假期聖經學校

假期聖經學校（英文：Vacation Bible School，簡稱VBS），又稱為假日聖經學校、暑期聖經班，係一種基督教教會舉辦嘅宣教活動，對象通常以兒童為主。活動一般喺暑假期間舉行，為期一個禮拜^[1]。

現今喺世界各地好多教會會開設自己嘅假期聖經學校，有啲教會自行設計內容，有啲就會用各自教派或者獨立出版社提供嘅主題課程同教材。^[2]

現代嘅課程內容通常針對小學學齡嘅兒童設計，包括聖經故事、宗教歌曲、手工藝製作、短劇表演等。

歷史[編輯]

假期聖經學校嘅歷史可以追溯到1898年美國紐約市嘅浸信會Epiphany教堂嘅兒童部門主管喺暑假期間針對附近社區兒童舉辦咗「美日聖經學校」（Everyday Bible School）。

浸信會嘅Robert Boville博士留意到呢個夏季活動之後，就將呢個活動推薦至其他浸信會嘅教堂，佢利用紐約協和神學院嘅資源開設一系列暑期學校，呢一年嘅夏天，一共舉辦咗五間暑期學校，共有大概1,000名學生參與。

1922年，Robert Boville博士進一步設立每日假期聖經學校嘅世界組織，一年之後佢吔針對幼稚園、小學、中學三個年齡層規劃並推出假期聖經學校嘅標準出版物，內容足夠供應每間教堂舉辦為期五個禮拜活動嘅課程。