全·城滙

全·城滙（英文：Parc City）係香港荃灣西站（五區）城邊發展項目（Tsuen Wan West（TW5）Cityside Development），喺新界荃灣區大河道98號，前身係荃灣運輸綜合大樓。根據港鐵公司於2011年已獲批嘅規劃，可以建共7座物業，包括1至8座（唔設第4座），圍繞圓形內園而建，提供約953伙單位，包括1房戶至3房戶，當中主打兩房戶。由華懋集團及港鐵公司發展，建築師係王歐陽建築師事務所，承建商係金門建築。項目於2017年8月被命名，同年10月全盤售罄。並於2019年4月10日入伙。本項目基座商場就係如心廣場二期。^[1]

簡介

項目英文Parc即係法文入面公園嘅意思，Parc City寓意項目被公園圍住，係園中之園。項目附近被多個公園包圍，例如荃灣公園、如心化石公園等，項目亦自設園林。

住宅

屋苑設有7座，16至45層物業，第1至3座位於屋苑南方，樓層較低，面向西南方嘅單位可享海景。第5至8座樓層較高，大部分單位嘅景觀以內園及荃灣樓景為主。項目提供1房至3房，九成單位為2、3房單位，其中五成半屬於2房戶，共有521伙。3房單位則有342伙，實用面積由763至859方呎不等。部分單位可能受噪音影響，單位嘅大廳或睡房設有固定玻璃窗，以紓緩噪音。

設施

會所位於3樓，面積約3.1萬方呎，提供健身室、閱讀室、室外泳池、電影室、音樂室同埋兒童玩樂區等設施。戶外設逾2.39萬平方呎公用花園或遊樂地方。停車場提供89個住宅車位，住戶車位比例為11比1。

商場

項目基座附設樓高2層，12萬方呎商場，由知名商場設計公司英國貝諾（英語：Benoy（英文：Benoy））負責。商場原由政府同埋九鐵持有，華懋以逾12億元購入，計劃作長線收租^[2]。商場將名為如心廣場二期（Nina Mall II ），同埋如心廣場商場聯合發展，情況類同將軍澳 PopCorn同埋元朗Yoho Mall。^[3]洽租嘅商戶包括超市、食肆、鐘表珠寶商戶等，原預計喺2019年第二季開業，到第三季進行開幕儀式。但只有MOS Burger進行裝修，準備10月中開業。到最後大多商店喺同年12月才開業。1樓租戶包括7-11便利店、吉豚屋、敏華冰廳、牛気 Nabe Urawa、饞•台式幸福食堂、湊湊火鍋‧茶憩同埋Marka House。而2樓租戶包括美國冒險樂園、意大利菜The Point、越北牛肉粉、十二味、神石焼きビーフステーキ水產専門店。

而商場公共地方亦進行簡單翻新，將原有白色嘅外牆和簡約設計改為淺木色飾面同埋更換指示牌。

商場設有5條天橋，連接區內多個商場同埋荃灣西站，可到達灣景廣場、如心廣場、荃灣西站公共運輸交匯處、海之戀、祈德尊新邨等，透過如心廣場連接荃灣行人天橋網絡，可通往荃灣市中心。2019年5月，商場一樓連同連接如心廣場兩條行人天橋率先開放。2019年7月，連接灣景廣場嘅行人天橋已開放。2019年9月16日，隨荃灣西站開放C出口而開放連接海之戀商場嘅行人天橋，透過海之戀商場連接荃灣西站。