反英雄

唐吉訶德（右手邊騎住馬嗰個）被指係文學中反英雄嘅例子。

反英雄（粵拼：faan2 jing1 hung4；參見英文：antihero）係有關故事同角色嘅概念，指某個角色缺乏典型嘅英雄性格、但係就喺故事中做出英雄噉嘅行為。例子：華利奧份人好貪錢，而貪錢一般認為係英雄唔應該有嘅特徵；有一日，佢見到一班海盜捉走公主，而且班海盜仲收埋咗好多財寶，於是華利奧就出發，諗住要去搶海盜嘅財寶（唔似英雄嘅動機）；及後華利奧成功打低作惡嘅海盜，順便拯救埋公主（做出英雄嘅舉動）。反英雄型嘅角色可以係主角，而且自從二十世紀後半就吸引咗唔少讀者同觀眾。

情節

睇埋：奸角、對立角色同英雄旅程

傳統上，英雄一般會描寫成正直、無私、守法、有明確道德、願意作出犧牲嘅人物；佢哋嘅動機包括有保護弱者、維持秩序、對抗邪惡，手段相對克制而且透明。相對之下，反英雄就性格帶灰，佢哋嘅動機可能摻雜私利或者復仇、手段偏激或投機、紀律鬆散，甚至有道德上嘅缺點。不過，佢哋最終仍然可能阻止遠遠比佢哋邪惡嘅人、保護同伴，或者在關鍵時刻做出英雄噉嘅抉擇—同傳統英雄形成對照。

由英雄旅程嘅概念思考，傳統英雄受感召嗰陣就會踏上旅程。相比之下，反英雄好多時都唔想去，因為冒險始終可以係一件好危險嘅事。反英雄缺乏捨己為人又勇敢嘅性格，可能覺得冒險唔夠著數所以唔想去，又或者可能佢性格懦弱怕死，寧願留喺屋企（安全嘅地方）。但無論係點，故事梗會有某啲力量誘使或者迫佢去冒險，例如覺得冒險唔夠著數嘅英雄可能會突然收到料話冒險有奬金，而懦弱型嘅英雄就可能會畀第個角色迫佢出發，唔想去都要去。

呢幅畫描繪《奧德修記》當中講到，奧德修斯喺海上漂流返唔到家鄉—英雄好多時寧願留喺屋企唔去冒險，但冇得揀。 呢幅畫描繪《奧德修記》當中講到，奧德修斯喺海上漂流返唔到家鄉—英雄好多時寧願留喺屋企唔去冒險，但冇得揀。

例子

自從二十世紀起，現代嘅虛構故事作品就一路出咗唔少反英雄。

童話故事《著長靴嘅貓》中嘅主角長靴貓亦被指為反英雄。佢有魅力、身手了得，但同時精於投機同埋詭計，時會以名聲或者個人利益為先。佢誅殺四圍害人嘅食人魔，救咗唔少人嘅命，作出英雄之舉，不過同時佢為咗達到目的而講咗唔少大話，四圍去呃人。

華利奧（Wario）係馬利奧系列中嘅對立角色，係主角馬利奧嘅其中一個死對頭。佢以自身利益為先，最鍾意有方法搵錢，仲成日用埋晒一啲取巧、唔光彩嘅方法達成目標。喺多部衍生作品之中，故事都係講佢為咗錢或者寶藏而走上冒險旅程，期間順便打低比佢更邪惡嘅反派角色，例如：有一日，華利奧見到一班海盜周圍掠奪，仲捉走咗公主；華利奧於是就出發想打低班海盜，原因唔係想伸張正義，而係想去搶奪海盜嘅財寶；及後佢成功打低海盜首領，順便營救埋公主。

賽佛勒斯·石內卜（Severus Snape）係《哈利波特系列》中有爭議性嘅角色。佢外表冷漠、態度刻薄，甚至多次俾主角哈利仔同哈利仔嘅朋友視為敵人，但實際上佢一直暗中保護哈利，亦為阻止佛地魔而犧牲自己。佢嘅動機混合咗愛、內疚同埋復仇心，喺善惡之間遊走，被指係體現咗反英雄複雜而多面嘅性格。

漫威嘅反英雄角色：

• 月光騎士（Moon Knight）係漫威旗下嘅超級英雄。佢心理複雜，患有解離性身份障礙。佢以暴力手段對付罪犯，暴力到其他漫威英雄有時覺得佢仲危險過啲罪犯。月光騎士雖然行為極端，但佢內心仍有正義感同救贖嘅慾望，喺光明與黑暗之間掙扎。
• 又或者係銀河守護隊噉。呢支超級英雄隊伍由盜賊、賞金獵人、殺手同埋逃犯組成，其成員初頭為咗生存、報酬或私人恩怨而行動，同「高尚動機」有距離。不過，佢哋往往喺關鍵時刻合力阻止宇宙級嘅威脅、保護平民。

睇埋

• 假主角
• 悲劇英雄
• 黑暗三角
• 數碼朋客