史察福

出自維基百科,自由嘅百科全書
跳去: 定向搵嘢
史察福火車站
伊利沙伯奧運公園

史察福英文Stratford,又譯斯特拉福特[1]史翠福[2]),係英國倫敦嘅一個地方,係倫敦紐咸區嘅一部分。史察福位於倫敦查令十字以東北六英里(十公里),係倫敦都市規劃藍圖其中一個核心。史察福火車站係東倫敦重要嘅交通樞紐。

史察福本來係一條農村,隸屬雅息士郡。1839年,鐵路網開到史察福,將史察福變成一個工業區。二十世紀中,史察福成為韋斯咸區嘅政經中心。1965年大倫敦成立,將史察福納入範圍之內。近年,史察福由工業區轉型做商業、文化區,並喺2005至2011年間大規模重建,將荒廢咗嘅工業用地變成2012年倫敦奧運主場伊利沙伯奧運公園

歷史[編輯]

地名[編輯]

史上第一次有文獻記載「史察福」呢個地方係1067年嘅事。當時嘅古英語地名串法係Strætfordi,字面解釋係「大路上嘅漫水橋」。呢條漫水橋係由倫敦去高車士打羅馬大路中,要過李河(River Lea)嘅必經之路。附近嘅寶區亦都曾經用過Stratford呢個名,所以史察福又會用Estratford「東史察福」、Statford Hamme「咸區嘅史察福」(指韋斯咸)、或者Abbei Stratford「修道院史察福」,方便搞清楚兩條村[3]

發展史[編輯]

史察福本來係一條農村,好近倫敦,所以嗰度嘅農產品大有市場。晌十八世紀,史察福一帶出名種薯仔,薯仔產業一路蓬勃至十九世紀中葉[4]。最早入主史察福嘅工業係一間陶瓷廠。兩位本地瓷器師傅(Edward Heylin同埋Thomas Frye)用一個晌1744年申請咗專利嘅方法,喺史察福開工廠,燒製低溫瓷器[5][6]

史察福火車車廠1921年個樣

十九世紀初,史察福變成一個交通樞紐,交通公具有巴士馬車、同埋蒸氣車。一個鐘有四班公共交通由史察福入倫敦,重有一個鐘一班車由東盎格利亞各地路過史察福入倫敦[7]。李河上又有船塢,滿足呢度運輸業同製造業需要,史察福嘅皇家船塢(en:Royal Group of Docks)甚至一度成為全世界最大嘅人工港口[8]。英國大東鐵路又喺史察福起咗一個轉車站同埋一個車廠,作為由倫敦去劍橋同埋高車士打途中嘅大站。呢個車廠越做越大,高峰期有成2500個僱員。呢啲僱員好多都住喺呢度,催生「新史察福鎮」,十九世紀中葉人口有兩萬咁多[9]。呢個車廠一直運作到1991年先執笠,運作百幾年間整咗1682個火車頭、5500卡載客車廂、33000卡載貨車廂[10]

參考[編輯]