升學面試

升學面試係自行分配學位，學生去想入去讀嗰間學校度面試，係學校決定收學生嘅其中一個階段，除咗學生嘅成績之外，學校亦會根據學生面試嘅表現，決定收學生入去讀或可以進入下一個收生階段。面試嘅形式有好多種，但係主要目的都係要考核考生嘅學科知識、個人能力、禮貌品德等。

面試目的

• 喺短時間之內考核考生嘅綜合質素（表達能力、應對能力、個性、基本能力等）。
• 了解考生對呢間學校嘅認識、興趣同入讀嘅誠意。
• 考核同學嘅應對能力同埋說話技巧。
• 俾考生能夠認識學校嘅課程內容、前景同教學環境。
• 了解考生對日常事物嘅分析能力，對時事嘅認知。
• 評估考生對入讀呢間學校嘅誠意。

幼稚園面試

幼稚園面試形式，通常都係以下幾種：

• 每個細路由1位家長陪，分成4至5個人小組，細路自己揀玩具，老師透過觀察親子互動畀分。
• 以家庭為單位，分成3至4組喺課室自由活動，老師觀察細路同家長。
• 老師帶領親子律動操，觀察面試家庭嘅親子關係。
• 家長一齊陪同面試，一至兩個老師對一個家庭，透過面談形式了解細路嘅成長背景同家長嘅期望。
• 家長陪同細路面見校長，透過面談，畀家長了解學校嘅教學目標同教育理念，方便日後家長同學校合作能夠配合得更好。
• 細路以小組形式面見考官，家長唔可以陪同。老師會以遊戲室玩具做道具，觀察小朋友喺玩嘅過程裏面自然流露嘅行為舉止，亦會透過同小朋友傾偈，觀察佢哋對陌生人嘅反應。
• 家長唔可以陪，4至5個細路一組，由2-3名老師面試。細路會帶到唔同嘅遊戲角，一邊玩玩具一邊同老師傾偈，話題多數係圍繞日常生活。
• 以講座形式畀家長了解學校，細路就喺遊戲室自由活動，老師喺旁邊觀察；再由老師帶領家長同細路進行親子遊戲；最後由校長同主任同家長個別面談，了解佢哋嘅管教方式同期望。

常見問題：

1. 你叫咩名？
2. 你幾多歲？
3. 你係男仔定女仔？
4. 今日邊個陪你來呢度？
5. 你今日搭乜嘢交通工具來呢度？
6. 畀佢睇一啲日常物品，例如杯、牙刷、筷子等，問佢呢啲物品嘅用途或請佢示範點用。

小學面試

小學面試嘅形式每間學校都唔同，目的都係為咗了解小朋友嘅語文能力、基礎知識、自理能力等。例如有小組活動：同其他小朋友一齊玩玩具、一齊做手工等，老師觀察佢哋嘅行為、禮貌、合群性等。個別面談：老師會問小朋友一啲問題，由小朋友作答。

常見問題：

1. 你叫咩名？今年幾多歲？
2. 你有冇兄弟姊妹？佢哋喺邊度讀書？
3. 你爸爸媽媽叫咩名？佢哋做乜嘢工作？
4. 你住喺邊區？
5. 你鍾意歡咩顏色 / 食物 / 科目 / 動物 / 運動？
6. 放假嗰陣通常你會做啲乜？
7. 放假嗰陣你爸爸媽媽通常會同你去邊度？
8. 今日邊個陪你來面試？
9. 請隨便唱一首歌或講一個故事。

中學面試

中學面試會以個人或小組形式進行，個人面試：由一個或幾個主考官向一位同學發問。小組討論：主考官會出一條題目畀幾位同學討論，目的係測試同學嘅應對技巧、思考能力、領導才能、應變能力等特質。

常見問題：

1. 請介紹一下你自己。（限時1-2分鐘）
2. 你點解想入讀呢間學校？
3. 你最鍾意或者最唔鍾意邊科？點解？
4. 你有乜嘢興趣同埋嗜好？
5. 你有參加邊啲課外活動？
6. 喺你小學嘅學校生活裏面，邊樣係你最難忘嘅經歷？
7. 你認為自己有邊啲優點同缺點？
8. 你得閒嗰陣會做啲乜？
9. 你對將來有咩期望？
10. 你將來想投身乜嘢行業？

大專/大學面試

大專或大學每個學系嘅面試時間同形式都有唔同，大部份面試都會先畀同學1-2分鐘自我介紹，然後再進入其他環節，最後亦會畀時間同學自由發問有關學科嘅問題。

常見問題：

1. 請介紹一下你自己。（限時1-2分鐘）
2. 點解報讀呢科？點解唔將呢個學系放喺第一志願？
3. 你有邊啲課餘活動同嗜好？咁多活動裏面你最鍾意同維持得最耐嘅係邊樣？有乜好處？
4. 有冇擔心畢業之後嘅前途？
5. 將來嘅工作目標係乜嘢？
6. 點解選擇呢間大學？你認為讀大學嘅目的係為乜？
7. 專科課程想專注邊啲科目？
8. 性格測試：以遊戲解讀個人性格取向。
9. 最近邊樣新聞你最有興趣？請提出你嘅意見。
10. 你有咩問題想問我哋？