六點半左右新聞報道

出自維基百科,自由嘅百科全書
六點半左右新聞報道
Most News

《六點半左右新聞報道》新聞片頭
類型娛樂港式幽默惡搞、偽新聞節目
主持毛記電視偽員
主演毛記電視偽員
國家/地區 香港
語言粵語港式英語港式普通話
每集長度唔定
製作
製作人毛記電視[1]
拍攝地 香港
播映
首播頻道毛記電視
圖像制式16:9 HD
播出國家/地區 香港
播出日期2015年5月18號
出面網頁
官方網站

六點半左右新聞報道》(英文Most News),係網絡傳媒平台毛記電視主打節目。節目喺2015年5月18號隨毛記電視啟播而首播,隨著2016年7月25號嘅節目改革改做唔定期播出。

節目內容[編輯]

  • 節目名惡搞自無綫新聞《六點半新聞報道》,口號係「毛記新聞,事事花生」(「花生」係香港網絡文化用語,即「冷眼旁觀」)。
  • 節目主要報導一啲網民關心嘅現實同網絡事件,同時亦藉節目唔停向一啲近期發生嘅事件「抽水」,以惡搞、即場實測、案件重演、電話訪問等方式回應相關事件。
  • 節目聲稱「六點半『左右』」播放,實際播放時間唔定,甚至更有喺第二日清晨六點半上載嘅情況。所以任何上載時間都喺六點半「左右」嘅範圍之內,因此節目永遠可以「準時」播出。
  • 節目第一集喺2015年5月18號晚7:40上載頭一集,由𡁻海珠(譚淇淇飾)主播,奠定六點半「左右」上載節目嘅唔準時慣例。[2]
  • 節目唔定期會加入「天氣報告」、「體育新聞」、「交通消息」或「財經消息」環節,但多數喺廣告商贊助下先至播出。
  • 雖然節目以幽默惡搞做重點,但遇上認真而傷心嘅事,節目主播會取消惡搞內容,認真報道嗰單嘢。

主播同嘉賓[編輯]

節目採用毛記電視偽員擔任主播同埋演員,亦經常揾嚟唔同名人客串參與,譬如:

特備節目/節目調動[編輯]

  • 2015年11月4號:播出《六點半左右財經報道》,報道香港租金昂貴嘅問題。
  • 2015年11月27號:播出由陳珍妮主持嘅天氣報告,並電話訪問前天文台台長林超英講解氣候變化
  • 2015年12月28號至2016年1月1號:播出《2015年實事回顧》系列,包括港女、小學雞、愛國、傷心、開心實事回顧。
  • 2016年農曆新年假期:年初一(2月8號)至年初五(2月12號)暫停播放,同期以《猴子偷毛賀新春》代替。
  • 2016年2月22號至23號:播出《新東補選校際時事常識問答比賽》,2016年2月23號上載。
  • 2016年5月11號:喺《萬千呃Like賀台慶》內做頭一個環節播出,主要係呼籲現場觀眾關上手機同其他電子器材,方健儀主持。
  • 2016年6月6號至11號:因應6月5號發生嘅Lancôme單方面取消何韻詩音樂會事件,節目做出以下調動:
    • 6月6號喺早上6:30播出,報道有關消息,做咗毛記電視頭一次喺即日晨早上載嘅新聞;當晚再播出多一節報道相關新聞,內容由喺法香港人Sony Chan以法文覆述何韻詩當號發出嘅聲明。
    • 6月7號及9號暫停播出節目。
    • 6月11號(星期六)加開一節報道其他新聞,頭一次喺星期六正式播放兼唔設主播,使全星期合共播出五節。
  • 2016年6月20號:節目再次暫停播放,因淘大工業村迷你倉大火順延至6月24號復播,同時開始唔定期播出,唔再固定每週播出五節新聞。

播放技術[編輯]

  • 啟播時節目下方配以走馬燈文字,內容係「抽水」方式簡報當日時事,或配合當日新聞主題而撰寫週邊資訊。
  • 啟播時採用虛擬演播室技術,一般主持喺右方,左方顯示台標或新聞圖片,有時出現兩主播喺左右邊、中間顯示台標或新聞圖片。
  • 2015年6月22號起喺《100毛》嘅Facebook專頁提供精華片段,其後喺2015年8月19號起喺毛記電視嘅Facebook專頁提供精華片段,部分集數提供足本片段。
  • 2015年8月6號起,新聞主播出鏡明顯縮細。
  • 2015年9月4號起,新聞字幕字體更改做細黑,而燈光色調方面亦有所調整。
  • 2016年5月17號起,部份集數取消走馬燈資訊(未計算特備節目等集數)。
  • 2016年5月18號起,部份集數開始走出虛擬演播室,用毛記電視總部外實景拍攝(未計算大型實體表演預告等集數),更陸續有新主播登場。

參考[編輯]

  1. 新聞片尾字幕顯示各製作人係「袁志X」,影射現任無綫新聞總監袁志偉
  2. 點半左右新聞報道 18/5 I go 鬧交 by bus. 原著喺2020年9月30號歸檔. 喺2017年2月19號搵到.

出面網頁[編輯]