利百加
| 利百加 | |
|---|---|
.jpg) 1775 年一幅油畫，描繪想像中嘅利百加 | |
| 原文名 | רִבְקָה |
| 配偶 | 以撒 |
利百加（希伯來文：רִבְקָה，英文：Rebecca / Rebekah）係希伯來聖經同舊約聖經入便嘅人物，係族長亞伯拉罕之子以撒嘅老婆，亦係以掃同雅各嘅阿媽。利百加喺《創世記》第二十四章之中首次出場，被描寫成為好客、勤力、心哋善良、信靠上帝嘅形象。
嫁俾以撒
[編輯]
希伯來聖經第一次提到利百加，係喺《創世記》第二十四章。當時講到亞伯拉罕年紀老邁，希望佢個仔以撒可以及早成家立室，但係亞伯拉罕又唔想俾佢個仔娶迦南嘅女子為妻，於是佢就吩咐佢屋企最年長嘅僕人返去佢本鄉，幫以撒搵一個新娘。僕人返到去亞伯拉罕鄉下，到達城外嘅一個水井。佢祈求上帝嘅指引，噉講：如果有位少女，唔單只俾水佢飲，仲主動幫佢啲駱駝打水嘅，就以此為記號[註 1]。
過咗冇幾耐，利百加出現，仲跟足個記號：利百加一見到個僕人，就俾水佢飲，跟住仲為佢成群駱駝打水。僕人認定爾個係上帝嘅指示，於是就拜訪利百加屋企，表明來意。利百加在場嘅多位屋企人，包括佢阿媽同阿哥，都同意爾場婚事，而利百加亦表態願意即刻起行。隨後利伯加跟隨僕人返到迦南，嫁咗俾以撒。
《創世記》第二十四章最尾係講，以撒非常鍾意利伯加，而且因為佢阿媽（撒拉）啱啱去世冇幾耐，娶到心儀嘅新娘令以撒心靈得到慰藉。
欺騙以撒
[編輯]《創世記》第二十五章記載[註 2]，以撒同利百加生下一對孖仔，以掃同雅各。等到兩個仔長大成人，以撒因為年老而盲咗，打算賜福俾身為長子嘅以掃，利百加聽到，就教細仔雅各假扮做哥哥，去取得父親嘅祝福。雅各成功呃咗阿爸，得到祝福，同時以掃得知件事之後好嬲，於是利伯加就安排雅各離家去安全嘅地方。
表面睇，利百加此舉似乎係用詭計呃丈夫，但猶太教同基督教傳統都有指出，爾件事唔可以單純視為惡行。首先，上帝早喺雅各出世前就向利百加啟示，話佢嘅大仔要服事佢嘅細仔，即係話身為次子嘅雅各應該要做承繼人，而且爾樣嘢係上帝嘅旨意。利百加嘅行為可以理解為係喺度確保上帝嘅應許實現。再者，以掃早已為咗一碗湯而將長子嘅名分賣咗畀雅各，又娶咗赫梯[註 3]嘅女子為妻[註 4]，反映佢並冇對神賜嘅名分加以珍惜[1]。
人物特質
[編輯]利百加以好客、慷慨同勤快見稱：佢喺水井邊為陌生人同埋陌生人嘅十隻駱駝打水，被視為心哋好同敬畏上主嘅具體表現；而一般認為，利百加嘅良好個性係上帝揀佢做以撒新娘嘅理由[2]。
