哈希姆家族

出自維基百科,自由嘅百科全書
跳去導覽 跳去搵嘢
聖裔哈希姆王朝旗

哈希姆(阿拉伯文:هاشمي),又叫哈希姆王朝,係現存嘅一個家族,舊時係古來氏多個部落嘅其中一個,先知穆罕默德就係呢個家族出身。響近代,呢個王朝統治過漢志伊拉克敘利亞,到目前依然掌控住約旦王位。

簡史[編輯]

早期[編輯]

哈希姆一開始係古來氏多個部落嘅其中一個氏族,亦係巴努哈希姆嘅分支,原本叫「阿穆爾」。家族名就嚟自哈希姆·伊賓·馬拿夫,先知穆罕默德個阿太。據說佢曾經響一次旱災攞出嘢食畀人,所以就改名叫「哈希姆」。

哈希姆家族成員雖然係穆罕默德嘅女系後人(佢哋係穆罕默德四女法堤馬同阿里所生嘅後人),但佢哋淨係尊法堤馬為家族祖先。

1201年起,哈希姆家族得到世襲銜頭「麥加謝里夫」。

阿拉伯起義[編輯]

侯賽因:哈希姆家族成員,阿拉伯起義嘅發起人之一,亦係核心人物

1908年,阿卜杜拉·伊拉帕沙個仔侯賽因·賓·阿里繼承咗銜頭「麥加謝里夫」。侯賽因發覺自己開始同當時控制伊斯坦堡青年土耳其黨人敵對;加上話嗮自己都係先知穆罕默德嘅後人,血統唔算低賤,就開始想建立一個完全獨立、脫離奧斯曼帝國嘅阿拉伯國家。雖然奧斯曼方面一早有估到,但侯賽因多次扮到自己好似好忠心,因而對佢冇太大懷疑。

侯賽因有五個仔,其中二仔阿卜杜拉·賓·侯賽因係最有野心嗰位。佢曾經係奧斯曼帝國議會麥加地方代表,期間開始對阿拉伯民族主義有興趣。1914年一戰爆發,侯賽因響阿卜杜拉嘅建議下先表面上扮係支持奧斯曼帝國;另一方面又派人到英國談判,同英國駐埃及高級專員哈里·麥洪見面,侯賽因表示希望起義成功之後建立一個強大嘅阿拉伯國家,而哈里·麥洪就表示同意佢哋建立,但唔可以霸埋同英國有利益嘅跟據點。

1916年6月,響湯馬士·勞倫斯協助下,侯賽因正式發動阿拉伯起義。佢響漢志地區宣佈獨立,建立漢志王國。呢場起義,雖然係令到奧斯曼帝國解體,但由於英國早就同法國偷偷地簽咗《西斯-皮科協定》,所以響起義後侯賽因並冇好似理想咁建立一個大阿拉伯國,而係畀人分咗啲地:敘利亞畀咗法國,伊拉克、外約旦、巴勒斯坦就畀英國搶走。響土耳其宣佈廢除哈里發一職之後,侯賽因又宣佈自己係哈里發。

近代[編輯]

侯賽因同仔女先後建立唔同政權:

  1. 漢志王國
  2. 外約旦(即依家嘅約旦
  3. 伊拉克王國
  4. 敘利亞王國

其中由於侯賽因建立咗漢志王國,觸動咗伊本·沙地條神經(伊本想要統一阿拉伯半島),所以伊本響1924年出兵打漢志。侯賽因被迫唔撈,將王位交畀大仔阿里·賓·侯賽因,但阿里上任唔夠一年就畀伊本推翻,漢志王國玩完。

二仔阿卜杜拉1921年響英國委派下到外約旦做埃米爾;但外約旦依然英國殖民地。去到二戰,佢睇到英國顧住同納粹德國打、戰後已經唔可以好似以前有咁大實力,就響1946年宣佈獨立。1950年,外約旦改名做約旦。依家約旦國王係阿卜杜拉二世,係阿卜杜拉個太孫。

三仔費薩爾曾經做過敘利亞國王,之後敘利亞畀咗法國,佢就走去英國。後嚟英國擔心伊拉克局勢會變差、自己好難出手管,於是就搵嚟費薩爾做伊拉克國王,佢本人接受咗邀請,響1920年登基。去到第三任(即最後一任)國王費薩爾二世,因為親英嘅作風,響1958年由軍官發動嘅政變入面死咗,伊拉克王國玩完。

世系圖[編輯]

哈希姆家族世系圖

王國[編輯]

約旦[編輯]

約旦王室徽

約旦,全名約旦哈希姆王國,由侯賽因二仔阿卜杜拉響1921年建立。

一戰之後,約旦地區交咗畀英國管。去到1921年,英國決定用約旦河做分水嶺,西邊叫巴勒斯坦,東邊叫外約旦(響阿拉伯文嘅意思係「東約旦」)。英國響國際會議上,將外約旦建立成一個半自主保護國ー外約旦酋長國,立阿卜杜拉做酋長。

二戰後,阿卜杜拉睇到英國實力變差,就響1946年5月25號宣佈獨立,國名改叫「外約旦哈希姆王國」;兩年後外約旦成功佔領西邊嘅巴勒斯坦地區。1950年,外約旦改名叫約旦。

依家約旦國王係阿卜杜拉二世

約旦歷代國王
在位時間
阿卜杜拉一世 Abdullah bin al-Hussien as a member of the Ottoman parliament.jpg 1921年4月11號ー1946年5月25號 侯賽因二仔
塔利拉·伊本·阿卜杜拉 Talal of Jordan.jpg 1951年7月20號ー1952年8月11號 阿卜杜拉一世大仔
因為精神有問題
而將王位交畀大仔侯賽因
侯賽因一世 King Hussein in uniform in 1953.jpg 1952年8月11號ー1999年2月7號 塔利拉大仔
阿卜杜拉二世 King Abdullah II of Jordan 2018.jpg 1999年2月7號ー 侯賽因大仔
老豆本身立咗哈桑王子做王儲
臨死前改立佢做王儲

伊拉克[編輯]

伊拉克王國徽

伊拉克王國嘅開國君主係費薩一世

1920年,英國擔心自己遠響歐洲,管唔住局勢動盪嘅伊拉克,所以就搵嚟親英嘅費薩做國王;佢本人接受咗邀請,響一年後登基。去到1932年,英國決定放手畀伊拉克獨立,但王室依然親英,仲畀英國響當地建立軍事基地

國王嘅舉動令到阿拉伯民族主義者好反感。佢哋發動多次政變,直至1941年第五場政變成功,由親拉希德·阿里做首相。拉希德響同年4月發動英伊戰爭,希望趕走英國;但最終都係輸咗畀英軍。拉希德被迫下野,由前首相、親英嘅羅尼·賽義德上台。

但咁樣唔代表國內嘅阿拉伯民族主義者就會收手。佢哋唔可以接受英國持續控制伊拉克,又因為當地人民生活唔好,就越嚟越想踢走英國。最終響1958年,屬於自由軍官組織阿卜杜拉ー卡里·卡塞姆發動軍事政變,殺咗時任國王費薩二世同其他伊拉克王室成員。伊拉克王國玩完,阿卜杜拉ー卡里·卡塞姆成立伊拉克共和國(即今日嘅伊拉克);自此伊拉克地區就捲入多場戰爭,到依家當地局勢依然係好緊張。

費薩二世死後,佢嘅四叔公(即佢阿爺・費薩一世個細佬)扎里德·賓·侯賽因宣佈自己係伊拉克同敘利亞分支首領(政府未承認)。

伊拉克歷代國王
在位時期
費薩一世 King Faisal I, September 1933.jpg 1921年8月23號-1933年9月8號 由英國擁立
1921年登基
加齊一世 Ġāzī bin Fayṣal of Iraq.jpg 1933年9月8號ー1939年4月4號 費薩一世大仔
響1939年揸跑車出事走咗
費薩二世 Faisal II of Iraq.jpg 1939年4月4號-1958年7月14號 加齊一世獨仔
由於登基嗰陣未成年,
響18歲前由堂叔阿卜杜拉·伊拉攝政
去到1958年政變被殺
阿卜杜拉·伊拉 Abd al-Ilah.jpg 1939年ー1953年(攝政)
1953年ー1958年(王儲)
阿里·賓·侯賽因二仔
因為堂侄登基嗰陣未成年,
1939年至1953年做攝政王
1953年後出任王儲
1958年政變被殺
伊拉克分支首領

漢志[編輯]

漢志王國侯賽因·賓·阿里響1916年建立。

漢志王國響漢志地區建立。漢志地區響阿拉伯世界有住大影響力,因為佢嘅最大城市ー麥加,就係伊斯蘭教聖城。同時,漢志地區自1517年開始就由「麥加謝里夫」統治,而「麥加謝里夫」又係哈希姆家族嘅世襲銜頭,所以算得上係侯賽因嘅地盤。

1916年6月,侯賽因發動阿拉伯起義,推翻奧斯曼帝國,同月佢響漢志地區建立漢志王國。1919年,國王侯賽因宣佈自己係「阿拉伯之王」,宣稱自己已經統一阿拉伯地區。呢個舉動觸動咗另一位想要統一阿拉伯半島嘅貴族ー伊本·沙地條神經,加上伊斯蘭教兩個聖城ー麥加麥地那ー都位於漢志地區,為第日漢志王國嘅玩完留下導火線。

本身侯賽因同英國達成協議,響起義成功之後。英國要承認佢哋。但由於英國一早同法國偷偷簽咗《西斯-皮科協定》,所以阿拉伯半島並冇統一,反而敘利亞畀咗法國,伊拉克、外約旦、巴勒斯坦就畀英國。響咁嘅情況下,令到侯賽因認為英國背叛咗佢,唔再信任英國政府。漢志先後拒絕承認《凡爾賽條約》同《貝爾福宣言》。1921年,英國提出要託管漢志,侯賽因唔肯。兩年後,英國想同漢志講掂數,都畀侯賽因拒之門外。

1924年3月,響土耳其宣佈廢除哈里發一職兩日後,侯賽因宣佈自己係下任哈里發。呢次徹底激嬲伊本·沙地,認為侯賽因嘅舉動唔符合伊斯蘭教嘅傳統同教義,叫班穆斯林對漢志發動「聖戰」。另一方面,英國因為多次同漢志傾唔埋,就轉為支持伊本·沙地。

1924年8月,伊本·沙地正式出兵打漢志。伊本好快就打下大半個漢志,侯賽因響貴族、生意人等等嘅壓力下,被迫讓位畀大仔阿里。同年10月,麥加淪陷,阿里走難到吉達。最終響1925年12月,吉達都淪陷埋,阿里走佬到伊拉克,漢志王國玩完。伊本響一年後將漢志地區納入「內志同漢志王國」。

歷代漢志國王
在位時期
侯賽因·賓·阿里 ملك العرب الشريف حسين بن علي.jpg 1916年6月10號-1924年10月3號 1916年響起義入面獨立
原先係麥加謝里夫
阿里·賓·侯賽因 ‘Alī ibn al-Ḥusayn of Hejaz.jpg 1924年10月3號-1925年12月19號 侯賽因大仔
1924年老豆被迫讓位畀佢
1925年畀伊本推翻

敘利亞[編輯]

1920年3月7號,敘利亞國家大會(Syrian National Congress)成立敘利亞王國,擁立侯賽因三仔費薩(即後嚟伊拉克王國開國君主費薩一世)做佢哋嘅國王,稱號係「大敘利亞國王」。

但由於英國早就同法國偷偷地簽咗《西斯-皮科協定》,國家大會嘅決定徹底影響到佢哋嘅利益,英法兩國根本就會唔承認。所以同年4月,敘利亞由英國轉手畀法國託管,敘利亞王國實際上已經玩完。法國唔中意費薩,就要求佢最遲響6月14號投降。費薩最終投降,畀法國趕走,走難到英國。

敘利亞歷代國王
在位時期
費薩一世 King Faisal I, September 1933.jpg 1920年3月8號-1920年7月24號 由敘利亞國家大會擁立
後嚟畀法國推翻