偷天情緣(電影)
 |
電影《偷天情緣》（Groundhog Day）係美國哥倫比亞公司喺1993年出品嘅英語電影之一，屬於奇幻式嘅愛情喜劇。
| 偷天情緣 Groundhog Day | |
|---|---|
 電影DVD影碟封面 | |
| 資料明細 | |
| 導演 | 夏諾特·拉美斯 (Harold Ramis) |
| 監製 |
|
| 編劇 |
|
| 故仔 | 丹尼·魯賓 |
| 主演 | |
| 配樂作曲 | 佐治·芬頓 (George Fenton) |
| 攝影 | 約翰·貝利 (John Bailey) |
| 剪輯 | 彭布魯·J.夏寧 (Pembroke J. Herring) |
| 製片商 | Columbia Pictures[*] |
| 片長 | 101分鐘 |
| 產地 | 美國 |
| 話 | 英語 |
| 上畫同發行 | |
| 上畫日期 | 1993年2月12號 |
| 發行商 | 哥倫比亞影業 (Columbia Pictures) |
| 預算 | 1460萬至3千萬美元 |
| 票房 | 1億5百萬美元 |
| 各地片名翻譯 | |
| 中國大陸 | 土撥鼠之日 |
| 香港 | 偷天情緣 |
| 台灣 | 今天暫時停止 |
| 新馬 | 今天暫時停止 |
電影資料
[編輯]制作
[編輯]出品機構：
- 哥倫比亞電影公司 (Columbia Pictures / Tristar Pictures)
簡介
[編輯]製作班底及選角
[編輯]劇情大綱
[編輯]主要劇情係講述一個乞人憎嘅電視天氣報導員，因一次去到第二個地方採訪時發生咗一啲關於時間循環嘅奇遇，令到佢嘅人生觀點從此完全改變嘅故事。
美國上映日期
[編輯]美國嘅首映日期係 1993年2月4日，正式上畫日期係 1993年2月12日，正正係土撥鼠日之後冇耐，亦係喺2月14情人節嘅前夕，作為愛情元素嘅喜劇，完全食正哂成個氣氛。
香港上映情況
[編輯]至於香港嘅上映日期係1993年10月29號，上映咗26日嘅累積票房有 $1,248,234 港元，係全年香港外語票房榜上嘅第57位[1]。
作為正經嘅外語電影，本片喺香港並唔算十分賣座，估計原因有幾方面：
- 首先佢畀其它同期上映緊嘅外語大片影響，包括有全年香港票房總冠軍嘅《侏羅紀公園》 (Jurassic Park)，又有夏理遜·福同湯美·李·鍾斯主演嘅《亡命天涯》 (The Fugitive)，同埋性感女神莎朗·史東擔大旗嘅《偷規》 (Silver)，加上撞正同樣係玩浪漫愛情喜劇元素，由湯·漢斯及美琪·賴恩合演嘅《緣份的天空》 (Sleepless in Seattle)；至於港產片方面，因為嗰期冇咩號召力嘅大片或者有叫座力明星嘅作品上映，所以對本片票房影響唔太大。
- 另外，香港人認識標·梅利普遍都只係因為佢拍過《捉鬼敢死隊》 (Ghostbusters) 嘅電影系列，而佢喺上述電影裡頭嘅角色演譯係屬於浮誇一類，呢個同佢本身一直被打造為螢幕笑匠有關，本片正正係佢轉型之作，加上佢個人形象方面亦達唔到所謂嘅型男、猛男、靚仔之類一啲吸引人嘅元素，相信因為呢啲固有印象，令啲觀眾一時間好難將呢位阿哥同愛情浪漫聯想埋一齊；
- 女主角方面，模特兒出身嘅安迪·麥杜維喺電影嘅作品並唔多，雖然佢曾經憑住首次參演嘅獨立電影《性感的謊言》 (Sex, Lies and Videotape) 被提名金球獎最佳戲劇類電影女主角提名，及後喺本片上映之前亦曾經同開始冒起嘅男星布魯斯·韋利斯合拍過一齣動作喜劇《虎膽神偷》 (Hudson Hawk) ，可惜普遍香港觀眾對佢仍未有深印象，就算加上佢有幫某幾個知名品牌做代言人，但喺香港嘅知名度始終都唔係好高；
- 最後關於個戲名，佢用上「偷天」兩個字，好大程度會令人一時間唔明佢嘅「情緣」係來源於乜嘢戲劇種類……
基於上述種種主觀與客觀因素，喺要用真金白銀買飛入場嘅前提之下，相信係導致本片畀多數觀眾擺喺睇戲選單上嘅較後位置，甚至有所忽略嘅原因。
主要劇情 (含劇透)
[編輯]有一個叫做菲爾（Phil Connors）嘅電視天氣報導員，佢為人自私自大，成日覺得自己懷才不遇，而且又口不擇言，所以佢身邊嘅人都覺得佢好乞人憎。
有一次佢被派去賓夕凡尼亞州（Pennsylvania）嘅一個小鎮普蘇塔尼（Punxsutawney）採訪北美地區裡頭最盛大嘅土撥鼠日慶祝活動。呢個小鎮喺每年二月二日冬天就嚟過嘅時候，鎮民都會喺呢日早上聚集埋喺一個大公園裡面參加小型嘉年華會，然後等睇鎮長主持一個特別嘅交流儀式，主要係睇一隻又係叫做菲爾（Phil）嘅土撥鼠會唔會「講嘢」，如果佢「話畀」鎮長聽佢睇唔到自己嘅影子，即係冬天好快過去，而春暖隨即降臨，相反如果佢話睇到影子嘅話，即係冷天可能重會持續起碼六個禮拜；而當日夜晚，佢哋亦會喺社區會堂開舞會，同埋有個慈善競投單身佬嘅環節。
到咗節日嘅前一日，報導員菲爾聯同美麗女導演麗塔（Rita）同埋攝影師拉利（Larry）三個人一齊嚟到呢個小鎮，佢哋分別下塌唔同嘅酒店同旅館之後，菲爾佢嘅個人奇幻旅程就正式開始。
第二日，即係二月二日土撥鼠節嘅正日 (土撥鼠日）。呢一朝早，喺櫻桃樹旅館其中一間房嘅床頭上，一部翻字式嘅收音機鬧鐘準時六點響起，伴隨住電台播放住 Sonny & Cher 嘅歌曲 "I Got You Babe"，菲爾揦口揦面滿心煩厭咁起身去執嘢裝身，開始準備今早嘅採訪。喺菲爾求求其其咁完成工作之後，呢隊採訪三人組係原本打算喺中午前趕返去公司報到，但係離開普蘇塔尼嘅路已經俾大雪封咗，於是菲爾佢哋就被迫掉頭，要喺小鎮留多一晚。
第二朝菲爾一覺再次醒來，佢發現身邊發生嘅一切事情竟然同昨日一模一樣，之後每一朝瞓醒都係咁，原來佢墮入咗時間嘅循環，不斷咁重複佢經歷過嘅同一個土撥鼠日，而佢完全唔知點脫離，於是開始做埋哂好多奇怪行為，甚至為非作歹，就算被拉咗去坐監，一夠鐘都會喺旅館張床上畀鬧鐘嘈醒；到唔知第幾個土撥鼠日佢玩厭咗終於頂唔順，於是自尋短見，但天要整佢，邊得畀佢咁容易話死就死？一睜眼，早上六點鐘，收音機鬧鐘，"I Got You Babe"，土撥鼠日。
然後，又喺唔知第幾個相同嘅土撥鼠日，佢發現自己對女導演麗塔有好感，於是忽發奇想，希望利用時間循環喺一日之內令女導演對自己改觀，可惜事與願違，人哋一早聽聞菲爾係一個仆街，所以就算點呃點氹，麗塔始終都係將菲爾拒之門外，菲爾終於明白，勉強原來真係冇幸福。
喺無數個土撥鼠日之後，事實上菲爾喺呢個小鎮上玩又玩過哂，死又死唔去，走又走唔出去，想救嘅人救唔到，小鎮裡面發生嘅每一件大小事每一個人佢都瞭如指掌，就連嗰陣微風幾時幾分幾秒吹過嚟佢都知道，唯一就係攪唔掂麗塔，之不過仲有件事佢唔知道，就係佢做人心態慢慢咁發生咗改變。
之後嘅某個早上六點鐘，收音機鬧鐘又再響起 "I Got You Babe"，菲爾濛濛鬆鬆咁睜開眼，一隻懶洋洋嘅纖纖玉手跨過菲爾嘅身上去撳熄咗個鬧鐘……
主要出場人物同埋演出者
[編輯]- 電視台播報員菲爾：標．梅利（Bill Murray）
- 女導演麗塔：安迪．麥杜維（Andie Macdowell）
- 攝影師：基斯．伊利沃（Chris Elliott）
參考資料
[編輯]- ↑ Facebook 專頁：「香港電影票房全紀綠」