗警方搵私家車唔讓先嚟執法，做法有欠公允，而且質疑警方執法方式同標準都有問題，執法方式係警員呢埋響斑馬線附近暗位觀察再用無線電對講機通知前面警員將有問題車截停執法，但係過程就冇預先放塊牌響到警告前邊會執法（澳門法律係唔畀放蛇式執法），又無錄影只係單靠警員做人證就可以出牛肉乾；另一方面執法標準就係由行人行出斑馬線直到上返行人路都係唔畀車行，呢個執法標準會搞到行完一個又一個人，車輛永遠無法通行搞到附近交通大塞車。

分析

2017年1月6號，一架新時代28B響葡京行車天橋被對面線私家車冼軚撞埋嚟，當時公佈巴士車長日均工時有十一個鐘，已經被公眾質疑車工工時長冇時間休息，今次事故搞錯油門剎車都係懷疑車長返完長工之後返巴士車長兼職工時過長搞成，所以交局先出手禁止兼職車長返工，但係澳門巴士車長嚴重唔夠嘅情況之下，停咗兼職，變相就要令長工要再加班，安全問題令人再質疑，而當局公佈工時其實同正式返工嘅工時係唔一樣，因為工時係冇包埋由車廠攞車或者收車返廠嘅時間，所以實際工時會更長，同埋車長人工底薪底，有成一半以上人工都係靠津貼，所以公司一畀壓力話扣津貼，車長無奈都係要趕轉數。

睇埋

• 氹仔嘉樂庇總督馬路巴士奪命交通意外