博士茶

花

植物

博士茶（Rooibos），學名Aspalathus linearis，係種生長係南非凡波斯生物群系地區，生得好似掃把咁嘅豆科植物。佢嘅葉可以用嚟做無咖啡因嘅草本茶，一直以來深受南非國民喜愛。自2000年起，博士茶名噪國際，佢嘅味道帶種大地氣息，香氣似瑪黛茶或煙草。

用博士茶沖出嚟嘅茶叫南非博士茶、南非國寶茶或路易波士茶。博士茶個名（rooibos）源自南非荷蘭文（rooi bos），意思係「紅色灌木」。博士茶呢個名受到南非同歐盟嘅「原產地名稱保護」嘅維護。

生產同製作過程

綠博士茶

玻璃杯中嘅博士茶

博士茶加奶

博士浸茶甜酒同博士茶

博士茶主要生長係錫德山（Cederberg），一座座落於南非西開普省西海岸區級市鎮嘅小山。

通常，博士茶會經過氧化 。呢個過程令佢有標誌性嘅啡紅色澤，同會加強佢嘅風味。雖然都會生產冇經過氧化嘅綠博士茶，不過因為工序繁瑣（同綠茶嘅生產過程差唔多），所以比傳統博士茶貴。綠博士茶帶有微微嘅麥芽同青草香，同紅博士茶唔同。

用途

博士茶通常作為草本茶咁飲，浸係熱水到，同沖紅茶差唔多。博士茶可以唔加野直接飲，或者加牛奶、檸檬、糖或蜂蜜嚟飲。博士茶仲可以以意式鮮奶咖啡、泡沫咖啡或凍茶嘅方式飲用。

化學成份

博士茶嘅新鮮葉有高含量嘅抗壞血酸（維他命C）。

博士茶冇咖啡因 ，單寧酸含量比紅茶同綠茶低 。博士茶含多酚、包括黃烷-3-醇（flavanols）、黃酮類化合物（flavones）、黃烷酮（flavanones）、二氫查耳酮（dihydrochalcones）、阿司巴汀（aspalathin）同諾瑟法根（nothofagin）。

經加工嘅葉含有苯甲酸（benzoic）同肉桂酸（cinnamic acids）。

評級

博士茶嘅評級主要係睇針葉同莖嘅百份比。葉片含量越高，沖出嚟嘅茶色澤就會越深、味道更豐富同埋飲完無咁口乾。評級高嘅博士茶會出口國外，唔會留係本地市場。博士茶嘅主要客群係歐盟成員國，尤其係德國，佢哋會將博士茶做成調味茶，供應比散裝茶市場。

環境問題

博士茶係南非西開普省一小塊地方嘅特有物種。佢同南非本土微生物有共生關係 。係2012年，一則南非新聞指出，在氣候變遷嘅威脅下，博士茶嘅種植前景堪憂 。

博士茶嘅使用同擴張嘅耕地，威脅住南非本土特有嘅動植物，如大葉海神花（Protea convexa）、鋸齒捕蠅幌（Roridula dentata）同蓟花海神花（Protea scolymocephala）。