全真派

全真派係道教祖師王重陽創立嘅宗派，傳承鍾離權、呂洞賓兩位祖師嘅金丹大道，主張性命雙修、三教合一，又被稱爲道教北宗。

王重陽祖師收咗七個徒弟，即係馬鈺、譚處端、劉處玄、丘處機、王處一、郝大通、孫不二，被稱爲北七真，又叫做全真七子。

全真派又叫做全真教，有道觀，有出家道士，有嚴格嘅戒律。出家道士必須獨身、持戒、素食、清淨修行。著名嘅全真教道觀有北京白雲觀、武漢長春觀等等。

始於王重陽嘅道教北宗，同始於張紫陽嘅道教南宗，都係師承自鍾離權、呂洞賓兩位祖師，係道教界公認嘅金丹大道正宗傳承。

民間有好多講述王重陽同全真七子修道故事嘅傳記、小說，例如《金蓮正宗記》、《金蓮仙史》、《七真因果傳》等等。