哽喉急救法

哽喉急救法
喺度施行謙烈治法

哽喉急救法，通常指謙烈治法（Heimlich Manoeuvre，又稱腹部衝擊 Abdominal thrusts），係一種清除上呼吸道異物堵塞（哽親）嘅急救方法。美國醫生亨利·謙烈治（Henry Heimlich）通常被認為係呢種方法嘅發明者。要施行謙烈治法，急救者要企喺哽親嘅人後面，用雙手向佢嘅橫膈膜底部施加壓力。呢個動作會壓縮肺部，對攝喺氣管入面嘅異物施加壓力，務求將佢排出體外。

包括美國心臟協會、美國紅十字會同埋歐洲搶救委員會在內嘅大多數現代守則，都建議分幾個階段嚟處理氣管阻塞，旨在施加逐步增強嘅壓力。大多數守則建議先鼓勵受害者咳嗽，跟住猛力拍打背部，最後至將腹部衝擊或者胸部衝擊作為最後手段。一啲指引亦建議喺腹部衝擊同背部拍打之間輪流交替。

哽親嘅普遍徵兆

哽親嘅受害者通常講唔到嘢，亦可能發唔出太大嘅聲。國際公認嘅哽親普遍表徵，係指呼吸困難嘅患者無法出聲時所發出嘅無聲訊號——即係將雙手擺喺自己條頸上面，同時設法吸引其他人注意以求幫手。 不過有D哽親嘅人亦有可能俾唔到太多反應俾你，特別係行動不便、已經缺乏自理能力嘅長者。

技巧

腹部衝擊嘅施力點（喺胸骨同肚臍之間）。雙手向內同向上壓。

美國紅十字會同英國國家醫療服務體系（NHS）都建議，如果係第一次嘗試，急救者應該鼓勵病人透過咳嗽將阻塞物咳出嚟。第二個方法，急救者應該叫病人身體向前傾，然後喺背脊猛力拍打五次。只有喺呢啲方法都失效嘅情況下，先至建議使用腹部衝擊。

右邊嘅男士正喺度做緊哽親嘅普遍信號，將雙手擺喺自己條頸上面。

美國紅十字會、NHS、歐洲搶救委員會同埋梅約診所都建議採取一個循環，即係重複「五次背部拍打」同「五次腹部衝擊」。 呢種方法唔適用於一歲以下嘅細路。 相反，同主流嘅美國同歐洲建議唔同，澳洲急救委員會建議用胸部衝擊嚟代替腹部衝擊。

要施行謙烈治法，急救者要企喺企直嘅病人後面，用雙手喺橫膈膜底部施加強力嘅壓力。 舉個例，WebMD建議一隻手握拳，然後用另一隻手捉住個拳頭，喺病人肚臍上方用力壓落去。呢個動作會壓縮肺部，對卡喺氣管入面嘅任何異物施加壓力，務求將其排出。呢種壓力相當於人工引發嘅咳嗽。如果要幫一個身形較大嘅人，可能需要落重啲力。 梅約診所亦建議用相同嘅拳頭同手部位置，向上方衝擊，就好像急救者試圖將受害者抬起一樣。

如果受害者冇辦法喺企直嘅姿勢下接受腹部壓力（例如懷孕或者過度肥胖嘅情況），就會建議採用胸部衝擊。 呢個方法係施加喺胸骨嘅下半部分，但係唔好壓到最尾端（劍突，否則可能會搞到骨折）。

對於無法保持直立姿勢嘅受害者，美國國立衛生研究院建議將受害者平放喺地下，然後跨坐喺佢哋嘅軀幹上面進行胸部衝擊。

神智清醒嘅哽親受害者可以喺冇人幫手嘅情況下，自己對自己施行呢個程序。

由於呢個程序用力好大，就算手勢完全正確，腹部衝擊仍然有可能整傷受害者。腹部好大機會出現瘀傷，亦可能會發生更嚴重嘅傷害，包括劍突或者肋骨骨折。 NHS 建議接受過腹部衝擊嘅受害者，事後應該去睇醫生檢查。

皇家布朗普頓醫院（Royal Brompton Hospital）嘅研究人員證明咗，向內施加腹部衝擊所產生嘅胸腔內壓水平（50–60 cmH₂O），同「同時向內同向上」施力所產生嘅壓力差唔多。研究人員指出，咁樣做可能更容易操作，而且對胸廓或者上腹部器官造成受傷嘅擔憂亦會少啲。參與研究嘅人自己對自己施加腹部衝擊，所產生嘅壓力同接受急救時差唔多。其中最高嘅壓力係由參與者透過壓向一張椅嘅背脊嚟進行腹部衝擊所產生嘅（115 cmH₂O）。

如果患者已經失去意識就要施行心肺復甦法。

香港消防處簡易教程

香港消防處建議市民飲食一定要慢慢咀嚼同埋小心吞，如果見到有人鯁喉，要記得保持冷靜，鼓勵患者咳嗽，密切監察情況，如果咳唔到就要即刻打999召救護車，同埋跟下面嘅步驟，幫仲清醒嘅患者做「謙烈治法」急救：

1. 企喺患者背後企穩，用雙手由後面環抱佢嘅條腰。
2. 一隻手握拳，大拇指朝向患者個肚，再用另一隻手包緊呢隻拳頭。
3. 將對手擺喺患者腹部中線、即係肚臍上面少少，但遠低於心口骨（劍突）嘅位置。
4. 用力向上、向內咁重覆擠壓患者個肚，向佢嘅橫膈膜施壓。
5. 不斷重覆呢個動作，直至患者吐出異物為止。

歷史

胸肺外科醫生兼醫學研究員亨利·謙烈治以大力宣傳腹部衝擊而聞名，佢聲稱拍打背部會令異物塞死喺氣管入面，因而會致命。 1982年由戴、杜布瓦同克雷林喺耶魯大學進行嘅一項研究，說服咗美國心臟協會停止推薦用拍打背部嚟處理哽親，呢項研究部分係由謙烈治自己嘅基金會資助。 根據梅約診所同美國心臟協會（AHA）嘅羅杰·懷特（Roger White）醫生所講：「呢度根本從來冇乜科學可言。謙烈治一路由黎都係靠佢一套圓滑嘅策略同恐嚇嚟凌駕科學，所有人，包括我哋在內嘅 AHA 人員，最後都屈服咗。」

亨利·謙烈治亦都推廣將腹部衝擊作為治療遇溺同埋哮喘發作嘅方法。紅十字會依家已經對呢啲說法提出質疑。謙烈治研究所已經喺佢哋嘅網站上停止提倡將謙烈治法用作遇溺患者嘅急救措施。謙烈治個仔彼得·M·謙烈治（Peter M. Heimlich）聲稱，佢老豆喺1974年8月發表咗第一份虛假嘅病例報告，目的就係為咗推廣將腹部衝擊用於拯救瀕臨遇溺嘅人。 美國心臟協會 2005 年嘅遇溺救援指引並冇引用謙烈治嘅著作，並且警告話將謙烈治法用於遇溺救援係未經證實兼且危險嘅，因為咁樣做有機會引起嘔吐，從而導致吸入性肺炎（Aspiration）。

喺2016年5月，當時年屆96歲嘅亨利·謙烈治聲稱，佢喺辛辛那提市自己住緊嘅安老院入面，親自用呢個謙烈治法救咗一位院友嘅命。據稱呢次係謙烈治本人第一次（或第二次）喺真實哽親情況下用呢個方法去救人。 不過，根據謙烈治個仔彼得·M·謙烈治所講，「嗰兩次『拯救』全部都係假嘅。」

參見

• 哽親嘅急救處理
• 基礎氣道管理
• 基本生命支援術

外部連結

• 謙烈治研究院 提倡各種處理呼吸道阻塞嘅方法
• 關於文章同資料 探討謙烈治醫生如何利用虛假病例報告來推廣用謙烈治法治療遇溺同哮喘。謙烈治醫生於2016年12月17日在美國俄亥俄州辛辛那提逝世