咖喱魚蛋

咖喱魚蛋

咖喱魚蛋（粵拼：gaa3 lei1 jyu4 daan2）係香港一種街頭小食，早於1950年代已有路邊熟食攤位販賣。顧名思義，用咖喱加魚蛋，魚蛋要先炸過，所以睇起嚟外層係金黃色。魚蛋原本只係使用平價嘅魚製作，好多時仲會加麵粉減低製作成本，但浸喺加有椰子漿嘅咖哩汁一齊烹煮後，魚蛋有咖哩嘅辛辣味道之餘，仲帶有椰子香氣，就逐漸演變成一種香港經典小食。

起源

咖哩魚蛋約於1950年代喺香港街頭由俗稱「走鬼車」嘅流動熟食小販開始售賣。「走鬼車」係所謂嘅冇牌熟食小販或流動熟食小販，一般係冇牌經營，缺乏監管，所以衛生方面比較參差，但「走鬼車」有嘅係大多數香港人嘅共同集體回憶。而「走鬼車」一般出現喺所謂「徙置區」嘅屋村，走平民化路線，價錢實惠又大眾化，用幾蚊港紙就可以買到串。因為香港政府嘅發牌制度繁複，制度又唔完善，問題多多，令到好多為咗揾「兩餐晏仔」嘅大眾冇辦法以正式嘅牌照經營，而冇牌經營熟食又會俾食環署執法、罰錢同充公揾食架生，因為咁樣而家愈嚟愈少見到「走鬼車」，大多數賣魚蛋嘅地方都變成舖位，令到香港獨特嘅在地文化日益減少，現時要見到「走鬼車」都唔容易，多數只可以喺特定嘅日子，例如農曆新年。

魚蛋嘅咖哩汁原本係印度嘅傳統嘢食，而英國喺十九世紀統治印度次大陸後建立英屬印度，印度人就跟隨英國人嚟同樣係英國殖民地嘅香港傳入咖喱汁。而魚蛋流行於潮汕一區，喺中西合璧嘅香港，就將兩者結合成為一種經典小食。生產魚蛋首先要將魚肉打成魚漿，攞嚟製作魚蛋嘅魚肉一般都選用平價魚種，仲會喺製作魚漿嘅過程中加麵粉，可慳魚肉使用量以降低成本。事關魚肉易帶有腥味，所以魚蛋喺成型後會經過油炸處理，就魚蛋睇通常都係金黃色嘅，而且有彈牙口感。事關咖哩含有香料，經咖哩烹調後嘅魚蛋變得色香味齊全。

售賣

咖哩魚蛋一般係以串為單位使用竹籤將魚蛋賣出去，好多時候魚蛋一路浸喺咖哩汁加熱，到有顧客幫襯嗰陣先夾出嚟串起，如果顧客買得多就用紙袋裝住，而家就較多用紙杯或者發泡膠杯。喺60年代嘅咖哩魚蛋售價好平，成為學生放學後好受歡迎嘅零食，並一直流傳到而家，係香港必食之一，仲曾經喺旅遊網站成為全球十大街頭美食嘅榜首。雖然咖哩魚蛋曾經係平嘢，但隨住香港經濟發展同物價上升，加埋以前俗稱「走鬼車」流動熟食小販都已經被取代，好多熟食檔都要兼顧交租，所以而家嘅售價唔係特別平。