叢林奇譚

初版封面

《叢林奇譚》（The Jungle Book）係喺一八九四年出版、到咗廿一世紀都仲相當受歡迎嘅英國故事集。

《叢林奇譚》係英國作家 Rudyard Kipling 喺一八九四年出版嘅故事集。書入面大部分角色都係動物，例如老虎 Shere Khan 同熊 Baloo；不過，最主要嘅角色之一就係一個叫 Mowgli 嘅男仔，即係所謂嘅「人類幼崽」（man-cub）。佢由狼群喺叢林入面養大。大部分故仔都喺印度一片乾旱森林入面發生；書中成日提到一個叫「Seeonee」嘅地方，即係而家嘅 Seoni，位於印度中部嘅中央邦（Madhya Pradesh）。

本書其中一個重要主題，就係「俾人丟低之後，得到人哋收養」，Mowgli 嘅一生正正體現咗呢一點，亦呼應咗 Kipling 自己童年嘅經歷。呢個主題亦可以喺其他主角戰勝敵人嘅故事入面見到，例如 Rikki-Tikki-Tavi 同《白海豹》（The White Seal）入面嘅主角，以及 Mowgli 本身。另一個重要主題就係 規律 同 自由。呢啲故事唔係單純講動物點樣生活，更加唔係講達爾文式嘅「弱肉強食」；佢哋其實係透過動物嘅形象，呈現人類嘅各種原型（archetypes）。

故事教人尊重權威、服從規則，同埋知道自己喺社會入面應該身處咩位置，亦即係所謂嘅「叢林法則」。但同時，故事亦展示咗人可以自由咁穿梭於唔同世界之間，例如 Mowgli 可以喺叢林同村莊之間來往。評論家亦指出，呢啲故事入面有一種非常強烈嘅野性同無法無天嘅力量，反映出人性入面唔負責任嘅一面。

《叢林奇譚》一直都深受歡迎，其中一個原因係佢多年嚟改編成電影同其他媒體作品。評論家例如 Swati Singh 指出，即使有啲評論家因為認為 Kipling 帶有帝國主義思想而對佢有所戒心，佢哋仍然十分欣賞 Kipling 講故事嘅感染力 。本書亦對童軍運動產生咗相當大嘅影響。童軍運動創辦人 Robert Baden-Powell 同 Kipling 係朋友 。至於 Percy Grainger，就以本書入面嘅文字引用作為素材，創作咗佢嘅 Jungle Book Cycle。