兩種起屋人嘅比喻

出自維基百科,自由嘅百科全書

兩種起屋人嘅比喻係耶穌講嘅一個比喻,記載喺《新約聖經》《馬太福音》第7章第24至27節同埋《路加福音》第6章第47-49節。

聖經譯文[編輯]

所以,所有聽聞我呢啲話去實行嘅人,係好似一個聰明人將間屋起喺磐石上;雖然受到風吹、雨淋,水沖,間屋亦唔會冧,因為佢嘅根基立喺磐石上。但係,聽聞我呢啲話而唔去實行嘅人,係好似一個愚蠢嘅人,將間屋起喺沙土上;一遇到風吹、雨淋、水沖,間屋就冧落嚟,而且冧得好交關。

——《馬太福音》7章第24至27節

我話你哋知,嗰啲來到我呢度,聽我嘅話而去實行嘅,係好似乜嘢人?佢好似一個起屋嘅人,挖深地土,將根基安喺磐石上;洪水氾濫沖擊嗰間屋嘅時候,間屋點都唔會搖動,因為根基立喺磐石上。但係,嗰啲聽咗我嘅話而唔去實行嘅人,好似一個人喺土地上起屋冇立根基;水一沖,間屋即刻冧,造成極嚴重嘅損壞。

——《路加福音》6章第47-49節

解釋[編輯]

耶穌舉咗兩種打地基嘅基礎:一種係磐石,一種係沙土地。喺呢兩個基礎上,起屋嘅人可能都係用咗一樣咁多嘅時間、氣力,用咗同樣質量可靠嘅建築材料,起出嚟嘅屋睇落都一樣咁靚。但係,當遇到大雨衝擊、洪水浸泡、狂風吹襲嘅時候,起喺沙土地上嘅屋好快就會冧,只有起喺磐石上嘅屋可以喺風吹雨打之中仍然好穩陣唔會搖動。

耶穌運用呢個比喻,要話畀我哋知一個道理:就好似房屋嘅根基一定要立喺堅固嘅磐石上一樣,我哋嘅信仰亦都一定要建立喺上帝真理嘅話語之上。耶穌嘅比喻話畀我哋知:聽我嘅話而去實行嘅,就係佢嘅根基立喺磐石上,將信仰建立喺上帝嘅話語之上。耶穌將聽道並遵行嘅人叫做:「聰明人」,將聽道但係冇去實行嘅人叫做:「愚蠢嘅人」。聰明嘅人將上帝嘅話語放喺首位,一心渴慕並且盡力遵行,佢依靠上帝嘅話語面對患難、經歷苦難,勝過試探。愚蠢嘅人將自己嘅諗法同需要作為首要嘅考慮,將上帝嘅話語作為輔助嘅建議,上帝嘅話語只係佢人生當中錦上添花嘅嘢,當佢遇到個人嘅諗法同埋需要,同上帝嘅話語唔一致嘅時候,佢嘅選擇就係順從個人嘅私欲,放棄上帝嘅話語;噉樣嘅人喺患難、試探面前冇一顆堅定信靠嘅心,因此往往會跌倒、企唔穩。

耶穌嘅登山寶訓,係以兩種根基嘅比喻做結論,高潮係強調聽道同行道嘅教訓[1]

參考[編輯]

  1. (PDF). 原著 (PDF)喺2021年2月11號歸檔. 喺2019年7月23號搵到.