全善

依幅油畫描繪想像中古人施捨俾窮人：施捨嘅行為，喺各大宗教中都被視為微小嘅善行。

全善（粵拼：cyun4 sin6），又叫至善，係宗教同宗教哲學上嘅概念，一般認為係上帝其中一個重要特徵，指佢有無盡嘅善。

各教諗法

睇埋：上帝

喺猶太教同基督教嘅傳統教義中，上帝係全善嘅，是為道德嘅源頭。佢會透過律法引導人行正路。例如《妥拉》嘅出埃及記入便，就講到摩西帶領猶太人逃離埃及，及後佢喺西乃山上受到上帝啟示，頒佈十誡，教導一眾信徒只可以拜上帝，仲要孝敬父母、唔可以殺人、唔可以偷竊、唔可以作假見證... 等。喺猶太教同基督教之中，依啲誡命被視為上帝賜俾人類嘅道德準則，反映佢至善嘅本性。

哲學討論

睇埋：邪惡論證

話上帝全善，意思即係話上帝係完全良善嘅，佢嘅本質充滿愛、公義同憐憫，冇任何邪惡嘅成分。不過依個概念亦引出咗哲學同神學上嘅難題—邪惡問題。依個問題最基本個版本可以噉樣講：如果上帝係全能嘅，佢能夠消除一切邪惡；如果上帝係全知嘅，佢早就知道邪惡會發生；而如果上帝係全善嘅，佢應該唔會容許邪惡存在。但現實表明，世界充滿咗痛苦、災禍同罪惡。因此，上帝嘅概念似乎同邪惡嘅存在互相矛盾。

睇埋

• 善